حكايات من تحت وسادتي
اربعة حيطان
سرير وبعض الوسائد رموت والاف القنوات اضاءة خافتة موسيقى دولاب وعشرات الازياء تسريحة ملئية بكل شيء عطور --مكياج --منكير --كريمات فقط جميعها صامته حتى الموسيقى تجمدت عند نقطة الخواء القنوات متشابهة مسلسلات خاوية ملئية كذبا ونفاقا اخبار متشابهة في السودان والصومال والعراق وايران حتى الاحلام باتت مبرمجة على النفاق ومبنية على المظاهر باتت النفس تضيق بكل الاشياء عذرا ساتي بكوب ماء وسامر في طريقي لاتفحص والدتي ترى هل هي مثلي ايضا تعاني الوحدة ساعود انتظروني |
اقتباس:
المجنون الرسم على جدار ابيض امرأة عارية مباعدة مابين ساقيها عن حرج عظيم اصاب بنات حلتنا ونساءها والرجال الكبار وعن متعة عظيمة اصابتنا حينذاك ونحن نراوح مكاننا بين طفولتنا والمراهقة والرسم الشهى... فعدلت عن الأمر فمجنون حلتنا كان اشجع منا حين افصح عن نزواته وأثرنا نحن الاختباء خلف قيم من وراء حجاب تندثر فينا ببطء احكى ياااخ هزينا بعنف |
اقتباس:
شاي بفلفل اي والله بجد مبالغة ماتفوت التمتع بمذاقة الذيذ وشوية لسعةgoood ماعليكم الا كباية شاي احمر..وتلات اربعة فلفلات بطولهم........اوعى تسحنهم واستمتع باجمل مذاق بالمناسبة دي اعلان |
مسكينه يابت والله
لا جارة لا رفيقتنا تضاحك سنينتك لا راجلا تنشغلي بيه لا حبيبا ماخد باله منك حاله صعبة بس مامشكلة خليك مع كباية الشاي احسن |
اقتباس:
اشرب مريسة زااتو:D فاصل وتواصل:) |
تمددت على سريري
امسكت بالريموت لاخر مرة في محاولة لايجاد شيء يذهب تلك الوحشة قناة النيل الازرق اخيرا موضوع عن رقيص العروس.. اتسعت عيناي قليلا وانا اري تلك الحستاء تتهادى امامي اخذني الخيال الى هناك تخيلت نفسي في مكان الراقصة التي امامي على شاشة التلفاز بساط ومعازيم وجو معتق برايحة البخوروهمسات هنا واسراب من الفتيات الجميلات من كل فج وترقب وتحفز ........وبعض الزغاريد تنطلق هنا وهناك كلما علا صوت ضابط الساوندسيستم الو .الو...الو ....واحد... اتنين ... تلاتة وصوت المغنية يرتفع محتجا...يا جماعة العروس دي وينا....نحن ناس عندنا مواعيد دا ماكلام دا - خلاص اهي دي العروس جاهزة...العريس وينوا - الصلاة على النبي عروس الوليدات لي حدهم -ما شاء الله ياهناية...ما عسل - شفتي الفساتين قالوا خيطوهم في الهند مبالغة لكن والله -يا جماعة وحدووا كدي زحوا من الدرب العريس وصل -ايوووووووووووووي يييوووووووووووي يييييووووي -ياعريس امسكها من ايدها ..ياناس زحوا ليهم من الدرب الغناية دي مستعجلة ومددت يدي لامسك بيد عريس الذي يقف بجانبي وانا ارفع نظراتي كي التقى بعينيه فلم ارى الا شاشة التلفاز امامي ومغنية تغني الليلة هوي ياليلة.... والعريس مرق بالسيرة وتحسست يدي فوجتني اقبض على وسادتي بقوة تراخت يدي ممتدة الى داخل الوسادة فتعثرت بدفتر مذكراتي يرقد تحتها في هدوء عقب ذاك الصخب الجميل فتذكرت ان اني وعدتكم بحكايا من تحت وسادتي انتظروني |
