البداية..من..النهاية
 

من الحاجات الجذبتني وشجعتني للمشاركه في سودانيات....صديقه اعجبتها مره قصه سردتها فقامت قالت لي يابت..ليه ماتكتبي؟...فا شنو..جاكم بلا...:D

بي صراحه كده انا اللغه العربيه دي بتغلبني جد...ماعاوزه اعجنها واعولقها وانا في منتدي مليان بي اللغويين المتمرسين..علشان كده حا احكي ليكم بالعاميه السودانيه..سهله النطق والهضم...


بسم الله نبدا.....

قبل يومين اتصلت علي ساره...بعد السؤال عن الاحوال..والقيل والقال....ماخلينا ونسه ما اتونسناها..اها بعد كده جا دور الرجال...يعني ما اكضب عليكم...بيلقو جزء ابدا ماساهل في الحوارات النسائيه...بجانب مواضيع الشوفاع, الاكل والبيت طبعا...:D

ومع تعمق الونسه..وسخونه الكلام ....قلت لي ساره..ياخ ديل انانيين شديد..(مع الاعتذار للغنيه وكده)...الراجل بس بفكر في مصلحتو......يعني كامراه وكده ما اتخيلت ساره تخالفيني الراي...بس لقيتها بتقول لي....مابس الرجال.....وحكت ساره....


احمد ابن خالتها اتزوج خارج السودان..من اميره.. السودانيه الجميله المتدينه..اتربت مع والدتها بعد وفات والدها....ودردقت في الدنيا دي لغايه ما بدات حياتها الاسريه مع احمد....عاش الاتنين خارج السودان....مشكلتهم يمكن كانت الحنيه الشديده للسودان..يعني ما اي زول يغترب قلبو بموت.....بقو يرجعو السودان كم شهر...ولمن تسخن معاهم العيشه..يهربو تاني للبلد الجو منها.....اخبارهم تنقطع مده...وتاني يرجعو يطفحو في الوش....دامت الحياه علي نفس الطريقه عشره سنوات...وبعديها كانت اطول مده قضوها في السودان..تمنيه شهور.....احمد واميره كل واحد قاعد في بيت اهلو...الشمار حرق الجماعه...وبدو يتساؤلو..في شنو؟..وليه ماعايشين مع بعض؟...اميره مامحننه لي؟....وكل واحد يسوط بي جهه....في النهايه وزي ماحا تكون استنتجت.....طلعو منفصلين...قبل رجوعهم السودان....

دقيييقه ..القصه ياداب بدت.......

الاهل يا داب كده بدو يستوعبو قصه الطلاق دي..وبحاولو بي شتا السبل لم شمل العائله....اربعه عيال ..يومين مع ابوهم...ويومين مع وامهم....تجي الصدمه التانيه نابله.......اميره عقدها كان امبارح....منو؟..وكيف؟....وليه؟....احمد مافهم حاجه..اتصدم..وزعل لما اتبلم........اتصل احمد علي اميره..بعد ما الامور هدات شويه..عاوز يشوف مصير اولادو شنو...وطبعا مبدا انهم يتربو مع راجل غريب ده ابدا ما مقبول.....

يومين مرت ومافي اي تلفون من اميره...وجات الصدمه التالته..تلفون من اميره..وين انتي؟....شالت عيالها وهربت بيهم البلد الجات منو؟؟؟؟؟..وتاني ولا خبر ولا اتر....

طيب...ممكن ناس يقولو دي انانيه بحته من الام....وممكن تانيين يقولو لا..دي امومه وخوف علي فقدان عيالها...وبرضو ممكن يجي البقول....العرفكم شنو؟...يمكن الاب هو المشكله.....وفي النهايه انا بجي واقول..مابتقدر نحكم علي اميره من تصرفاتها بس...لازم الخلفيه كمان تكون معروفه.....والخلفيه دي بعرفوها اتنين بس..احمد و اميره


.......
.

اها يا ان يعني نتظر احمد واميره عشان نشوف الخلفيه وبعدين نحكم والا الراي شنو؟:D

شكلنا كده يا خرافي تصدق.:D

يعني قدر مانقول ويقولو....في النهايه نحن ماعشنا معاهم وماعرفنا ليه هي او هو عملو العملوهو....غايتو الجماعه بي هناك شايلين حالها ....وانا ماعارفه الوجعهم اكتر شنو؟....عرسها تاني ولا سرقتها للاولاد؟..شايف شنو انت؟

اوافقك الراي مليون في الميه...والاولاد مصلحتهم فوق كل شي..



(بيني وبينك..والله ماعندي ايتها موضوع..بس قولتا اونسكم بي اي شي واتخارج
:D)
كيف البدايه كانت؟..goood

تشرح الالب:D

:D:D


الالب دي شنو يا خرافي؟
:confused:

جبال كدا جنب الاستوب:D:D:D

الاستوب بتاع شارع الستين؟
:D:D:D

اللونو اخضر داك:D:D وتبارني يا ان بفتل ليك ابوه

انت يعني لسه مافتلتو؟

زي مابقول الشاعر..ياخي تخخخخخ

:D

قصص واقعيه معاكم زاتو مادايره

عارف يا ود الشريف..مايغرك الشكل والاسم
انا امدرمانيه خورعمريه..لعبت الحجله وكمبلت..صج وشليل...لاكن ام حفر دي ابدا مالاقتني..ام حفر دي شنو؟
:confused:

دقيقه......كمبلت شنو البي علبه الصلصه؟....غايتو كمبلتنا كانت بي الشورابات القديمه..والحمد لله بتكون مغسله .:D...يعني ام حفر من حفره ماخوذه..والله اعلم

تشكر علي التوضيح
:)