انا عاوزة ابقي زي دي
http://www.l44l.com/up/uploads/8d7dcb3f70.jpg
http://www.l44l.com/up/uploads/9936cb956b.jpg] بهظر اكيد باسكال وكمان اشوريا حلوة بس جد ما عاوزة دا مدخلي لي موضوعى وسببو زملائي الشباب لانو انا بعد الجداول بتاعت الدوامات الشباب المعاي (الزملاء) عندنا زميلة لينا بيقولو لي ماتختينا معاها استغربت ففي يوم جوونى كولهم واي واحد يقول ماتختينى مع فلانة فسألتهم وحنستهم يورونى السبب وكان السبب انها شينة والله استغربت واتناقشت معاهم وفي النهاية واحد فيهم قال لي عاوز لي خلقة تتقابل لكن لما جيت فكرت في الموضوع بشمولية اكتر لقيت انو في مانطلق عليهو العنصرية ضد المرأة بي الشكل بالعربي السمحة بتتفتح ليها جميع الابواب والشينة ماعندها اي حاجة مابنكر انو العين تميل للجمال ودا حاجة طبيعية وفطرية لكن المامفروض انو نميز على اساس الشكل في ناس حايدخلو ويقولو لي غلط لكن صدقونى انا شفت امثلة ظاهرة امامى السؤال مطروح لي ادم هل تميز هل تفضل ان توظف لديك الجميلة ام الذكية ومتين حاننتهى مقولة كونى جميلة واصمتى كانو وظيفة حوا ان تكون لوحة لترضي الرجل انا شفت بنات كتار زي المهرج شي احمر وشي اخضر لي اسباب عديدة قد يكون نقص قد يكون تربية خطاء تخليها تعتمد على مؤهلات الانثي فقط لكن اهم سبب هو ادم ونظرته للمراة التى لا يري فيها غير الجمال لا عقل لا ثقافة لا اخلاق فقط جميلة ودي نظرة بتخليني اعتقد انو المرأة في نظر هؤلاء ما خلقت الا للمتعة اما الانتاج والعمل والتفكير فهو للرجال صاحبتى قالت انو المدير بتاعهم وظف واحدة خريجة ثانوي وفضلها على خريجات السكرتارية والاقتصاد وسببو القالو عاوز وش اتصبح بيهو !!!!!!! بقت النسا وش يتصبحو بيهو وبس من غير روح ولا عقل ولا فكر عاوزيين جيل نانسي وهيفاء واشوريا وكمان باسكال اما جيل النسا المفكرات فلا حوجة لهن فهن لا يمتعن النظر ادم انتظر الرد !!!!!!!!! |
اها دا موضوع تمام
اديك محور جديد؟ كيف يرى الرجل عمل المرأة شوفي في اي بلد بحترم امكانات الناس بعينو بالشهادات والمؤهلات ولكن في السودان عشان اصلا الرجل يتعامل مع المرأة كسمكة زينة عايز يتصابح بيها ودي نفس الاتتيود البتخلي اخوك المثقف جدا يقعد يقوليك بالله شوفي لينا واحدة اهم حاجة تكون سمحة.صفرة وشعرها ناعم طيب لو اي زول عايز صفرة وشعرها ناعم اخواتك الخدر ديل يقعن وين.. المهم في السودان لانه الراجل حسي وسطحي بيفتش على بقرة اسرائيل الفاقع لونها .... نادر جدا تلقي واحد وضع ليك عايز واحدة مثقفة لالالا لو راجعتي بوست رقصة العروسة حتلقي البفتكر الثقافة لقافة وما قادر يميز بين المثقفة واللقيفة شوفتي كيف؟ واللذيذة دا ياهو نفس الراجل البكون عايز يعمل علاقات خارجية سرية مع مثقفات ويقوليك زوجتي ما بتفهمني ولا بتفهم كلامي.. وما تنسي برضو انه تكريس العقلية دي مسهمة فيها المرأة برضو بانه تختا لولدها البت السمحة او بانها تحاول دائما تقدم جمالها قبل مؤهلاتها.. بعدين مستعدة تتنازل عن اي حاجة ويتم استغلالها من رئيسها و استاذها.. بعدين برضو مهما الجميلة انجزت الناس بتعزيه لشكلها ما عقلها حيث دائما بصورة استريوتبينق عجيبة بربطو الجمال بالغباء حتى في الغرب بالمناسبة.. ذي البلوند دائما ضم... وغالبية الرجال السودانين يضعون الشكل شئ اساسي في اختيار الزوجة.. الا في حالة غطى قدحو.. عشة بت فاطنة كتبت كلام جميل عن اسطورة بجماليون اشوفها انزلها ليك.. شكرا ومودتي |
لا احد يرفض الجمال في اي مكان فهو مرغوب وهذا طبع البشر ولكن وفق تجارب كثيرة وفي رحلة طويلة قاربت الاربع عقود مع العمل فالمظهر اللائق والتصرف السليم والمواظبة والاداء الجيد لايتركو للاهتمام بالجمال فقط في العمل الجاد المنتظم المنظم مجالا...العمل الجاد يلتهم كل الوقت ولا يترك سانحة للتفكيير فيما هو غير ذلك ..ماهو مطلوب كذلك من المراة مطلوب من الرجل في هذا الصدد فلا يجب ان نتجاوز ذوق ورغبات واهتمامات المراة العاملة فلها راي في الرجل في مظهره وهندامه وشكله واداءه ..