وفي انتظار اولى حكاياتي غدا اتركككم مع
ياسلام يابت بلدي الصغيرة ...نكاية في الرقصه ..اقصد العرسة الطرشقت دي[flash1=http://www.youtube.com/v/_lZsDozGKhE&hl=en_US&fs=1&]WIDTH=400 HEIGHT=350[/flash1] |
انا جريت لي بنبر
و مع كباية شاي و منتظرا و على ثقة اني ح القى نفسي في واحده من حكاياتك |
اقتباس:
جري بنبرك واقعدي البيت بيتك وشاي الفلفل تحت امرك هي فعلا تتخلها بعض الحكايا عن بعض الصديقات قد تجدينها حولك دوما اخذت مقدمتها عن رواية بنات الرياض وابيات نذار قباني ساكتب عن صديقاتى عن الاغلال دامية باقدام الجميلات عن الهذيان عن الغثيان عن موتى غير اموات يعشن يمتن مثل الفطر فى جوف الزجاجات -نذار- |
اقتباس:
صباح عمرا يزيد و يطول و يقصر معاهو الليل الوالدة - الفتاه المرأة و معاناة الوحده المسوخ و الحياه المضطربه تهز مواطن الجمال... ادوات ترفهينا و زينتنا ... و عالم يمور ... و الحصيله صفر صغير عودتك تنبش وحروفك عن دنيا الجميلات ثكلى و يبقى الكون .... الله فى الله حى ونضرب فى .... عن موتى غير اموات هذتنى العباره ويديك العافيه |
جيجي
ازيك ... منال المولد جه؟ اقتباس:
|
يا سيدتى ..
جلد الذات ..لا ولن ياتى بالتغير.. التغير ..وسيط لنرى ما بداخل الاشياء من جمال وواقع.. بكل اتكاءاته..و ساعات نزفه.. تماما كحبات الفلفل بالشاى.. ابقى بود.. |
جيجى :
رايك شنو اديك حاجات من تحت مخدتى :D والله جنس حكايات ..!!! قاعدين نعاين يابت ماتطولى عشان ماننوم |
اقتباس:
اسأل دموع عيني أسأل مخدتي...كم دمعة رايحة جاية تحكيلك وحدتي.. كر علي:p |
اقتباس:
ببكى اسع ياخ |
اقتباس:
شكرا لمرورك العطر ومداخلتك الشحمانة كوني دوما بمشاعرك ورائك |
اقتباس:
|
اقتباس:
كن معنا ودعنا نرى لك الود وشاي بحببيبات الفلفل |
اقتباس:
هو لك فلتاتينا بما لديك كما اتيتينا بالرجل الجميل فتحي مسعد ولك الشكر |
اقتباس:
أعملي حسابك سمراء دي زي الفريك ما بتدور شريك وأنا من يوم ما عرفتها كاتمة علي نفسي ومخلياني لا قادر أعاين شمال ولا يمين وآخرتا أمنت علي تأمين ضد الفقدان والخيانة ..شوفي الغيرة بتوصل البنات لي وين:confused:;)goood |
حاكتب بلغة بارده(مصطلح خاص)
عشان المشاعرلازم تطفو على السطح يعني برضه لغة سليقة(برضه خاص) عربي لندن وعربي جوبا وعربي الهند وعربي ايران وبكل اللهجات..يعني سليقة-بطاطس -جذر -كوسة --بصل---كرفس--ولحم زاتوا مع اني ما بحب اللحم والسبب الخروف الضبحوا قدامي وانا صغيرة وماتبعه من حمى واستفراغ وفزع ومستشفيات الوحيد الانصفني الدكتور لمين قال لابوي في حتة في العالم بيضبحوا فيها قدام اطفال غير السودان دي مالازم يحصل ليها كدا المهم النتيجة كانت مقاطعة اللحوم بكل انواعها لحدوت ما وعيت وشفت في التلفزيون الناس بتضبح بعضها كل يوم...في الاول كنت بقعد مع ابوي احضر الاخبار ولمين يجي منظر بتاع ضبح اقصد قتل بغطي وشي بيديني واغمض بعد دا..