أسرار الرومى – ماجدة بابكر
السيدة فيروز طبعا، مدرسة متفردة فى كل شئ، فى الأداء وفى طريقة الغناء والتطريب، بداية بالحضور والوقفة وإنتهاءا بصوت الملائكة العجيب.
إنتهت، عمليا يعنى، مرحلة عاصى ومنصور الرحبانى وفيلمون وهبى وإيلى شويرى، وبدت مرحلة زياد الرحبانى مع فيروز، مع أمه، وبرضو تواصل التفرد وإن كان فى طعم ومذاق مختلف. خفنا، نحن المبتلين بى الغناء السمح الما عادى، وختينا إيدينا الإتنين فى قلبنا وقلنا خلاص، شويه كده وتتوقف الإبداعات الفيروزية السماوية، لكين الله دائما كريم وما بنسانا. وجاتنا بنت "حليم الرومى" شايله معاها طعم موية الجبل وخضرة الأرز ونسمات البقاع، جات "ماجدة الرومى" وجانا معاها فيض غامر من الغناء المتفرد والأداء العجيب والصوت الأوبرالى والحضور المحترم، المحترم جدا، وتانى إتأكدنا إنه الله ما ناسينا، وأكيد ما حينسانا ده فى الغناء البرانى أما فى الغناء الجوانى حصل لينا نفس الشى بعد ما "حنان النيل" قالت خلاص، "نو مور مارفلس آند تشارمنج كرييشن" وقلنا خلاص نسد إضنينا ونعلن الصوم من السمع والطرب العالى السامى، لكين برضو الله كريم، وما فقدنا الأمل وفجأة جادت السماء بالغيث والمدد الإلهى، وفتحت الملائكة خزائن "أسرار" الصوت وكنوز الطرب الثمين. جاتنا "اسرار بابكر" ويا ربى ليك الحمد والشكر على نعمك الما بتنتهى، ياخ نحن محظوظين والله نعيش فى زمن فيهو كل الجمال والألق ده، يا ربى ليك الحمد والشكر يوم الجمعة الفاتت، يا داب لميت فى ألبوم "اسرار بابكر" الجديد "راحت عليك" وبركة الما راحت على، كنت أنا ذاتى رحت أول ما يلفت النظر فى الألبوم الجديد، هو الأثر الظاهر فى توظيف صوت اسرار بى طريقة جديدة، ودى ميزة الشى لما يبقى مجيه ومميز، وضح الأثر الأكاديمى وبدت الدراسة العلمية الصحيحة تأتى أكلها "مدات" الصوت بقى فيها شبه كبير بى مدات صوت ماجدة الرومى، وليه لا، زيادة الجمال جمالين، وزيادة الخير مليون خير، هو نحن لاقين بالله. أكيد طبعا التشبيه هنا بى طريقة أداء ماجدة الرومى ما فيهو تقليل من صوت وطريقة أداء اسرار، بقدر ما فيهو إعلاء لشأن الجمال وفرح عارم تفتح ورود اكتر وفوح عبير أزيد، هو نحن لاقين ؟ ومجموعة الأغنيات، باقة منمقة وزاهية ونضيرة، الحقيبة تشع بريق كالعادة، من أبو صلاح وهلاله الما نظر غيره لحدى الأغنيات التانيات، والأغنيات الجديدة قمة فى الذوق فى الإختيار وألحان مموسقة بديعة جدا وموزعة موسيقيا بى طريقة سلسة وحلوة، وده موضوع تانى عايز تفصيل. إن شاء الله يا اسرار تسعدى وتطيبى وتلقى الدايراهو فى مرادك، زى ما اسعدتينا و "صحيتى فى قلوبنا الوجود ورجعتى لى عيونا النهار" نهار الغناء السمح ووجود الطرب العالى السامى |
الله ...يامطر هو غيث .. اللحون المباركة لا محالة مغرقنا و ... ليكون للقرءاة طعم خاص ومزاج مسكون بخضرة الارز ونقاء الجبل ياخالد ياعزيز جدا ياحاج فيروز " سلملي عليه ... بوسي عينيه ..." واي حاجة لاسرار بابكر ريثما نشحذ حبرنا ونسكتب الغيم لنهطل كما ...المطر ...! .... ... |
اباذر يا مطر
طبعا اصبتني في اكثر من مقتل ما عارف اجيك من فيروز ولا ماجدة ولا اسرار؟ فاكبر مكتبة غنائية لدي هي الى فيروز وامتلك اكثر من 336 اغنية وتسجيل مختلف لها؟ ماجدة واغلب واجود تسجيلاتها. اما قولك: اقتباس:
وسوداميزاونلاين عندما قلت: اقتباس:
