عثمان طه .. شخصيه امدرمانيه اسطوريه .
_____
فى احد كتاباتى ذكرت عثمان طه فناشدنى الاديب السفير جمال محمد ابراهيم بالكتابه عن عثمان طه . ولقد تطرقت فى كتابى حكاوى امدرمان لعثمان طه . وصديقه الحميم ابراهيم ذكى . وعندما اعدنا طباعه كتاب حكاوى امدرمان . اوكلت اخى الغالى هلال زاهر سرور . بالاشراف على الكتاب . وقام مشكورا بالتعليق على بعض الشخصيات . وهذا هو تعليقه عن عثمان طه .! (((كان عثمان ابنً للعم طه ووالدته جروسه يزين وجهيهما شلوخ الشايقية , و كان هو الأبن الأكبر لأخوته جفعر و علي و عبد الله , و كان والدهم عربجي و كذلك عثمان و جعفر , و أما على فقد كان مصرفياً و قد أرتقى إلى نائب مدير بنك باركليز و الذي تغير أسمه بعد تأميمه في أول عهد مايو إلى بنك الدولة و التجارة الخارجية ثم تغير الأسم مرة أخرى إلى بنك الخرطوم الحالي . أما الأبن الأصغر عبد الله فعمل موظفاً لمصلحة المخازن و المهمات . كانوا يسكنون في حلتنا فريق ريد مستأجرين حجرتين و برنده من منزل الخالة خديجة بت البيه في الزقاق خلف منزل عقباوي و إمام الباب الخلفي لمنزل العم عبد القادر مرسال والد الشاعر عبد النبي و جد اللواء ناجي عبد القادر . كان عثمان بلطجي و فتوه و مثله أخوه جعفر و الذي مات مقتولاً في مشاجرة كما أذكر و كان عثمان و إبراهيم زكي و إبراهيم زكي صديقان لا يفترقان ليلاً أو نهاراً و أقتنى عثمان عربة تاكسي و لكنها تحطمت في حادث , و بعد ذلك أعتزل العمل و أكتفى بفرض أتاوات على الموظفين و معارفه ( بالذوق ) و كانوا يعطونه عن طيب خاطر أو عن خشية . أما إبراهيم زكي فقد عمل صرافاً – كيف لا أدري ؟! – ووقع في شر أعماله و أختلس مبلغاً مهولاً في ذلك الوقت على النحو الذي ذكرته في كتابك . و يروى عن مختلس آخر و لعله إبراهيم زكي نفسه , عندما سأله المراجع عن سر البصمات في كشف المواهي للأشخاص الوهميين و التي أحتار المراجع في تكييفها . فأجابه بأنه كان يبصم برأس عضوه التناسلي () ! .................................................. ....................................... فى بدايه الثمانينات كنت اجلس فى سرادق عزاء امام منزل آل الفيل فى فريق السروجيه . والحى على بعد خطوات جنوب قبه الشيخ البدوى . فلمحنى عثمان طه وانا اجلس بين توام الروح بله جيلانى ابراهيم كتبه الرشيد احمد دفع الله الفيل واشقائه اسماعيل احمد ومأمون , فاتجه نحونا وسلم على . وقال بصوت آمر هات .. وكما اوردت فى كتاب امدرمان كانت تلك من اسعد لحظات حياتى . وكان هذا بالنسبه لى شرف تمنيته وانتظرته . وهى شهاده بأننى امدرمانى استحق شرف الطلب . وعندما سأله مامون دفع الله الفيل انت من بعيد عرفت كيف انو شوقي ده عايش بره. فقال عثمان طه ما ظاهر على من شكلو ولبسو فقال مامون ما في ناس كتيرين هنا عايشين بره. ومامون كان كذلك يعيش في السعودية وضحك عثمان طه وقال من شكلو واضح عليهو لسة واصل جديد وما اتقلى وبقى يصر وشو. كلها ايام والمغترب بنقلي وقروشو بتروح. اول مره اصطدم بعثمان طه كان عندما كنت فى الثالثه