كسروا زجاج الحافلة.... حدث في الخرطوم
سلام ليكم كلكم/ن
حدث في حافلة بالخرطوم قادمة من بري باتجاه السوق العربي، كنت راكب في حافلة اخرى غير الحدث فيها الحادث، هنااااااااااااااااك في تحت الكبري كانت في زحمة شديدة جدا، والحافلات والعربات متراصة كده جنب بعض، في الحافلة التي تقف إلى جوار الحافلة التي استقلها وفي الكرسي بتاع الاثنين( انا جالس في ابو واحد) قصادي طوالي جلست بنت بجانب الشباك، وفي نفس الكرسي بتاعها جلس واحد من الرجال، والكرسي الذي أمامها مباشرة جلس واحد بجانب الشباك، وبجانبه آخر، والشباك مفتوح مناصفة بينهم الاثنين- يعني بين البنت والرجل الذي أمامها، قووووم انت يا الرجل الجنب البنت مد يدك للشباك وافتحه على الآخر، يعني قفل الشباك بتاع الراجل القدامهم ، الرجل فتح الشباك مناصفة بينهم، تاني قووووم انت القاعد جنب البنت وافتح الشباك للآخر، وتاني الراجل فتح الشباك مناصفة بينهم،تالت مرة قوم انت يا الراجل القاعد جنب البنت افتح الشباك للآخر، المرة دي الراجل القدامهم فتح الشباك من ناحيته للآخر، قوم انت ياالقاعد جنب البنت وافتح الشباك بعنف للآخر طااااااااااخ كسر الزجاج .... والعكة حصلت .. في تلك اللحظة تحركت العربات وما عرفت المعركة انتهت بي شنو... بس يا جماعة الخير ده يسموه شنو؟؟؟؟؟؟؟؟؟؟؟؟؟؟؟ |
دي حاجه بسييييييييييييييييييييييييييييييييييييطه مما يحدث في خرطوم السجم والرماد ... والرماد كال حماد ... والرماده دي في خشومنا ...
الخرطوم هذه القرية الكبري ... هذا الريف الممتد .... هذا المرعي الكبير ... ماذا تعتقد حال الناس بها ؟؟ .............. وطن بلا أخلاق بلاعلم بلا تربية بلا مفاهيم حب وإنسانية ماذا تنتظر منه ؟؟ |
اقتباس:
الخاصة ... زهج , سخانة , قرف من اى شئ حتى من انفسهم .... ربنا يلهم الصبر للجميع .... |
العزيز ناصر
تحياتي وشكري الشديدين ليك صحيح خرطوم السجم والرماد، الرماد كالنا كلنا، في هذه القرية الكبيرة والسودان الواسع، سودان ضيق وهم وقرف وبرضو بترول فلوج منتصف ديسمبرّ!!!! والله ( دي سمبر عديل) يقينا سمبر وغرانيق، وما معروف حنبقي ايه كمان تاني؟؟؟؟ |
الرائع قارسيا
الف تحية صحيح الوضع مقرف، و البلد يزهج، وفوق ده كله سخانة حتى في عز الشتاء... تعرف السودان برغم طيبة اهله وما يتمتعون به من خصال حميده وسجايا طيبة قل أن تجد مثلها إلا أنني بدأت اعتقد حقيقة في أن دعوة سيدنا ابراهيم لحقتنا، بالطبع الدعوة كانت لبلاد الجزيرة العربية لكن الناس قالوا لمن رفع يديه إلى السماء ودعا بالخير لذلك البلد كان يعطي ظهره للسودان، ورغم كده خير السودان كثير لأن الدعوة بتكون لحقته فعلا لكن مسالة الظهر دي يظهر هي الجايبة لينا ناس وحكام بيدو اهل السودان ظهرهم رغم خيره الكثير...... وربنا يلهمنا الصبر |
| الساعة الآن 01:29 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.