بعدين بي تشجيع من ابوي بقيت افتح شوية شوية بعدها بقيت اتاوق بي فرقة اصابعيني لحدي ما اخدت على الحكاية وبديت اتسال معقول بكتلوا بعض كل يوم كل يوم معناها الضبح دا عادي وفي شنو في حتة ارض فاضية مافيها ولاحاجة ولافي حدود-انا مش سمعت جارتنا المنقبة بتقول الوطن طاغوت--يكون عشان الالاف البتموت دي ...وبعدين اكتشفت انه الواحد ممكن يضبح اخوه او جاره او صاحبه اوبته عشان شوية قروش او غيره او حماقة ساي كدا طب عادي معناها الخروف الله يرحمه وانا ممكن كمان اكل لحم عادي اصلها جات على خروف ااااااه كدي خلونا مع المذكرات بالمناسبة دفتر مذكراتي دا عالم براه .......فيه ادعية-اهداءات-مقابلات-ذكريات--قصص---دموع ..ورود.. قصاصات بمختلف الاحجام - (القصاصات دي براها كوم ذكروني احكي ليكم قصه زميلنا وصاحبنا محمد)...كلام بتقال.. وكلام مابتقال... وروائح مختلفة---صدقوني كل صفحة عندها ريحة خاصة واحساس خاص خلونا نقلب..........نقلب..نقلب...ايواا سلوي--- حنبدأ مع سلوى ترى كيف هى الان؟!!!! وماذا يحدث لها؟؟ |
اقتباس:
لك ولأميري (مشروبا) آخر انه عصير الطماطم :p اعتدت ابتياعه من (بقالة) لهنود بالجوار حيث أقيم... قال لي الهندي يوما: -هدا أسير مافي نفر تاني يشتي بس أنتا يازول :D أي يقصد أن لا أحد يشتري (عصير الطماطم) سواي باقي ليكي ماأخير من شايكم أنتي واميري (البهرد اللسان دة) :confused::mad: :D:D أستمتع بالقراءة لك (هنا) و (هناك) looool فلتخرجي لنا (خبأ) وسادتك ياماجدتنا مودتي |
[align=center]جيجى...
متاابعين...و معانا : [media]http://sudanorg.tk/files/al_sbata.wma[/media] للحفظ و الاستمااع[/align] |
كلمات سطرتها لي يوم رحيلها
ذهبت هي وبقيت الكلمات وبقيت معها ذكريات الالم كنا بالسنة الاولى الثانوية هي من احد قرى الريف الشمالي لمدينة الخرطوم جميلة يتوارى منها البدر خجلا رقيقة كنسيم الفجر ذات انوثة تجبرك بالتعلق بكل تفاصيلها تهمسك الكلام همسا بصوت عذب جميل كانت تخصني بمودة جميلة تحكي لي فيها عن امنياتها واحلامها وتحكي لي تفاصيل اسرتها الصغيرة وكيف ان والدها الرقيق الحال يعتبرها واخوتها حملا ثقيلا ينوء به ظهره في يوم اتت حزينة واخبرتنا انها ستتزوج بعد اسبوع من احد اقرباء والدها الذي يكبرها بقرابة العشرين عاما زوج يملك كل مقومات الحياة المادية ابن احد اثرياء المنطقة ... واسرت لي حين انفرادنا انه جهول عربيد يعيش حياته متنقلا بين معاقرة الخمر والنساء ولكنها قبلت به رضوحا لرغبة والدها الذي طمأنها بانه زوج لايعوض وان الله سيهديه يوما سقطت دمعة على ورقة كانت امامنا فاسرعت تمسح تلك الدمعة تذكرت انها تريد ان تفعل شئيا كتبت لي بعض كلمات على تلك الورقة كم احببتك واحببت ان اكون مثلك ارسم احلامي وابدا في تحقيقها خطوة خطوة وكم تمنيت اان اختار شريك حياتي لوحدي ولكن دوما تقيدنا الظروف كتبت لهاعلى نفس الورقة دون ان ينبث احدنا بكلمة دعي عنك كل هذا وابدي حياتك ارسميها لوحة وزينيها بكل الالوان حينها ستبدأين حلما جميلا كل يوم دمعت اعيننا وتعانقنا طويلا اقمنا لها حفلا رائعا داخل غرفة الدرس ..