او الرابعه عشر . وكان هذا امام الطابيه . وكنت اشاهد عثمان طه وكثير من اهل المورده والعباسيه . يحضرون والبشكير على كتفهم . ويقومون بالاستحمام فى النيل . ثم يجلس الناس للمؤانسه بعد الحمام . وصرت فيما بعد من اكبر المدمنين لهذه العادة . وكنت احضر ومعى الرماى والنشاله لصيد السمك . واشتبكت فى مشاده مع اثنين من اولاد المورده . واكتفى عثمان طه بان ذجرهم . فانصرف الاولاد بطاعه كامله . وعندما ترددت انا , قال لى غور . وواصل دعك جسمه بصابونه اللوكس . وهذا يعنى ان الامر منتهى وليس مفتوحاً للنقاش . فانصرفت كذلك . وصار يحيينى بعدها . عثمان طه كان مالك لسياره تاكس وعنما ارادت شركه متشيل كوتس ضامنا . سمعت ان الضامنين كانا عبد الله خليل والزعيم الازهرى . والاثنين كانا اول رئيسين للوزاره . وقد يبدو هذا غريبا للجيل الحالى . ولكن اللواء حمد النيل ضيف الله رئيس الجيش السودانى . والرجل الذى واجه الفريق عبود فى اكتوبر وطالبه بالتنحى له ابن اسمه عثمان طه . ولعثمان طه ابن اسمه حمد النيل . عثمان طه كان من اكثر السودانيين اناقه ونظافه . فحتى عندما انعدم صابون اللوكس , عندما اوقف عبد الله خليل استيراد بعض السلع الكماليه . كان عثمان طه يحضر ومعه صابونه لوكس يستهلك اكثرها على جسمه ويترك البقيه للآخرين . وبجانب المعلم قدوره الذى كان معلماً فى قهوه شديد وقهوه العربى ومقاهى اخرى . لا اذكر من كان يهتم بالنظافه مثل عثمان طه . وكان عثمان طه كريما لابعد حد . لا يحتفظ بالمال ولا يهتم . ويعطى آخر مليم فى جيبه لاى انسان . ولم يكن هنالك باب فى امدرمان لا ينفتح امام عثمان طه . ولم يكن هنالك من يجرؤ على ان يرد له طلبه . وكان يطوف كل الوزارات والمصالح خاصة اول الشهر في احدى المرات قدم له صديقي ابورزقه (عبدالرازق اسحق) خمسين قرشا فقال محتدا لا ابورزقة جيب خمسين قرش تاني عشان تكمل جنيه وكت ما بتقدرو تدفعو بتتسلفو ليه. فدفع ابورزقه صاغرا. الا انه سأل عثمان طه في ما بعد كيف تحرجني قدام زملائي. فقال عثمان طه مباشرة .. وكيف تقبل تحرجني انا عثمان طه تديني قدام زملائك خمسين قرش. عثمان طه كان صديقا لعبد العزيز حلاق الموردة المشهور وصديق عثمان طه. شامبي كان من اكثر ابناء الموردة شياكة وكان له جسما رياضيا. وهو اول من شاهدت يرتدي فنيلة الشبكة تحت قميص النايلون وله لحية صغيرة بالرغم من صغر سنه..وكان كثير من ابناء الموردة يقلدونه. وفي عملية مناكفة وفي قهوة ابضهير قال عثمان طه انه لم يرتدي ابدا في حياته ابدا الدمورية. وانه لا يسمح لخياطه بان يضع الدمورية في كمر وجيوب بناطلينه. وانه لا يقبل باي شيء اقل من الدبلان. فقال شامبي انه لا يلبس الدبلان ابدا وان لباساته بوبلين وكشف عن لباس بوبلين. فصرخ عثمان طه( تااااااكسي)وطبعا لم يكن يدفع للتاكسي وذهب للسوق الكبير ورجع بعد ساعة وهو يرتدي لباس سكروته. وقال لشامبي بعد ده شوف ليك قماش احسن من ده. ليس الغريب شراء لباس او سروال سكروته ولكن المحير كيف اجبر عثمان الخياط لخياطة ذلك السروال بتلك السرعة.. عثمان طه كان يدخل دار الرياضة بدون ان يدفع وكأنه داخل بيته. ويتنقل بين كل المصاطب حتى المنطقة الغربية المعروفة بالكنب حيث يدفع الناس ثلاث مرات السعر العادي. الذي هو خمسة قروش في الماتشات الكبيرة وثلاثة قروش في الماتشات العادية و15 قرش للكنب. عثمان طه كان يناكف الجميع وهو موردابي على السكين. وعندما يظهر بأناقته وشياكته يقوم مشجعي المريخ بالصراخ ..