ود مدني
لا حبذا انت يا أم درمان من بلد
أمطرتني نكدا لا زارك المطر محمد الواثق مدني بعيون زائر إيطالي في حدود سنة (1830): ريتشارد هيل مؤرخ أوربي نشر كتاب بعنوان "على تخوم العالم الاسلامي"، الجزء الأول منه عبارة عن مذكرات شخصية لمواطن ايطالي زار السودان في حدود 1830م و وصف مدني بأنها: تقع في منخفض شبة جزيرة سنار على الضفة الغربية للنيل الأزرق. معظم بيوت الأهالي من الطين و القش. تظل مياه الأمطار متجمعة في برك آسنة لمدة طويلة بعد موسم الأمطار (لسؤ التصريف الطبيعي) مما يؤدي لتكاثر البعوض و انتشار الأمراض المعدية. يقوم معظم الأهالي بقضاء حاجتهم على ضفاف النيل... عشان كدة القعاد على الشاطئ بيكون صعب خلاص و خاصة باليل المدينة بصفة عامة قذرة الي حد البشاعة. يعني المدينة التي أسسها الشيخ محمد ود مدني السني قبل مئات السنين من هذا التاريخ يقال عليها إجمالا " قذرة الى حد البشاعة. مما يعني أن المجهود البشري المادي الذي بذل خلال تلك الحقبة ضعيف جدا و غير معنوي. |
بابكر ما وقع لى الكلام دا
الزول دا كان بقعد وين ؟؟؟ شرق توتومادا ؟؟ |
حرام عليك يا خى
انتو بتجيبو الكلام دا من وين ؟ :confused: |
يا بابكر دحين قول الخواجة خلّو إنت قولك شنو فى مدنى؟
|
اقتباس:
لك التحية،، و الله يا معتصم نحن الحجاج ديل ما بنرضى فيهم.. لكن انا ابصم على (كفك) بالعشرة انو الراجل كان قاعد جنب مباني الحكومة الحاليه... اقتباس:
الكلام ده نشرتو دار جامعة الخرطوم للنشر في التمانينات، و هسع نحن دايرين نربطوا بالشواهد الحالية، و نشوف هل في مؤامرة من الخواجة ده حول (سيدة المدائن) و لا لا... اقتباس:
تحياتي لك و الأسرة نرجعك لأيام براعم بانت و فريقكم بتاع حي البان داك (نسيت اسمو).. و كدي اطلع من حي البان و معاك عادل عبشين عصرية بعد موسم الامطار، و باروا السكة حديد من البان لحدي الدرجة و قارن البتشوفو في الطريق مع كلام الخواجة المفتري ده! قولي في مدني بجي ورا... و زي ما بقولوا أولاد بمبه " التول (التقل) ورا" |
المسلمية
عاش الانسان في مدني و حولها طيلة العهد التركي علي نفس المنوال و ان كانت بدأت تظهرآثار المدنية من الاحتكاك بمصر على حياة الناس و بدأت الحركة التجارية تزدهر بعض الشئ.
يحكي الزائر الايطالي قصة طريفة بطلها واحد من وجهاء قرية المسلمية. يقول الايطالي: تلقيت دعوة انا و بعض الزوار الاوربيين الي وليمة بقرية المسلمية... كنا نجلس في بيت مضيفنا في إنتظار الغداء او العشاء على ما أذكر، فاذا بالخدم يأتون بالأكل داخل "قصريات" و انفجر الجميع بالضحك و سط دهشة مضيفنا و بعد ان فرغنا من الطعام، اصر الرجل ان يعرف سبب الضحك و شرحنا له ان هذه الأواني لا تستعمل للطعام انما لغرض اخر، اعتذر الرجل لضيوفه اعتذار شديد و قال ليهم: تعرفوا يا اخوانا السنة دي اول مرة امشي فيها مصر و اشتريت الاواني دي منها، و قدرت انها تصلح بديل للقدح بتاع الخشب و الليلة دي اول مرة نستعملها إكراما لكم... |
اقتباس:
بابكر سلامات.. تخيلت الصورة تماماً.. ولكن رغماً عن كل شئ فالموضوع لا يخلو من شاعرية...بعدين ياخى الإيطالى ده مالو ومال التاريخ...الناس ديل بتاعين بيتزا...مافيا..والناجح فيهم بيلعب فى ميلان:D:D |
ود مدنى فعلا سيده المدائن بى منازع ..