لم نبالي لشيءغير ان نفترق والبسمة على الشفاه عندما دلفت الى غرفة الدرس ذاك الصباح كانت الغرفة تعج بالاصوات على غير العادة وتجمعات هنا وهناك.. بعض الضحكات.. وبعض العبوس اتجهت نحو اكبر التجمعات عددا بادرتني زميلتي -يا...الليلة جنس شمار -في شنو -ما سمعتي -في شنو -سلوى في المستشفى -سلوي منو؟ - العروس -شنو!! مش عرسها كان اول امس..حاصل شنو..اوعى يكون صبغة -ياريت....ياريت ردد الجميع - تسمم؟ -ياريت ...ياريت - في شنو؟ سلوى مالها -عندها نزيف -نزيف!!! حادث حركة يعني -ياريت ياريت - الشغلانة فيها امواس والات حادة وهي تتضاحك ويمكن سكاكين زاتوا -شنو يعني..انتحرت؟... ولا في زول طعنها وتنفجر الضحكات -يابت امشي امشي بعيد ياجماعة الشفع ديل مامعانا-عليك اللله امشي العبي بعيد ولا اقول ليك هاك الحلاوة دي وامشي العبي ماتمرضينا ساي وتتوالى الضحكات - يابنات في شنو؟ كلموني - ابييييينا ماااابننكلمك ماقلنا شفع مامعانا وفجأة - يا بنات كل واحدة مكانها بسرعة تعالى صوت اعرفه من خلفي -ست ليلي سمعتي سلوى حصل ليها شنو؟ -سمعت هو المدرسة دي فيها حاجة بتتدسى - الله يقطع الطهور وسنينه...امات متخلفات.. هن كان ماساي السجمانات استفادن شنو؟ وهي اصلها عرسوهالي راجل ولا لحيوان وينفجر الفصل بالضحك مرة اخري يرتفع نفس الصوت من خلفي -استاذة ليلى اصله الحصل شنو؟ -يابنات سيبوا قلة الادب وكل واحدة تقع دمحلها -طب يا استاذة لي كدا -يعني نعرف من وين.. هسى كان عملتوا لينا حصة بدل حصة النشاط دي وريتونا الحاصل شنو مش كان احسن ترتفع بعض الهمهمات - هي يعني عارفة حاجة ماشايفة البورة دي الا يكتبوا عليها -ولا يعني اسال امي؟ معقول؟مالازم نعرف..ارتفع نفس الصوت - والله امك زاتها ماتوريك - هي امك زاتها عارفة حاجة - طب يااستاذة هو حيعملوا ليه شنو؟ حيسجنوه؟ -يابت يابت ياخوانا الشافعة دي امرقوها بره شوفو ليها روضة-- ماقلنا ما معانا شفع هنا -قال يعملوا ليه حاجة قال..تلقيه هس ىفرحان يقدل تحت شجر المستشفى داك ويفتل في شنبه عامل فيها اسد وينفجر الفصل مجددابالضحك ويتعالى الضجيج |
اقتباس:
مبالغة يا جيجى روعة متعة |
جيجي صباح جميل
رفعتي وسادتك فتطايرت ذكرياتك جميلة منسابة على وجوهونا فطويت وسادتي قاذفة بها في وجهك حباً ونكاية بك إتلفت لأجد ذكرياتي تحدق بي من على البعد وانا أشاهد في نفس برنامج طقوس الزواج السودانية والاستاذة تتحدث عن اغنية الزفة قلت يابت احسن ليك تختاري الاغنية من هسة فتخيلت نفسي داخلة الحفلة ونجم الدين الفاضل يغني ياعواطفنا النبيلة ياخدود نادية واسيلة إنتي بت عز القبيلة وانتي بت عازة وخليلة وبعديها إنشاء الله يمشي بس المهم الاغنية دي تحديداً تكون بي صوتو هو ( المهم انا حاجزة الأغنية دي من هسة ) وحلقت بي