هرد...هرد..هرد.وهذا صوت يطلقه العربجي لحث حصانه على السير..او كانوا ينادونه بأرقام معينة مثل 46 ..46 وهذا كان رقم سيارة المرسيدس اللتي تخص صديقه اللواء حمدالنيل ضيف الله الذي كان يوصل عثمان طه للكورة وينطلق لامر هام. حساسية المريخاب من عثمان طه ان بعض كبار المريخاب لم يكن يدفعون. وفي برنامج اذاعة على الهواء تحدث عثمان طه عن دار الرياضة والفرق قديما وتجاهل ذكر المريخ وعندما استفسر المذيع عن سبب تجاهل المريخ قال عثمان طه (اكرهو واكره دينو)..عثمان طه كانت عندهو كلمات وتعبيرات في التشجيع في الكورة. فكان يصرخ شغل هلالك..اديهو المصطبة والكدايس..فلان الكدارة زمان كانت تذود بمصاطب وكدايس لان اللعب على التراب فالقصد كان هو دوس الخصم بالمصطبة والكدايس اي بكامل القدم والهلال هو في مقدمة الكدارة ونهايتها وهذا للمساعدة في الركض. اما الماركة التجارية لعثمان طه فكانت جملة....(ده ...غلط). وفي الستينات ظهر برنامج اذاعي ناجح جدا اسمه ده غلط ويبدا البرنامج بصوت يشبه فرامل السيارة تاقوية ثم صوت ارتطام او اصطدام فذهب عثمان طه شاكيا الى العم متولي عيد من اول وكبار مديري الاذاعة السودانية وانتهى الامر بمقابلة طلعت فريد وتحصل عثمان طه على حقه الادبي في سرقة افكاره. عثمان طه كان يحكي كثيرا من الطرائف والمحن عن نفسه وعن الآخرين. فبعد قعده جميلة وانبساط في الليل والمدعويين مبهورين بلباقة غثمان طه واناقته. شاهد احد الافندية عثمان طه وهو خلف احصان فسأله ياخي انت مش الراجل الكنت معانا في القعده..؟ فقال عثمان طه بسرعة قبل ان يعطي الحصان واحد كرباج (قعدة شنو ده بكون علي اخوي). عثمان كان يعرف كيف يدخل بعض الكلمات الانجليزية في الوقت المناسب. كما كان يعرف كل الكبار واسماء اهل بيتهم. وكنت انك تتحدث مع شخص متعلم. من قصصه اللتي اذكرها انه لم يعرف ان سمعته قد سبقته الى خارج امدرمان. وهو في مدني اراد ان يدخل في صفقة, بان ياخذ بضاعه بمؤجل من احد الخواجات من تجار الجملة, وان يقوم ببيع البضاعة ويستفيد بفارق السعر. وحسب كلام عثمان طه فان الخواجة كان يستمع بانتباه وعندما خلص عثمان طه من كلامه قال له الخواجة قلت شنو يا عثمان.؟ فلم يصدق عثمان طه ان هنالك خواجة في مدني يعرفه فواصل الكلام فقال له الخواجة يا عثمان طه العربجي عاوز شنو؟؟. فاسقط في يد عثمان طه وقال له ... عاوزين حق التذكرة. فأعطاهو الخواجة حق التذكرة وبقششة معاهو. عثمان طه كان يقول انا كنت متأكد الخواجة حا يديني البضاعة نعمل شنو حتى في مدني بعرفونا.. التحية شوقي,,, – |
ألله عليك يا شوقي رجعتني أكتر من أربعين سنة لي ورا..