|
اقتباس:
سببها منو ؟ أولا .. نشوف حكاية انك رئيستهم دى مقبولة عندهم .. ؟ اذا كانت مقبولة أومبلوعة .. يبقى المشكلة حكاية الجمال!! وحكاية العنصرية العنصرية فى المنابر .. اليام دى ضد الرجل !! ومِن مَن ؟ من النساء المفروض إنهن متعلمات يعنى تمسِك ليها راجل واحد و تعمموا ..على الجميع .. واحد أخطأ .. كل الرجالون خطاؤون .. و خير الخطائيين المتجرسين .. ألف واحد كانوا صاح .. تقول ليك ديل خوافين بس .. لكن جواهم كلو غلط .. وما بجوا إلا بالهرشة .. يا رجال المنبر اتحــــــــــدوا .. اها دا مدخل بس .. جاييييكن .. |
اقتباس:
يادكتورة بيان ......... اقتباس:
|
اقتباس:
لما عايز تعرس ما لبجت الحلة تكوس ليك في واحدة سمحة؟ اوعى تجي تنظر نحنا خابزينكم وعاجنينكم انتو يا الرجالة غلط الجميلة مسموح به لكن لو احدة شينة زينا تخلوها تقول الله ينعل ميتين شناتنا.. في اليوم ميتين مرة.:p:) ياكافي البلا الشينة ما بقيفو ليها في البص ولا بشغلوها ولا بنجحوها ولا بعرسوها.. ولا بشترو منها الشاي...:D:D:p |
رجعنا
طيب نقارن سلوك النساء بسلوك الرجال البتتكلمن عنهم ديل ... ( و ديل قلة .. نعم قلة ..) البعاينو للمرأة الجميلة فقط .. يعنى جميلة وليست ذكية .. ديل زيهن و زي الرجال البرقدوا مع أي واحدة من أجل جسدها .... لا فرق بين الممارستين في مسألة احترام الرجل للمرأة في الحالتين اختلاف مقدار فقط .. زى ما (بعضهم ) مابحترموا المرأة البتمارس من أجل المال أو أى سبب مش كويس .. برضو الجميلة و ممكن يعاين ليها .. يتصبح بيها .. لكن هل يستحملها ، اليوم كلو ؟ الله أعلم .. و العاهرة البترقد مع الراجل من أجل المال فقط .. هل بتحترموا بعد تمارس معاهو وتستلم المعلوم ..؟ أبدا .. إلا اذا كان تفكيرها برضو عاهر .. يعنى .. كلو واحد .. عهر جسدى أو عهر اجتماعي .. عهر فكرى أو عهر في الكتابة .. طيب .. المرأة البتعمل مكياج وهى خارجة ( 99.9999% من النساء ) للعمل أو السوق أو أي مناسبة اجتماعية ليه ما نفس الشكل البتكون فيه في البيت ..؟ من الطلب منها تكون كدا ؟ ما تقولوا الراجل .. هى بتفتّش عن راجل يعاين ليها من برة .. أو يبدأ من هنا .. خارجيا ... يعنى فى أحسن الأحوال شرك .. يعنى النظرة دى ( من الرجل ) تطلبها المرأة ولا يسعى لها الرجل .. بل عودتها له المرأة .. ( دى ما دعوة للقبح أو البشتنة ) طيب الراجل عاوز شكل يتصبح بيهو بعدين ؟ بعد يتصبّح !! باقى اليوم ..!!! يبقى الرجل دا سطحى .. والجميلة فقط سطحية .. والسطحيون للسطحيات .. طيب ما هو مقياس الرجل لما يختار المرأة .. ببساطة .. الراجل عاوز مرأة بالمواصفات التالية : الزولة دى لو اتقفلت معاها خمسين سنة راس بتستحملنى و أستحملها ؟ دا المقياس ..!! نشوف مقاييس المرأة .. حنتفقع ..!! مقاييس مادية أولا .. [overline]قبل ما اتاكي الباب :- [/overline] أنا وصلت لى فهم هام جدا إنو في عقدة ضد الرجل و محاولة لإذلاله واضهادو من بعض نساء المنابر .. دا ما اسلوب قمعى .. الرجال البتتكلموا عنهم ديل (بالجملة).. قاعدين تلقوهم وين ؟؟ [overline]سؤال:[/overline]الزولة الرفضوا يقعدوا معاها دى شينة خلقة و بس ؟ ؟؟؟؟ |
تحية يا نسوان