اجنحة الذكريات .. وأنا أقف إستعداداً لكل صلاة مرتدية التوب والذي بطقس يومي أقف متذكرة رقيص العروس والبرش فأبدأ قبل تكبيرة الأحرام أزحف بقدمي ببطء. أختال الهوينى. واضعة كفي على وجهي .. ظهر ظهر الجميل ظهر صفقوا وقولوا الجميل ظهر .. او الملكة جات صفقولا دي أغنية صلاة الصبح بعديها أستعدل مكبرة للصلاة جراء صيحة من بعيد :يابت إنت مالك شيطانك مابفوتك اما الظهر شوف عرسونا حلاتا زي قطعة الشوكلاتة الجمال الفيها ده ورثة من عماته وورثة من خالاته العصر إزيكم إزيكم انا مابعيدة انا منكم إتجدعي وإتفدعي املصي توبك وأجدعي المهم لكل صلاة كنت أضع أغنية ومرة إبتديت .. أهل العريس قولوا ماشاء الله أهل العروس قولوا ماشاء الله وكالعادة في زول نهرني من بعيد طوالي إبتديت في الصلاة بعد ماإنتهيت من الصلاة مباشرة .. أبوي قالي زواجنا تم على شرع الله هاهاها الحاج حفظ معاي الاغاني حاأجيك راجعة تسمحي لي أشاركك البوست ده ؟؟;) .. |
اقتباس:
ايات ياعسل اضفت للبوست بعدا اخرا انت بالذات ..عيثي على هذاالبوست حلاوة طب بالمرة ماتمشي لينا على الموضوع التاني;) عموما اسعدني مرورك جدا |
اقتباس:
وكلك زوق واسعدني مرورك |
اقتباس:
شكرالك ماتاتينا به من جمال دم زاهيا |
اقتباس:
مش مشكلة نجرب والتبعات عليك-ماتقوم تطيرني من العصاير ليوم الله زي قصة الخروف يعني اما عن الشاي المفلفل فهو مدهش بجد وانا والله بتكلم جد ..يعني حبتين فلفل بطولهم او تلاتة على كباية الشاي والتجربة خير برهان وادينا رائك شكرا لك مرورك الرائع مرة اخرى دم بعافية |
اقتباس:
اي واحد انشاء الله ود الخواجيةgoood |
في العام الماضي
مشينا رحلة (بيتش بري) مع ثلة من صديقاتي المهم لاحظت إنه في مجموعة من الشباب يبدو إنهم من طلاب كلية الفنون الجميلة إبتنوا من الرمال رجل وإمراة وهما يمارسان السر جهاراً نهاراً وبعد إن إنتهوا جلسوا بعيداً .(الأولاد طبعاً ). ليستمتعوا بمشهد كل بنت وشكلها بكون عامل كيف وهي بتشوف الحاجة دي ... صاحبتك ماصدقت..(غتاتة مؤسسة) مشت ليك علي الجوز ده عدييييل .. وعاملة نفسها ماشايفة.. وبتتكلم بالتلفون وكمان وقفت فيها ..وإبتديت أمسح فيها برااااحة وكأني ماقاصدة .. أقول ليك حاجة: أنا بعرف أهبش لكن مابعرف أشاكل ووصيت صاحباتي .. للنجدة المهم هم زاتهم إحتاروا في الزولة الجات وقفت دي .. وتأكد لهم إني فعلاً ماشايفاها وجاني واحد مسكين شكله إجتهد فيها لوسمحتي .. ممكن تزحي من هنا .. قلت ليه مندهشة جداً ليه في شنو ..؟؟ وأثناء ماكنت بتكلم معاه .. مسحته الباقي ورأسي مرفوع ( دعاية أريبا بس ). وانا أملأه إعتذاراً .. ولسه بتكلم بالتلفون .:D. يعني ماشفتها ومسحتها .. وبعديها مشيت زي الماحصل حاجة ... ... |
اقتباس:
|
اقتباس:
اذا بليتم فاستتروا:D |
اقتباس:
|
يا صاحبة الحكايات والزكريات ...سلامات
اقتباس:
|
قصاصة محمد