تعرف أنا علاقة الصداقة التي ربطتني بي طه امام ساهمت في معرفتي لمعظم الشخصيات الاسطورية في أمدرمان..ومنه عرفت الباقيين محمد مهدي ود الحلو وعثمان وعمر عبد المجيد وعقباوي وقط وعثمان وداعة وصديق موللة ومحمد عبد الرحمن المهدي والصادق والطيب زروق وعمر الشاعر وزيدان..أما من عرفني بطه امام فقد كان التجاني سلوم(تايجر) أو تجنر كما كان طه يسميه..ألوحيد الذي كنت أعرفه من شلتكم من قبل. كان المرحوم محمد عبيد(زوربا) وسلمون بخيت(قسيس)زملاء الدراسة في كميوني.. نرجع لأولاد طه. عثمان وعبدالله طه الذي كان يعمل في المخازن والمهمات في نفس مكتب الوالد وكنت طبعا في المخازن لا أعرفه وفي الليل نجتمع في بيت طه امام..طبعا عشان الوالد ما يعرف اني بسكر وكمان في امدرمان.. عثمان وعبدالله كانا من أظرف أبناء أمدرمان ولا ابالغ ان قلت في السودان وكان وجودهم في أي بيت بكاء يقلب البكا لي ضحكات هستيرية حتي يستغرب من لا يعرفهم ويشك ان كان هذا بيت بكا ولا بيت عرس والنسوان يرسلو الأطفال لي صاحب البيت يقولو ليهو أمي بتقول ليك عيب كدا رشة الموية الفوق القبر لسة ما نشفت.. والناس ينسو الميت ويقعدو يسمعو في كلام اولاد طه وتستمر الضحكات حتي يغادرون الفراش.. منذ حوالي عشرة سنوات أو أكثر كنت في زيارة للسودان وبالقرب من سانت جيمس رأيت عثمان طه واقف تحت شجرة ولما شافني سمعتو بيكورك : هوي انت ياحلبي وطبعا أنا حسيت انو نسي اسمي..الغريبة اني لاحظت انو لابس جلابية دبلان ما مكوية وعمة ودي طبعا غريبة علي عثمان طه الذي كان يلبس السكروتة وأفخر أنواع الترلين بعد البوبلين. مشيت عليه وسلمت عليهو بالحضن وسألتو: عبدالله أخبارو شنو فنظر الي وأجهش في البكاء وتمتم عبدالله ما مات وخلاني براي زي اليتيم في امدرمان..فسألته بعد أن عزيته من وين جاي فقال جاي من مستشفي الخرطوم ورفع الجلابية ووراني شق في بطنو من أعلي الصدر لغاية السرة..وقال شالو لي تلتين المعدة..وبالفعل لم يكن وزنه أكتر من 50 كيلو وكان قد صار أقصر من ما كان بحوالي 10 سم. في الحقبقة تألمت لما أراه ألم شديد ولم أصدق ان الذي أمامي هو عثمان طه الأسطورة التي عرفتها..ثم قال لي لي أها جيبك كيف..أدخلت يدي في جيبي وأعطيته كل ما كنت أحمل من مال وودعته وذهبت الي مطعم صلاح البربري في سانت جيمس أبحث عن شخص أستلف منو حق الرجعة.. تعرف ياشوقي الناس ديل ما ممكن يتعوضو ولا الزمن الفات ممكن يرجع تاني.. رحمة ألله علي من ماتوا ومد في عمر الأحياء منهم .. |
الأعمام الأعزاء شوقي وفتحي .. طابت أوقاتكم ومتعكم الله بالصحة والعافية كالعادة يا عم شوقي مقالة رائعة وكلمات تخليك تعيش معاها لحظة بلحظة بالإضافة إلى مداخلتك العم فتحي دي كانت سياحة جميلة جدا بتحسسو الواحد كأنما الأحداث دي بدور أمامه الآن وتخلوهوا يحس بأي شي يقراه بالجد كدة بالرغم من إنه أنا ما من أمدرمان وما عشت فيها وبعيد عنها ولا عاصرتا روعتها وروعة ناسا الزمان لكن في أي لحظة كنت اسمع باسم امدرمان كنت بقيف لأنو هي (السياسة ـ الفن ـ الرياضة ـ الثقافة) تحس إنو هي السودان لكن بالجد كدة حسستوني إنو في لحظة من اللحظات أمدرمان دي كانت حوش كبير أو بيت كبير بتلم كل الناس البتحكو عنهم.