خلاص انا معاكم خلونا نشوف الربط بين الحضارات . و ما بيننا و بين الخواجات .. :p متابعه |
لا يمكن أن يكون الحديث عن تلك الباذخة فينا .. ود مدني .. إلا وكنا بين الحاضرين .. !!
شكرا بابكر عباس .. متابعة مستحقة .. !! تحياتي |
اقتباس:
حضورك و مشاركتك في البوست إضافة ننتظرها... لكن يا طارق حب ناس مدني لمدني ده حقيقي و لا حركات ساكت فكوها فينا ناس مؤتمر الخرييجين؟! |
مدني زمن الفونج
نوقف الكلام شوية عن مدني في التركية و نرجع لزمن الفونج..
نشأت المدينة في عهد مملكة الفونج كأمتداد صوفي لسنار الكانت محمية، و كنتاج طبيعي لازدهار الحركة الصوفية في المنطقة، و نزوح مجموعات كبيرة من الصوفية من شمال و غرب أفريقية في إتجاه النيل الأزرق و الإقامة حول حاضرته سنار. المؤسس هو الشيخ محمد مدني السني حفيد ود دشين (دكين) أحد قضاة الفونج و كان ود دشين مقيما بأربجي و بقولوا جا من الجزيرة العربية عن طريق مصر... المدنيون (أحفاد مدني السني) قاعدين يقولوا هم أحفاد سيدنا علي بن أبي طالب (أشك في ذلك). النشأة الصوفية جعلت المدينة متقدمة روحيا و متخلفة ماديا و النشاط التجاري لم يتجاوز الاحتياجات الأولية للانسان: صناعة مراكب و عناقريب و دباغة الجلود و زراعة البلدات. ما زال طابع النشأة الصوفي بكل أبعاده هو الملمح الاساسي للمدينة.. ما زالت مدني عند الصوفية في السودان تشبه قم عند الشيعة.. و الجمهوريون (الصوفبة الحديثة) بيعتبروا مدني مدينة روحية.. |
اقتباس:
إن شاء الله (بي منازع) دي تكون غلطة مطبعية و تكوني قاصدة (بلا منازع) عشان أطلع من تهمة منازعة مدني السيادة لعموم مدن السودان... |
الحوار الطعن شيخو!
في الوقت الذي كان فيهو الوزير محمد ود عدلان (مستشار السيد الرئيس) يقول لإسماعيل باشا:
"لا يغرنك انتصارك على الجعليين والشايقية، فنحن هنا الملوك وهم الرعية. أما علمت بأن سنار محروسة محمية، بصوارم قواطع هندية، وجياد جرد أدهمية، ورجال صابرين على القتال بكرة وعشية". في الوقت ده ناس مدني كانوا بقولوا لود الباشا: الزول ده جعجاع ساكت... الناس ديل ما عندهم أي حاجة..... و سنار دي غير الكجيك و البطيخ هسع ما فيها التكتح... يا زول انت أقعد رتب حال جيشك عندنا هنا و بنديك حق إقامة قاعدة عسكرية، لكن بعدين ما تنسانا دايرين نبقى العاصمة.. ود الباشا قال ليهم: " ينظر في أمر العاصمة دي، لكن حق الامتياز قبلناهو" |
مدني
اقتباس:
وقول:) الفنان محمد الامين ودمدني هي تلك الرائعه التي درسنا بجامعتها العريقه ذات النهج العلمي المتفرد جامعه الجزيره هي تلك المناره التي تتفتح علي يديها ابناء وطني هي تلك الربوع الخضراء التي تحضن النيل الاذرق بهيجانه وتدفقه هي تلك العروس الهادئه الجميله التي تتوسط تلك الارياف الخضراء في قلب وطننا الحبيب هي تلك............ البوح عن مدينه ودمدني لا ينتهي . هي خمس اعوام قضيتها للدراسه فيها لكنها كانت من ثوابت عمري هي............ انت قولك شنو؟؟؟ دمت بخير |
اقتباس:
تحياتي،، قولي زي قول ود البيك: اقتباس:
|
| الساعة الآن 07:22 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.