اسرار بابكر وسر الغناء ودي لك وتحياتي اباذر وتحياتي الى الاستاذة والاخت المبدعة اشراق |
الالبوم هدية لكم
1- كم نظرنا هلال 2- اكتبلي يا غالي الحروف 3- راحت عليك 4- ميل وعرج 5- يازمن وقف شوية 6- صباحك مالو 7- تخاصم يوم 8- ست البنات [rams]http://www.sudaneseonline.com/video/asrar-nzrna.wma[/rams] [media]http://www.sudaneseonline.com/video/asrar-nzrna.wma[/media] |
لكل المتداخلين
لمن الصدف الحلوه الحلوه ان ادخل سودانيات وانا من على الجهاز استمع الان الى اسرار بابكر واجد كم تتوهونا من فيروز الى ماجده الرومى الى سماوات هناك فى اقاصى الزمن ... المده فى صوت اسرار ... بأفراحنا .. باشواقنا ويلهفة محبتنا ... يا الله يا الله ... اارهقنى صوتها وادائها واجبرتنى ان اداوم الاستماع اليها مرات ومرات وكأنى مازلت فى البدايه .. وبعالى الحب أقول أننى أدمنت صوتها .. لكم الحب ولها متاهة هيامنا لحظة تصدح وتسلبنا الاراده |
اقتباس:
آميييين لم تدع لي مجالآ للإضافة فصوت و أداء أسرار كإسمها تمامآ لي تسجيل أحضرته صديقة من حلقة النيل الأزرق التي تشارك فيها أسرار مع عاصم البنا و آخرين في بعض الأغنيات أتوقف لأستمع لها مرارآ بترجيع السي دي عدة مرات لأن صوت أسرار فيها يتسحق الإستماع و التأمل عبدالله وداعة... كيف أشكرك يا عزيز؟؟ قمت بإنزال كل الأغاني عندي فلك مني أجمي باقة ورد تشكر أباذر على فتح هذا الباب |
[align=justify]فيروز بت الرحبانية .... اسرار بت الفنان بابكر ... كانت ترجمة لجينات والدها التى استقرت فى وجدانها ... وصاغته لنا صوتا ساحرا ومستدعيا لايام جميلة .... وتتسع مساحات النصف الحلو فى الغناء السودانى ... واسرار محطة هامة ... اوحت بقدوم مزيد من المطربات الجميلات ... كعافية حسن والبقية تأتى ....
يديكم العافية ابو ذر ووداعة [/align] |
صباح النغم
وتحايا مدوزنة للناس السمحين إشراق ضرار عبد الله وداعة صلاح نعمان حنينة طاهر بدر وتقدير وفير وشكر كتير للزول افنان عبد الله وداعة على تزيين وجه الكلام بنضار الأسرار وإمتنان جزيل لكل الناس الذواقين، على المشاركة فى الإحتفاء بأسرار البديعة ولى حين العودة بالتفصيل ارقدو سعادة وعافية وطيبة |
ولاننا يامطر مبتلون مبتلون بذاك الغناء السمح وبالصوت الاسطورة اقرا هذا " " ليست مغنية عادية ، أنها صوت الراحة الوحيد وسط الشقاء العربي، عزاء وسلوى وحب وشجن وسط ضجيج عالم لم يكف عن التقاتل بسبب او بدون سبب . رافقتنا نغمات صوتها من براءة الصبا ، الي قسوة النضج ، تغنت باحلام المجد العربي، وبكت لمدننا الضائعة وارواحنا المنكسرة وفي كل هذا حافظت علي صوتها حارا ومتدفقا وعلي غنائها قويا وعفويا . كانت اشبه بشريان للحياة لم تعكره الصراعات العربية ولا الهزائم المتاوالية . ظل ساميا وشاديا وسط عالم تسوده الفوض والعشوائية . هذه هي قيمة صوت فيروز الحقيقية انها علت بنا وبالارض التي نعيش عليها حتى تخيلنا انه يمكن ملامسة النجوم . انه سحر الغناء والذي لم تقدر عليه ساحرة اخرى مثل فيروز لاشئ يدل علي لبنان مثل صوت فيروز وليس هناك من يحي الذاكرة ويبعث الاشواق ويثير الشجن في النفس مثل صوتها صوت من حنين وذكريات " فيروز سفيرة النجوم "مجلة العربي" – يونيو 2007 ملف العدد .. ... |
| الساعة الآن 02:52 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.