بس في حاجة إتاثرت ليها خالص (فسألته بعد أن عزيته من وين جاي فقال جاي من مستشفي الخرطوم ورفع الجلابية ووراني شق في بطنو من أعلي الصدر لغاية السرة..وقال شالو لي تلتين المعدة..وبالفعل لم يكن وزنه أكتر من 50 كيلو وكان قد صار أقصر من ما كان بحوالي 10 سم. في الحقبقة تألمت لما أراه ألم شديد ولم أصدق ان الذي أمامي هو عثمان طه الأسطورة التي عرفتها..) هنا بتسأل ياربي ظروف الحياة وتفاصيلا شغلت الناس لدرجة إنو الناس الرائعين الزي ديل الواحد ممكن يغفل عنهم ؟ رائع لمثل هؤلاء تكتبون. تحياتي/ عثمان الطيب |
السيد شوقي بدري
السلام عليكم دايما اجد في كتاباتك مما يذكرني بامدرمان الحبيبه طبعا لي فتره من امدرمان و اخر مره كنت بها كان منذ ان التقيتك بمكتبك في شارع واحد بالعمارات ده كان في عام ١٩٨٨ ،طبعا السنين طالت و يمكن لا تذكرني، المهم لي علاقات جيده و حميمه مع بعض ابنا ال بدري و ده السبب ورا زيارتي لمكتبك، جئت لمكتبك مع مهدي ابو قرجه ، و اخباره مقطوعه منذ فتره ليست بالقصيره، اتمني ان يكون بخير مع تحياتي عصام اليقين عبد الوهاب |
العزيز فتحي
تأثرت جدا بما كتبت انت عن عثمان طه وافتكر اجمل مما كتبت انا. وسأقوم بالتعليق عليه.. لك التحية |
الابن عثمان
والله يا ولدي يا عثمان انحنا ذاتو بدينا انو ما نصدق انو عشنا الزمن داك البيه عبدالله خليل رئيس وزراء السودان السابق كان يتوقف في طريقه الى عمله عندما يشاهد عثمان طه في شارع الموردة لك التحية |
اقتباس:
سلام مهدي بخير وأنا التقيتو قبل سنة ونص،، يا دنيا إتغيري، بس ديمة ظاااااااااتو،، مفرح للرؤية والشوف مؤنس في الضيق ياهو ديما، خالق دنيتو،،، تلفونو في السودان،، 00249118089716 طبعن وممكن، ما بس يمكن يكون غيرو،، لكن؟؟؟ it worse a try تكون لاحظت أنه ما رغم مميز، ماهو دايمن ما بيحب الظهور مهدي بتيك، راجل عظيم وحبوب،، دايمن بيقول ليا يا خال،،،، ويحب يسمى موهآر ليك تحايا ومودة وسلام |
اقتباس:
سلام إتا يابا ما بس ما من أمدرمان، إتا الحبيب طولتا تب من السودان،، ما قصدي جسديا، لكن عن البحصل والحصل من يوم 30 الأسود من يونيو المسكين على أمره سنة 89 الهي ذاتها تتمنى لو ما كانت.. إتغيرنا من نهج حضاري، لي ظلام حالك، لي فتنة، لي سرقة، لي كراهية بقى الكل ما مرتاح إلا حنفة من ناس من وين جو اله أعلم،، امدرمان يابا، بتتكلم برآها،، انا ام درمان لسان حالك اريتك تدري بحالي [web]http://sudanray.com/Forums/showthread.php?t=1848[/web] والغريبة في ناس يهينوها، يكرهوها،، البشير قال، كيف: يكفينا مفخرة أنه ما فينا زول من أمدرمان،، هو ناسي أنه أمدرمان يزيدها مفخرة أنها يتبرى منها؟؟؟ وليك يابا محبة وموضوعها هرسنا ودرسنا وسلام |
سلامات د.بابكر،
مشكور علي الرد و و تلفون مهاركمان، طبعا انا و مهدي كانت لنا صولات و جولات بامدرمان، ليه وحشه، سوف احاول الاتصال به إنشا الله الرقم ما تغير. طبعا انا ما بين سنغفوره و امريكا من عام ٢٠٠٤. اتزوجت سنغفوريه عندي الان ولد سميته علي ابي عبد الوهاب السلاوي، و الولد الثاني إنشا الله الشهر الجاي، طبعا واصلت الدراسه و الان في اخر جز من رساله الدكتوراه، واعمل محاضر بي عده جامعات و معاهد بسنغفوره تلفوني ٦٥-٩٦٧٤١٥٨٤ طبعا مفتاح سنغفوره ٦٥. الرقم ٩٦٧٤١٥٨٤ قول لعلي و يوسف و عثمان الرجا الاتصال تحياتي عصام اليقين |