وبعدين يا رجال (ladies first) ابدأ من قول بيان: كيف يرى الرجل عمل المرأة؟ شوفي في اي بلد بحترم امكانات الناس بعينو بالشهادات والمؤهلات ولكن في السودان عشان اصلا الرجل يتعامل مع المرأة كسمكة زينة عايز يتصابح بيها لا اتفق معك سيدتي مائة في المائة، ففي دراسة أجريت مؤخرا حول بيئة العمل في الولايات المتحدة، اظهرت الدراسة ان فرص الرجل الوسيم أو المرأة الجميلة في الحصول على عمل هى اعلى بكثير من فرص (الشين) أو (الشينة). ولا يتوقف الموضوع حول الحصول على الوظيفة بل يمتد الى الترقيات والحوافر وغيرها، كما أن الرجل طويل القامة أكثر حظا من القصير والمرأة الطويلة والنحيفة بمقاييس الجمال الاوروبية حظها اكبر من البدينة أو القصيرة وذات العيون الزرقاء لها حظوة اكثر من ذات العيون السود ( مع ان شعرائنا ومغنيينا انشقت اكبادهم وقلوبهم من اللوعة بسبب العيون السود) ولا اعتقد ان المرأة عندما تتمكيج وتحاول الظهور باحسن صورة فانها تقصد الرجل فقط بل تقصد المجتمع بشقيه المذكر والمؤنث، وفي كثير من المناسبات التى تكون وقفا على المرأة فان المرأة تقوم بنفس المكيجة واعمال الصيانة دون التفات الى ان الرجل غير موجود، وعلى الرجال الا يصابوا بالغرور ويعتقدوا انهم دوما في البال نفس ما نعيبه على المرأة يقوم به الرجل تجاه المرأة، إذ يكفي وجود امرأة في المكتب أو موقع العمل لتجد ان كثير من مظاهر (البهدلة) التى تمتاز بها المجتمعات الذكورية قد بدأت في التلاشي، سيبدا الذكور في الاعتناء بتسريحة الشعر، وكوي القميص، واستخدام العطر، وتلميع الجزمة، وتغيير الشراب (الجورب) الذي اصبح جزءا لا يتجرأ من القدم نفسها، وتجنب (السفة) امامها..وتبدأ بعض مظاهر الحنكشة في الظهور على (ابو شنب) وفرقته، واذكر اننا في احد الدورات التدريبية(زمان) عملت معنا زميلة أو أخت (اختر ما يناسبك وسيب الباقي) وكانت شينة للغاية ولكن في نهاية الدورة أو الكورس باللغة العربية السودانية اتفق جمعنا نحن الذكور على انها اجمل امراة في الكون، غلبتنا بخفة الدم واللطف والطيبة، وتمكنت من توجيه انظارنا الى حيث يجب ان تكون، نحو الجوهر وليس المظهر.. وهي تجربة لا يمكن ان انساها |
اقتباس:
انه الجوهر هو الاخطر وكلام الطبع المقابل الزي بتاعة اهلنا الشوايقة مقولة بائدة ويعيش سماحة جمل الطين. اذكر زمان اتكونت لجنة سرية رجالية اسمها لجنة رفع المعنويات.. اها من الصباح يمشو للبنات الشينات سلام حباب الافرو يخلو ليك وتحنيك زي دا... بما انه انا كنت البنت الوحيدة في الفصل واسمح واحدة فيهم باي ديفولت وصلني شمار اللجنة دي... وكنت بشفق على الواحدة لما تجي في الداخلية تقول للبنات بكل فخر علان قالي الافرو يخلو ليك.. شوف في الغرب عملو دراسة لقصة اثر الشكل في الترقي الوظيفي ليه نحنا ما نعمل دراسة عن قصة مواصفات العروسة لما يكون العرس بالترتيب او كوسو لي عروسة انا جبتا الشيلة.. ياخي مالو لو علمتو لجنة رفع معنويات للمسنات والحيزبونات الفي البوردات اسعتية راجعة لي من بورد واحد كاتب في العنوان للحيزبونة الشمطاء الناس دي اكلت لحمنا عديل كدا:D:D:D عايزة اقوليك في السودان شكل الراجل ما مهم الراجل عيبو جيبو آآآخ عويقة حارة اكعب من حيبزون وشمطاء موش؟ |
