امكي الملكني هواها ....... توجد صور
( أمكي ) قريتنا التي تبعد حوالي خمسين كلم جنوب مدينة أبوحمد في منطقة الرباطاب
قرية جميلة خالص ح احكي ليكم عنها وعن زكريات الطفولة بقدر ماتسعفني زاكرتي الخربة فترقبوا |
|
يا جماعة غلبني اضع صورة مباشرة
اشرحوا لينا من فضلكم خالص الود |
http://www.sudanorg.tk/upload/upload..._7742454_n.jpg
ياسر سنة مترعة بالافراح والاماني الطيبة . اذا الصورة في جهازك بتلقي في الصندوق الماسي علامة مكتوب عليها مركزتحميل الصور تضغط عليها وتحمل الصورة من الجهازطبعا بعد داك تنسخ الرابط وترجع للصندوق فو من العلامة الفاتت بتلقي علامة مكتوب فيها ادراج صورة تضغط عليها بتديك صندوق صغير تمسح المكتوب فيهو وتنزل الرابط النسختو قبيل دك وتضغط موافق . اتمني الشرح يكون واضح . معزتي :cool: |
اقتباس:
خالص الود |
|
|
أمكي وطني الحبيب
أقول كما قال الراحل الجميل - آلان باتون - الروائي الرائع من جنوب أفريقا
صاحب ابكي وطني الحبيب و اقول - أبكي - أمكي - الحبيب - و الاسم يرتبط في لفظته بالأم - يا ابنم - وييييييييين أمكي ؟ و يا بناوي ... بالجد أنا ليكم ناوي دم بخير و أنت تهدينا لوحة من القلب عن حب المدن - حب الأرض استمتعت بالصور فنسأل خزنتها - هل من مزيد ؟ اسم قريتكم - أمَـكِـيْ - |
اقتباس:
حبيبنا عمدة قريتنا امكي قرية من قري الرباطاب الشهيرة وسنحكي في هذا البوست عن زكريات جميلة هناك احجز بنبرك خالص الود |
|
ودي طبعا ( الحاحاية ) وتنصب دائما داخل حواشة الذرة ليستطيع الذي يجلس عليها رؤية جميع الحواشة
وهنالك حبال مربوطة بها الي كل انحاء الحواشة تسمي ( العارات ) لطرد الطير |
جاييكم بالصور
ابقوا قرااااااااااااااااااااااب |
بنبر وعنقريب هباب(حاجز)
يا ود بيناوى وياريت تنقل (بوست منبرنا بجاى) تحياتى دوما يا صاحب معاوية عبيد الصائم |
كدي يا ياسر قبل ما تدخل لينا في سرد الزكريات ورينا دلالة أسم القرية .... أو معني الاسم البوست ده ممكن اكون سياحة حقيقية ,,, ورائعة جداً في جوف قرية انا شخصياً أول مرة اسمع بيها .. حدثنا عن عادات الاهالي وتقاليدهم في جميع المناسبات الفرح .... الحزن ... الولادة والسماية ... والختان للجنسين حتي الحب والكراهية ... تأكد تماماً من ممكن نستمتع بببوست جميل ورائع ... وبضيف لينا كتير تحياتي |
اقتباس:
حبابك الف ياخي اها نقلنا ليك منبرنا وخليك بي جاي خالص الود |
اقتباس:
واتمني ان تستمتعوا خالص الود |
سلام يا ياسر،
متابع بمحبّة شديدة، فعشق النخيل يجمعنا. |
( أمكي ) قريتنا التي تبعد حوالي خمسين كلم جنوب مدينة أبوحمد في منطقة الرباطاب
تقع علي الضفة الغربية من النيل وتقاصد تماما محطة ابوديس ( السكة حديد ) وهنالك بنطون يربط بين الضفتين أمَـكِـيْ هي كلمة نوبية يختلف الناس في تقسيرها ولكن اقرب تفسير ( امنق كير ) او مكان الماء وياريت يجو النوبيين للتصحيح ان كان ما اقصدة خطأ نواصل |
اقتباس:
واكيد النخيل هو عشقنا خالص الود |
وبمجرد ما وصلنا للضفة الغربية قصادنا طوالي سوق أمكي
وهو سوق شهير ويوم الخميس هو يوم السوق الكبير والذي يأتيه الناس من القري المجاورة عتمور .. العبيداب ... كرقس من الجهه الشمالية الجريف من الجهه الجنوبية ام غدي وبسوي من الضفة الشرقية |
يوجد بها مستوصف أمكي الخيري
ومدرسة اساسية للبنات واخري للبنين ( من اعرق مدارس المنطقة ) تاسست عام 1948م ومركز تنمية المجتمع (جامعة وادي النيل ) وكانت بسطة واتنين مدرسة وسطي ( بنين وبنات ) نواصل |
ويعمل غالبية السكان بالزراعة ( محاصيل .. جناين ) وتربية المواشي والاغنام
والمحصول النقدي الاول هو البلح وهنالك عدة محاصيل ( قمح ... فول مصري .. ذرة .. حمص .. كمون ... الخ ) نواصل |