قصاصة محمد دي كانت فضيحة عديل زيزي صاحبتي من الثانوية ودخلت معاي نفس الكلية العلاقة بينا قوية جدا ..اصلا كنا متقاربين فكريا ومشتركين في هواية القراءة وكتابة الشعر زيادة على كدا اماتنا صاحبات-القصة دي تعبتنا شديد مافي حاجة بتتدسى محمد شاب لطيف جدا-داطبعا اول انطباع- اول يوم دخلنا القاعة في اول سنه لينا في الجامعة انا وزيري نتلفت وراسنا مقطوع والقاعة ملانه مشينا ليك في الصف الاول عاملين فيها شفوت نعاين كان نلقى لينا مكان فاضي.. قوم يا محمد الكاتلاك الرشاقة قوم من مكانك وجر صاحبك القاعد جنبك ..واتفضلوا يا اخوات ونحن ماصدقنا انكشحنا ليك وشكرنا بطرف خشمنا لزوم قشرة وكدا المهم بعد المحاضرة طلعنا لقينا ليك محمدفي وشنا سلام عليكم .... وعليكم السلام ...كيفكم ...تمام والله وبقية التعارف قام محمد كمل رشاقته -ياجماعة ايه رائكم تشربوا حاجة..الكفتريا بي جاي المهم مشينا بعد اتماسخنا عليه حبة في البداية وزيادةفي الظرافة محمد عزمنا فطور وبعده عصير وبعده شاي وبعد داك انت يامحمد ابقى لينا في رقبتنا لف بينا الكلية كلها يدخلنا بحمد ويطلعنا بخوجلي لحدوت اليوم خلص وقررنا نرجع -يا جماعة انا معاي عربية وانتوا في طريقي اصلا -لا والله شكرن نحن برضو معانا عربية طيب باي باي بكرة من الصباح لقينا ليك محمد حاجز ليناجنبه ونفس البرنامج اتكرر وبقى مابدينا نفس واي واحد يجي بجنبنا يحدر ليه ونحن خلاص ماعرفنا البنعمله -يازيزي انا خلاص الجامعة دي كلها حاخليها عشان محمد دا..ومحمد دا شكله مباريك انتي(اصله اكتشف انها بت جيران ناس خالته) انا ذنبي شنو؟ ومن يوم الليلة انا من طريق وانتي من طريق.. دا شنو ياخ كرهنا - لا والله محمد شنو كمان حلينا كدا-اصلا انا عارفة زيزي عاجبها خالد ود حلتهم المعانا في سنه رابعة نفس الكلية ويمكن تكون دخلت الكلية دي عشانه وصلنا لاتفاق انه محمد دا تاني لو عزمنا اي شيء نرفض عشان مايستلمنا بعيزوماته دي كل مرة -تشربوا شاي لا والله شكرا -تفطروا لا يامحمد عاملين رجيم اجيب ليكم عصير -ماعايزين المهم محمد اخيرا فهم واتاريه راجل احمق جدا ونحن في قمة غتاتنا ديك مع محمد الدكتور فاجأنا انه الكورس انتهى وانه في امتحان ونحن يادوب مافاهمين حاجة ولاعندنا مذكرات ومافقنا من دهشة عالمنا الجديد دا.. طبعا اتهجمنا وما عرفنا نعمل شنو وماعارفين درب مذكرات ولاحاجة...محمد بكل شهامة بعد حسه بشلهتتنا ديك اتصدى للموضوع وقال انا حافتش مذكرات واطبعها واطبع ليكم معاي متين يامحمد الساعة 7مساءنتلاقى في الكفتريا اتفقنا انا وزينب ناخد الورق الساعة7 ونبيت عند صاحبتنا في الداخلية نساهر الليل داك وبكرة على الامتحان الساعة سبعة شوكة شايفين ليك محمد في الكفتريا شايل الورق -اها عملت لينا شنو -طبعت ليكم المذكرات ودبست لكل واحدة ورقها طب والله فيك الخير ومشكور يامحمد..