لهفي عليك...
ياالرُحْتَ في دربا طويييل
ما سُقْتَ زول يَبْراك هناك
بَارِيْت حَفِيفَ النَّسمَة
في الدَّغُشَ البهيم رَوَّحْ بَراك
ما شلتَ همْ سفراً بعيد
لا قلتَ مِين للفُوْت هداك
لهفي عليك...
ياالشلتَ أوتارَ الفَرَح
مِنْ عُوْد حياةَ الناس مَعاك
صلّيْت عَلي قِبْلَةْ وَدَار
مُتوضِّي من مَيعة صِبَاك
وَرَاكَ فاض بالناس حنين
حيارى ساهين دون حراك
اتهدّ حِيلْ كُلَّ البُيُوت
حَزْنَانَة ليْكَ هَمَدت بَلاك
كل العيون مليانة دم
وَرْمَانَة من كَتَرَة بكاك
لهفي عليك...
ياريت لوِ استنّيت شويَّة
ماالثواني بتبقا سنوات في حَوَاك
العمر من بَعَدَك عَدَم
والدنيا من دونك هلاك
واللقمة جوة الجوف بتسال
كيف يعيشوا الناس وراك
لهفي عليك...
ذكراك زي الغيمة راشة
وبالقلم يكتب ملاك
ياريت تزور دنيانا يوم
ياالمفتوحة ليك ابواب سماك

عادل عسوم