اقتباس:
وبي الزات للرجال مثقفينا البيجيبوها بي الشكل وبكووووون فرحاااان |
اقتباس:
اكيد الشكل المرتب مطلوب وكمان المناسب للوظيفة بتاعتو لكن ماتقول لي انو ماف تميييز بي العكس موجود وحصل معاي وجنبي اكتر من مرة |
اقتباس:
اولا انا ما رئستهم انا البت الوحيدة نصهم وهم بيكرهو يكتبو الجداول كل الشغل البكرهوهو بدوني ليهو وبيقولو لي لانك انتى الصغيرونة واحنا بنعلمك وتانيا ... انت شكلك بتهرش فيني ودا مامن طبعك شوية وبجيك |
اقتباس:
سلامات انت عارفة انا الهرشة دى ما طبعى .. لكن مرات غتيت .. طيب انتى واحدة فى نصهم .. ( وعارفة بت فى نص رجال فى الخليج يعنى شنو؟) مادام انتى مقبولة عندهم !!! هل دا شكلا يعنى انتى مقبولة عندهم شكلا فقط أم ...مضمونا انتى مقبولة الاتنين ( شكلا و مضمونا) .. |
اقتباس:
اول حاجة كل سنة وانت بي خير .... ماعرفت بت في نص رجال الخليج شنو وضح عنى طول عمري انا بنت في نص شباب انا بنت وحيدة لذلك اتعودت على سلوك شبابنا الفي الشغل مقبولة عندهم مضمونا لانو انا قريبة منهم بحب الكورة وبشجع الباسكت اما شكلا دي نقوم نسالهم ليك |
اقتباس:
حا ابدا من حيث انتهيت انت وصفت البت المعاكم انها شينة ودا صدقنى اول تعليق بكون اتعلق عليها ولو مامتزوجة وفي واحد فيكم عجبتو اخلاقها واخدتو الهاشمية وقال يعرسها اتنو بتمسكوهو وتهدوهو وتمسحو ليهو الفكرة دي من مخو .... وتانى قلت تجربة لانها زي شغل الابحاث تتعمل مرة في العمر لكن مابنقدر نطبقها على الوسط المحيط بيهو الترتيب مطلوب والزول المفروض بيهو يعتنى بي حتة الشكل بدون هوس وتسلم على المرور |
اقتباس:
عندنا ود جيرانا انا وهو بنتبادل كراهية مبالغة عرف انو انا مابفهم الكلام المدسدس داااك والزول يقول ليهو كلمتييين الناس تفهمو انا بسطح بقت دي شغلتو كل ما يلاقينى يقعد يبدا معاااي في الكلام المتقاطع دا يا ابدا موضوع وافتح كلام يقوم يسالنى عن حاجة في بداية القصة الحكاية تتلخبط وتجوط وما اعرف ليها راس من قعر في النهاية اخليها عليك الله ماتبقي زي الزول دااا ووقول الكلاااام كلو دكتورة بيان عارفة انا ما عارفة |
اقتباس:
جاااوب انت صحى عرس كدا |
يانسائم ...........
أعتقد أن أسلوبي في الكتابة هو مادام بعيدا عن ماهو مشين (وأسلوب ود جيرانكم كذلك) ملك لنا .....! ربما خلقت اللغة بحرا كيلا يأتينا من يجبرنا على طريقة في الكتابة .. أو التفكير ... أو التعبير .. لكني سأعطيك نصيحة أرجو أن تتعاملي معها بمفهوم (ينظر ويفاد) : اقرئي مداخلتي بعين البصر وشئ من البصيرة ... ربما تكون واضحة وليست كلمات متقاطعة ... أو الصورة والسهم .... |
نسايم
الربطاب ديل اصلهم مشفراتية..ز لكن وين وعلى منو؟ انا قريت في بربر معاهم نفهمها قبل تطير.. الرباطابي زول كول يا عاملات بناتي.. وليكم الاثنين الريد الاكيد... |
اقتباس:
أو : أي عرست كده ،،،، لو الاجابة الفوق دي ماجاتك على الطبطاب |
اقتباس:
حرية التعبير ... التفكير.... الكتابة... الاتجاه... وحتى موطء القدم محفوظ وحق مكفول ونصيحة مقبولة..... |
اقتباس:
وصلت الاجابة |
في حاجة عاوزة اقولها تعليقا علي كلام دكتورة بيان ...