اقتباس:
السلام يبدو أن كل علاجات العالم لم تأت بأوكلها إستمسلتا لي الصلعة وإستعضا بديقينة،، شكلها دعوني أعيش;) والعمة، نعم هي بتخفي الصلع، لكنها كمان بتزيد العمر كمين سنة كدآ.. يوسف مع صديق صباه موهار في السوادن وثالث الثلاثة صاحب الإسم الشهير "الكوتش" متربع في أرض الوطن الحبيب وسبق يوسف للإستمتاع بموهار والفي النص دآ "الكوتش يعني" رزق طفل وعشان أقطع ليك دابر أسإلتك ليا هنا في المنتدى وتجهجهني قدام الناس ويفتكروني من ناس Joo والكوتش وموهار،، بس التقول جماعة ود الخال شوقي بدري، يا زول هو طبعن ما بينازع في أسامي الناس الذي أجزاء العربية،، أبقى عافية وليك سلام |
شكرا د. بابكر
علي الرد المنتقي الجميل لازم يكون اخذ منك وقت عشان تضع الامور في مجاريها، المهم اولاد حاج مخير من غير فرز نعم الاخوان و نعم الاصاله تتشخص فيهم جميعا امثله الكرم السوداني والتعامل السمح المميز، ومن لا يتمني ان يكون صديق ليوسف مخير؛ اما بخصوص الكوتش دي شخصيه نادره اجتمعت فيها ملامحكم وصفاتكم و اصاله ال بدري؛ اما مهار دي شخصيه فريده زات طابع خاص ربما هنالك تاثيرات عائليه و لكن التفرد يحتوي مها رفي ابتداع هذه الشخصيه الفزه ذي قلت انت مهار ياهو مهار لم تغيره السنين طبعا الرد ده ما ذم ولكن شهاده للتاريخ الذ ي اعرفه انا شخصيا، و انا فخور بمعرفه اصدقا درب الحياه،انشا الله تجمعنا الظروف و نحكي ونسرد ما فعلته الايام بنا، ربما تلك الايام تصبح مجرد حكاوي نتسلي بها و لكن ما تضمره القلوب لا تغيره الايام و السنين ؛ اتمني ان لا تذوب حدود اللقيا، و يكون العهد كما عهدناه تحياتي عصام اليقين |
[QUOTE=بابكر مخير;145202][B][size=5][color=#008000]أبوعفان الحبيب
سلام إتا يابا ما بس ما من أمدرمان، إتا الحبيب طولتا تب من السودان،، ما قصدي جسديا، لكن عن البحصل والحصل من يوم 30 الأسود من يونيو المسكين على أمره سنة 89 الهي ذاتها تتمنى لو ما كانت.. إتغيرنا من نهج حضاري، لي ظلام حالك، لي فتنة، لي سرقة، لي كراهية بقى الكل ما مرتاح إلا حنفة من ناس من وين جو اله أعلم،، امدرمان يابا، بتتكلم برآها،، انا ام درمان لسان حالك اريتك تدري بحالي الرائع الجميل العم مخير تسلم يارب بالفعل الكلام الذكرته دا موجود والناس إنشغلت في نفسها ومعظم الناس اصبحت جارية وراء لقمة العيش ، لطفك يارب. تحياتي/ عثمان الطيب |
اقتباس:
شوقي بدري خرج ولم يعد.. أهو رفعت ليك البوست عشان تجي راجع.. |
اقتباس:
تحياتي/ عثمان الطيب |
العزيز فتحى وكل المتداخلين . رجعت من برلين بالليل امبارح .
كتابه فتحى عن عثمان طه اثرتنى وأثارت مشاعر كثيره . بعضها تألمى لما انتهى اليه عثمان طه وهنالك درس كبير حتى لا يغتر الانسان بالدنيا فهى ليست دائمه . سأقوم بنشر كلام فتحى لانه جميل ومؤثر هو عثمان طه 2 وسأنشره فى بعض المواقع الاخرى . لكم التحيه والشكر . شوقى |
| الساعة الآن 10:00 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.