I Am Slave... أنا عبده
 

بمحض الصدفه عترته فى الفيلم الأنجليزى (أنا عبده) وهو حسب ويكبيديا:
I Am Slave is a 2010 television film produced for Channel 4 on the story of one woman's fight for freedom from modern-day slavery. It premiered on Channel 4 on 30 August 2010. The movie is mostly based on Mende Nazer a British author, human rights activist and a former slave in Sudan.
لو فى زول عندو كتابات سودانيه اتكتبت عن أو حول الفيلم دا ياريت يلحقنى بيها قبل مااكون رأى حول معالجة الفيلم لرق العصر الحديث فى السودان .. من المفترض انو يكون أثار حفيظة الكثيرين ..
لفت انتباهى برضو أغنية الفنان عبد العزيز المبارك (صبرنا كتير على الأشواق) المستخدمه كخلفيه فى بعض المشاهد بصوت أنثوى سودانى ومعاها أغنيات اخرى ماعرفتها ..

الجيلى تحاياى ياخى ..اخوك طبعا ماعندو حديده .. الفيلم دا بيخلى جواك حاجه داير تكتبا وتكبتا فى آن ..

سلام علي
عندي بوست هنا عن الفلم في سودانيات
قابلت الشابة صاحبة القصة شخصيا
وهو برضو اتعمل مسرحية وو بزنس تاني كتيرlooool
تحياتي

ياأمال ازيك ونهاراتك لُطاف ..
الحقينى باللنك ..كميه من الأسئله فى راسى ..الزوله المبدعه دى ليه سحنتا أقرب لجنوب السودان من جبال النوبه .. وفكرة العمل نفسو وتنفيذو ..وإشكالات اللغه ..البطله بتتحدث بعجميه فصيحه شديد بتخليها أقرب لى انها مولوده فى لندن .. زد على كده انها بتمثل بطريقه احترافيه ماشكلو دا أول عمل ليها ..معليش ربما يكون العمل مشهور جدا بس انا دااااااااابى لميت فيهو

اولا البطلة فعلا ممثلة محترفة
يعني هي ماصاحبة القصة الحقيقية
اسمها ماندي علي مااعتقد
وبالمناسبة القصة عبارة عن كيس لجؤ تحول لبزنس
وفيه خيال اكتر من اللازم
بكوس ليك اللكنك

على حسب الفيلم انها أٌخذت بالقوه .. وفعلا برغم ان فكرة الفيلم بتمس قضيه عرقيه شائكه لكن التأليف والإخراج ماكان مهتم شديد فخلاها زى حكايا الف ليله وليله ..فى انتظارك

تعرف يا ماجد قصة بشاعة دارفور والحرب الضروس جعلت أى حاجة ممكن .. الحاجة الما عارفنها السودانيين حجم السمعة بتاعتم برة .. الناس ما قادرة تفكر فى شكلهم شنو ورئيسم مطلوب فى المحكمة الدولية .. عشان كدة قصة ما معقولة زى دى بقت معقولة فى أذهان الناس الما بعرفونا ..

تتصور قبل مدة قصيرة بتفرج فى فلم بتاع آكشن كده ما عندو موضوع .. عصابات ومخدرات ونوع الكتل البجملة داك .. الجماعة فى حضرة بائع سلاح والمخدرات والسكر مدور وبنات الأستربتيز ديلاك .. تاجر السلاح طلع ليك مدفع عملاق كده فيهو مليون خرم .. الجماعة شهقو من التعجب .. قال ليهم (تحصلت عليهو من جيش السودان فى دارفور) :D:D و أسم المدفع خليه ساكت :p

هههههه ياميلاد سلامات ومشتاقين
عارف بيرمو كليمات كده كتيره فى الافلام مابتتبلع ..طوالى بقت تلاقينى أظننا والحمد لله وصلنا العالميه ..
انا موقن انو زى هنا برضو العالم فيهو المهتم ومتابع وفارز وفيهو البيسمع من طرف ويتم الباقى خيال .. المهم جدا أنو فى قضايا عادله جدا بتنساق فى الطريق الغلط وفى طرق غلط بتتلبس القضايا العادله ودا مابيفرزو الا حصيف من الاعاجم اللى مفترض انهم انجض من العوالم التالته ومتلته دى ..اها الحصيف دا بيكون عارف انو فى تلاته شعوب سودانيه ..شعب بتتكلم عنو الإنقاذ ..وشعب معلم بتاع ابو اللمين داك وشعب بتتكلم عنو حركات التحرر ..نحنه ياتو فيهم ماعارف ؟..