عن الجمال في السودان وهو متعلق بتلات مصطلحااات صفرا وسمينة وشعرها ناعم ولو ما انتى كدا لازم تسعي تزيلي ملامح افريقيتك بي الكريمااات وتخلي البنت كما المسخ ولو انتى خدرا وعاجبك لونك باقي البنات (ولاحظو البنات ) يقنعوك انو دي عوارة ووسخ لازم تجيبي ديانا وومنتجات الكورتيزول تزيلي لونك ومعاها الهوية الافريقية الجميلة ماعارفة احنا ليش بنشوف الجمال بي الصفرة المفتعلة ولانحترم افريقيتنا ونترك لونا الطبيعي مع بعض العناية |
اقتباس:
نسايم ..امكن ما عندى شهادة فى النقد لكن متابعة كتابات انسانة أرى أنها بتكتب كويس ... ممكن يعرّفك بمصدر لغتها ولو واصلت فى متابعتك ..( ولا أريد.. لأنو ماى داعى ) ممكن أعرف الدولة .. اقتباس:
|
اقتباس:
ليك التحايا يانسائم وعبرك الحديث لدوك بيان, الجمال بالجد شغل نسبى صافى, وهو مفاهيم معقدة تتعرض لتحويلات كثيرة تؤثر فيها البيئة ودرجة الوعى , وهى مقاييس تتعدى تقاطيع الوجه لتيمم شطر الجسد ولغته وفاعلية الروح وقدرتها على التواصل والإبتسامة وغيرها من تفاصيل دقيقة يهمل مطالعتها متلقى الجمال التقليدى.. |
اقتباس:
عندك تصريح تكتب الانت عاوزو ومعااك حق اللغة البكتب بيها الزول بتشيير لي صاحبها ايواا انا بنت الخليج وصح انا زملائي الشباب معتبرنى اختهم وهم كانو سناير لي لما كنت طالبة فشغلنا مع بعض كان امتداد لي خوة... |
يا جماعة جمال وأخلاق شنو
كلو حظ وكل فولة ليها كيالا و99.99% من الرجال حظهم جلا هسة الواحد كان بفكر صاح كان شاف ليه حاجة زى دى وعاش فى أمان من الخلق http://www.hantelparty.de/xt/female-bodybuilder.gif |
[QUOTE=رأفت ميلاد;79946]يا جماعة جمال وأخلاق شنو
كلو حظ وكل فولة ليها كيالا و99.99% من الرجال حظهم جلا هسة الواحد كان بفكر صاح كان شاف ليه حاجة زى دى وعاش فى أمان من الخلق انت عااارف انا خفت..... دي جبتها من وين على فكرا دي ما بتنتمى لي جنس حواء دي بقت زي البترقص على السلالم لا تحت لافوق وديل نوعية تانية وبعدين ماف واحدة من جنسنا دا ما بتمتلك جمال كل انثي جميلة .... والله سبحانه خلق الانسان في احسن تقويم |
نسايم
اقتباس:
اقتباس:
:D بوست دسم بالجد مودتى |
[QUOTE=نسايم;80046]
اقتباس:
كل عفنا وليهو شمام :eek: |
اقتباس:
:rolleyes::rolleyes::rolleyes: تشكر ... دا من زوقك |
اقتباس:
كلامك الجميل داااا عاوزة اختم بيهو البوست لانو كلااام الروح ولغة الروووح الشفيفة بتاخدنى وكل من يهمل جانب الشكل ليشدد علي الروح وتفاصيل الجمال الداخلي هو انسان مميز فهو يسمع ما لا يسمعه الناس ويري ما لايراااه الناااس ولن ابالغ ان قلت هووو انسان نااادر فالروح عندي هي ما تجمل وتعطي جمال غير مرئي الا للمؤمنييين فطوووبي لهم الجيلي اظنك منهم فهنيئا لك يا صديق |
| الساعة الآن 12:00 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.