وغيرك ماكنا حنعرف نتصرف كيف ومانعدمك وشنوشنو فجأة محمد قال لينا -ايه رائكم نشرب شاي ولا نتعشى -لا يامحمد مابناخد حاجة بعد الساعة7 -شكرا يا محمد قبل مانتم كلامنا نشوف ليك محمد شيط شيط وقع ليك في الورق داك شريط وشرط ليك المذكرات ديك حتة حتة قدام العالمين الموجودة ورماها في الارض ومشى نحن الهجيمة وقعت فينا لا عرفنا نبكي ولا عرفنا نضحك المهم رجعنا الداخلية واتصرفنا ووالامتحان انتهى ونحن طالعين من الامتحان نلقى ليك محمد واقف -تشربوا شاي -نشرب يا محمد ومحمدبعد داك بقى زول صاحبنا شديد اتذكرت القصاصة الفي المذكرة دي كاانت جزء من المذكرات الاتشرطت اصلا بعد هو فات نحن خميناها من قدام الناس محمد لاقيته قبل كم شهر لما جاء هو وعروسه شهر العسل |
اقتباس:
وشكرا لمرورك وشعورك الرائع |
ومازال الليل طفل يحبو
ولازالت مذكراتي في بداياتها-الله يستر وزي ماقال لي واحد اخونا في بوست بهناك غايتوا مابتستري كلو كلو الفي قلبك على كيبوردك.....وكمان هسة جابت ليها مذكرات يعني القديم والجديد كله في السهلة..مش قالوا البفلس بفتش مخازنه.. فعلا بوست سليقة هسى هو ذاته يصنفو تحت ياتوا نوع من مصنفات استاذنا خالد..احسن حاجة تفتحو لينا مصنف جديد وتسمو تداعيات وماتنسوا تضيفو بوستات ابو عاقلة المهم قصاصة اليوم ورقة فيها ابيات من اغنية لفناننا الكبير محمد ميرغني اصلا الورقة دي لايممكن افرط فيها لانه لما وصلتني اول مرة احس انه في زول عبرني وانه عيوني حلوات بالرغم من انه لحظات وصولها كانت رهيبة قلبى كان حيطير وما عرفت ارميها ولا اقراها ولا احرقها وفضلت من الساعة اتنين لحدي الساعةالثامنة ماعارفة اعمل فيها شنوبعد داك اتوكلت وفتحتها ولاقتني اجمل كلمات اتلقيتها في حياتي عشان خاطرنا خلي عيونك الحلوات تخاطرنا ولما تمري ابقي اقيفي ردي علينا واسالي عن مشاعرنا اول حاجة حسيت بالكلمات دي بتتكلم وتتحرك وتكبر...وتكبر ..وتكبر..وزغللة وعرق المهم الصباح لقيت روحي قابضة على الورقة ديك بشدة-شكله كدا كنت خايفة عليها تطير زي ماطارت الورقة القبلها قبل مااعرف الفيها شنو- والورقة الطارت دي حكايتها حكاية بدأت حين اتي احد اقربانا لزيارتنا وكنت في بداية مرحلتي الثانوية-قبل القصة دي بسنه تقريبا وعند توديعه على الباب دفع لي بورقة قمت انا بكل هبالة قلت ليه اديها لمنو.. زولنا سحب ورقته بسرعة وقال لي خلاص خلاص.. واصلا القصة عندها خلفية لانه قبل كم يوم ود خالتي اداني مظروف يبدو انه فيه صورةقال لي اديه لفلانة المعاكم في المدرسة بعد فترة اخت قريبنا حكت لي انه فلان قا ل والله بت....كانت عاجباني لكن لقيتها هبلة-خسارة والله حظ مافي اصلا فلان دا شاعر واكيد الورقة كان فيها بيتين حلوات والخسارة الاكبر انه زولنا كان عرس غايتوا زي ماقال لي خالي-عندك غباء اجتماعي هبل وغباء اجتماعي والبوست اكبر دليل وكباية شاي احسن |
يا جيجى ياخ أنتى متعة والله .. كل ما أقول أمد يدى أخاف من الخرمجة بتاعتنا بتاعة اليومين ديل .. غايتو غلبنى وقلت أقول سلام ..
|
| الساعة الآن 10:30 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.