من أفواه البسطاء - لا المجانين - خذوها
 

الحكمة

على افواه البسطاء من الناس تجري الحكمة والراي السديد
والعبارة الحراقة ، تلك التي تختصر كلاما كثيرا ،
ساحاول هنا ايراد نماذج من عبارات فخيمة وحكيمة
وغريبة ......
قالها الشعب ذات مناسبة .

- 1 -
( الدنيا بخير طالما البقالات مفتوحة )
هكذا عبر صديقنا حافظ وقد كاد ان يهزمنا شر الجوع ،
حنِّك صاحب البقالة الذي طالما تاخرنا معه في السداد ،
ياعم الكاش في الطريق وبس عاوزين عدس
وبعد فترة صمت
وماجي ....

- 2 -

( ان شاء الله بيت مال )

عثمان العيص مباركا لنا زواج احدى قريباتنا
وهي تفعلها للمرة الاولى وقد شارفت الستين ....
وقد علقت عوضية التي هي اربعينية ولم تتزوج بعد :-
غايتو نحن بعد ما عرسو فلانة -وقد سمتها- ما بنقنع تب من العرس

-3 -


( البنوت كلهن لقيناهن ابكن الا نفيسة بت الماحي لقيناها تاكل ليها في بتيخ )

مريم اختي تحكي لنا بعد لفة في الحلة -مع بعض الجارات- على البنات اللاتي لم يتوفقن
في امتحانات الشهادة السودانية ذات مارس ماسك كتف ابريل

- 4 -

( هوي يا نسوان جيبوا لينا شطة )

هكذا نادت نفيسة بت الماحي وهي تطلب المقبلات في اليوم الاول من عزاء والدها ...

- 5 -
( غلطان ثم غلطان )

يقصد الزوج
هكذا يُعلق عمي الشيخ بمجرد سماعه ان احدهم طلِّق زوجته .

- 6 -

( طَقِشْ ولَّ مو طَقِشْ ااالسر اااخوي )

عمنا بركات ود الجبل يختم اخباره لصديقه السر بعقد قران واحد من الشباب على احدى الحسناوات بعد ان طلق بنات اعمامها الاثنين ولم يدخل بهما ،
العريس ليس له علاقة قرابة مع بنات الاخوان التلاتة من اي جهة ،
بالله طقش ول مو طقش ...

عبدو منصور شكرا لمرورك الكريم ،
هو زولك دا النائم لها شنو ، مفروض يظل سهران حتى يمر يومه مرهقا كالعادة وبلا مفاجاءات ،
الشعب دا دائما عباراته ذكية وساخرة ولماحة وملعوبة في التمانيات ،
يعيش الشعب تسقط الحكومة ....

الكتراااااااااااااابة ... الجماعة ديل ماواحد!!!!!

- 7 -
( صدرها انتفاضة وخصرها اضيق من افق برجوازي صغير )

صديقي اليساري عنكبة يعبر ، في لحظة اندياح في جلسة انس وخاصة ...

ها ناس سودانيات
هوووووووووووووووووووووووووووووي

أنا مكسّر في "نفيسة بت الماحي":eek::eek:


عبدالمنعم:

سلامات
وكان الله هوّن بجيك راجع

طارق الامير كيف انك ،
لعلك بخير وكل الاسرة التي قرَّبت ،
عارف الكلام الحكيم ذاتو خشم بيوت وخاصة لو ارتبط بجانب الظرف واللطافة
ومنها ديس ومنها ساكي - والسطر الاخير لناس الهارت -
منتظرين بعض احاديثك التي قطعا من بيت الكلاوي ،
وتسلم