وطبعا ناس امكي او ( الاماكة كما يحلو لاهلنا في القري المجاورة ان ينادوننا ) لهم قصص وحكاوي كثيرة
وهم مثلهم ومثل بقية الرباطاب سريعي البديهه ولكن لهم لغتهم الخاصة والتي تعتمد علي التورية مثلا امحمد ود الفطيرة ( ودا طبعا الزول الفاطر رمضان ) وجماعة شل ( وديل الناس البخافوا من نسوانم ) وعموما الحكاوي كثيرة ساتعرض للبعض منها لاحقا نواصل |
اقتباس:
تسلم يا ياسر علي هذه الصورة التي ارجعتنا الي الزمن الجميل |
يافجر المشارق الحاحاية دي عندي معاها قصص وزكريات جميلة
واكيد ح احكيها خالص الود |
|
|
|
بوست جميل جداً ونتمنى تحكى كل صورة بى تفاصيلها
اقتباس:
حتماً متواجد بكثرة فى البوست مودتى:cool: |
|
اقتباس:
وشكرا للتوضيح خالص الود |
وبعد كدة نبدأ نحكي في الزكريات
|
مدرسة امكي الابتدائية بنين
تاسست في العام م1948 وتخرج منها الكثير من ابناء القرية والقري المجاورة ومنهم الدكاترة والبروفات منهم الاطباء والصيادلة والمهندسين والسفراء والوزراء وغيرهم عند التحاقي بها كان الزي المدرسي هو الجلابية والشال أو العمة في ايام الشتاء وكنا نحمل الفطور ( في البستلة ) وعادة مايكون عبارة عن ( كسرة بي شاي) أو( كسرة بي لبن ) وبعد مرات بيكون قراصة ودمعة الا فطور محمد تاج السر كان دائما شعيرية او عيش وطحنية وكنا نضع ( البستلات جميعها ) في الركن الشمالي الشرقي للمدرسة وعادة ما نتسلل ان وعبد الماجد قسم السيد ( مجودة ) بين الحصة الاولي الثانية ونمشي ناكل فطور محمد تاج السر وفي فسحة الفطور يمشي يشتكينا لي ست عيشة |
اها طبعا ست عيشه دي الله يطراها بالخير كانت زولة صعبة خالص والمشكلة الحقيقية انها ما بتضحك كلو كلو مع انو في معلمين كتار صعبين وجلدم حاااااااااااار لكن ما مشكلة لانهم ممكن يضحكوا المهم نخنا يوميا ناكل فطور محمد تاج السر وهو يمشي يشتكينا لي ست عيشة ناكل جلدتنا زي العجب اها برضو في استاذ عيدالروس ابوالقاسم ودا العلمني جداول الضرب لي يوم الليلة ما بنساها كان بيكت رقم في السبورة ويجينا بالدور مثلا كتب سبعة يجي للواحد ويقول ليهو تمانية لو قلته ب56 بتاخد جلدة ويقول لي انا ما داير بي بس تقول الرقم طوالي بالطريقة دي انا من الخوف هسه حافظ لغاية جدول 24 واستاذ بدر علي حسين ودا برضو كان صعب شديد وطبعا الناظر كان عمنا احمد محمد بيناوي ودا طبعا براهو مع انو عمنا وطوالي معانا لكن اول يوم في سنة اولي لقيت زول مختلف اول حاجة جانا صاري وشو وقال : انا الهاويه في اللحظة دي انا من الخوف قربت اقوم جاري ) وانا طبعا كنت شيطان شديد وطوالي في البحر اها طوالي عاين لي وقال : قوم يا ود بيناوي البحر طالع وللا نازل قلته لهو طالع و مسكني جلدني جلد شديد اها من اليوم داك انا بقيت امشي للجبابيد بالدس نواصل |
وطبعا كنا بنمشي للمدرسة بالجلاليب والشالات
ولمن نجي راجعين بنجي مشرعين طبعا بنجي عكس الهواء والواحد بيربط طرف الشال في نصو ويمسك الطرف التاني وبرضو بنحوم بين الاشجار بحثا عن الشقيقيلات والواحد لمن يجي راجع البيت بيكون مالي البستلة بالشقيقيلات وناكل سريع ونجري علي الجبابيد |
|
|
|
اقتباس:
ياسر أخوي كيف حالك؟؟؟ أنا طبعاً كنت بخش البوست دة بتفرج الصور واستمتع ب-طيبة القرية- وأتخارج وزادت متعتي بعد بدايتك سرد الذكريات وبالرغم من إنو أخوك عارف روحو من "شايقية لندن" وناس اسامة معاوية ديل بيعتبرونا افندية ، لكن عامل روحي مفتح وبعرف حاجات الشمالية والفاظا كلها.... لكن وحاة سيدي علي "الشقيقيلات" دي غلبتني عدييييييييييييييييييييييييييل وضّح.....أبِنْ.........أفصح |
اقتباس:
|
| الساعة الآن 09:48 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.