الجنن عبد القادر . ... او . . . ا بس دى تجى كيف؟؟ أها بس دى تجى كيف؟؟
[size=4] نقلا عن صحيفة السودانى.. بقلم الكاتب الفاتح يوسف جبرا أحبو وأحب نوناتو.. نوناتو الفى وجناتو... وهل يا صحابى أبقى لنا (البوش) و(الدكوة) و(الشنو ما بعرف داك!) وجنات (عشان تكون فى نونات)؟؟ إختفت (النونات) بل إختفت (الوجنات ذاتا).. صارت الوجوه (شاحبة) يلتصق (اللحم) فيها (بالعظم) كما (الإستيكر) بزجاج العربة.. حكمت الله حتى (نونات الأطفال) التى كانت تتوسط (وجناتهم) الندية عندما يضحكون إختفت؟؟ وكيف لا تختفى (نونات الصغار) والطرقات ملأى بالألبان (المشعة) و(البسكويتات) منتهية الصلاحية؟؟ وكيف لا تختفى (نونات) الكبار ومعظم الأسر صارت تعيش على (طقة واحده) – وكمان من غالب قوت أهل البلد!! مما جعل (أهيف فيروس) كفيروس (النزلة) مثلاً (يبرم فى شنباتو ويعمل فيها أبوعرام)!! ويحتل (هذه الأجساد الواهنة) لأيام وربما لأسابيع. لا أدرى لماذا إسترسلت فى موضوع (النونات) ده مع أنو قصدى (عبدالقادر) الذى ورد أسمه (ورد إسمو دى حلوة الأيام دى) فى الأغنية والتى يؤديها (عميد الفن) أحمد المصطفى هذا (العبدالقادر) فقد صوابه كما جاء فى الأغنية و(جنتر) أو (إتلحس) لسبب غير معروف لنا معشر المستمعين. تذكرت قصة (عبد القادر) صاحب الأغنية وأنا أستمع إلى حكاية (عبد قادر) آخر رأيته وهو يحتل أحدى (الصوانى الناصية) وهو يشير بكلتا يديه إلى الذين يمرون من أمامه وهو يصرخ فى تشنج حتى تنتفخ (عروق رقبتو) قائلاً: - هسع دى تجى كيف؟؟ هسع دى تجى كيف؟؟ بالأمس وجدته وقد (ترجل) عن (الصينية) بعد أن لسعته حرارة الشمس الحارقة ليقطع الشارع ويقف تحت ظل (البقالة) التى قصدتها لشراء (علبة سجائر).. كان يبدو أن حالته فى ذلك اليوم (أحسن شويه) لذلك فقد خطرت لى فكرة أن أدخل معه فى نقاش علنى أستنطقه وأعرف قصة سؤاله (التاريخى) الذى يردده وهو: (هسع دى تجى كيف؟؟).. طلبت له زجاجة (حاجة باردة) أمسك بها وإتجه إلى جدار (البقالة) حيث الظل وجلس.. (قويت قلبى) وجلست فى مواجهته فى هدوء وترقب سائلاً أياه إسمك منو؟؟ - إنت هسع خلينى من إسمى.. أنا إسمى هين!! لكن بس دى تجى كيف؟ - مواصلاً فى تشنج – دى والله أصلها ما بتجى؟ - هى شنو الما بتجى؟؟ - إنت بس جيبا ليا. قلت فى نفسى على طريقه الفنان عادل إمام (والله لو أعرف أقول) إلا أننى وبعد أن (راق شويه ونزل منو) عرفت إنها ما بتجى (كلو كلو)!! قال لى وهو يبدأ الحكاية... أنا إسمى (عبدالقادر) أمى ولدتنى وماتت فى الوضوع قام أبوى ربانى وأصلو ما فكر يتزوج قمت أنا كبرت وإشتغلت وإتعرفت ليا على (أرملة) وقمت إتزوجتها – ياخد ليهو بقة من البارد- أها زوجتى دى عندها (بت) قام أبوى شاف البت وعجبتو وإتزوجا - مواصلاً – أها يا زول بعد سنة كده زوجتى ولدت ليا ولد وكمان (أبوى) برضو (بت زوجتى) جابت ليهو ولد.. – يستعدل فى جلسته متسائلاً- أها ولد (أبوى) ده أخوى – وهو ينتظر إجابتى – مش كده؟؟ فأجبته بالإيجاب – مواصلاً – وولدى أنا ببقى لى أخوى ده (أخو أمو) يعنى (خالو) مش كده؟؟ فأجبته بالإيجاب – مواصلاً – وزوجتى أنا بتبقى لى أخوى ده (حبوبتو) أ أمو مش كده؟؟ فأجبته بالإيجاب – مواصلاً – وأبوى ده ذاتو ببقى لى (ولدى) جدو أبو أبوهو مش كده؟؟ فأجبته بالإيجاب! هنا نظر إليا وقد إتسعت حدقتا عينية وكأنه فى طريقه لحالة (الجنون) تلك قائلاً: طيب لمن ولدى أنا يا أستاذ يكون (خال أخوى) مش معنى كده إنو أنا (جد) أخوى – وهو يقيف على حيلو- ولمن أكون أنا (جد) أخوى مش معنى كده (يا أستاذ) أنا جد (نفسى).. – ثم رافعا كلتا يديه متسائلاً: - أها بس دى تجى كيف؟؟ أها بس دى تجى كيف؟؟ - (أجبته وأنا أتجه صوب عربتى): قوم.. قوم يا عبدالقادر (أطلع صينيتك) والله دى ما مابتجى كلو كلو!![/size] |
طارق سلامات
قلت لي الزول طلع خال نفســو؟؟.. و الله دة موش يجنن..دة يكتل دحين دة الزول بتاع صينية التحالف؟..و الله واحدآ تاني؟.. باقي المجانين زادو شوية مؤخرآ |
اقتباس:
[align=center]لكن متذكر عمك اظنه دنقلاوى كان بيقيف فى حراية وسموم الف فى صينية شارع البلدية الجنب عمارة الاخوة ومرات بيكون فى صينية التكسى التعاونى المك نمر مع البلدية لكن داك جنه مع نميرى ما جننه خالو ولا جده دا تصدق طلع جد نفسه والله يالطيب انا ميت من الضحك موت من القصة دى وفيها غلوتية صعبة شديد مودتى يا جميل[/align] |
الحبان طارق والطيب ...
ايامك حلوة ان شاءالله يارب ... طارق انا عارفك زول بتاع محن ..هسع الحكاية دي طلعتها من وين ...ياخي انا قاعد لي ساعة علشان افهم كلام الزول دا ...فعلا هي ماتجي ....؟ لكن تجي كيف ؟؟؟ والله حكاية ....سبحان الله ...ربنا يلطف بيه وبعباده المسلمين .. صراحة قعدتكم عجبتن قلت ادخل اقعد معاك شوية ...واخد لي خشم خشمين ..واقوم علي شغلي .... الشاي ياجني ... |
اقتباس:
اريتك ديمة زين والله الموضوع دا نزلته والله لحدى الام ما فاهم شى نوهائى تصدق ؟؟؟؟ :D :D :D :D ما تغيب خليك قريب الود ردوم ردوم[/align] |
الأخ طارق والأحباب
الموضوع طريف وممتع، وأشكرك كثيراً على مشاركتنا هذه (الغلوطية)، أو هذا الإلغاز بالمناسبة هذا موضوع طويل وطريف وعلمي جداً! فالزيجات المذكورة (الجننت عبد القادر) هذه كلها (من الناحية الشرعية) سليمة ومعتبرة! مثل هذه المسائل مبثوثة كثيراً في كتب الفقه وتحديداً في علم الفرائض (المواريث) والإشكالات التي تصادف الورثة وأنصباءهم من الميراث ومن يحجب من، ومن يرث من ومن لا يرث، وما نصيب كل منهم في الحالات المختلفة! أتمنى أن يجري أحد الزملاء هنا (يتوفر له الوقت والمراجع)، باتحافنا بنوادر كهذه، وهو علم رائع ومنظم وبه طرائف ومسائل إلى حد الإدهاش ! مثل المسألة (العمرية)و (الحمارية)و (الشُّريحية)و (المنبرية)و (الخرقاء)و (الناقضة)و (الدفانة) وهلم جرا.. الأستاذ الفاتح يوسف جبرا لديه كتابات ممتعة ومتميزة، في غاية العمق والطرافة والمتعة، وأنا من المعجبين جداً بكتاباته، نضَّر الله قلمه. |
اقتباس:
والله وكان ما اخاف الكضب، اسامى القرى ديل مروا علي فى جغرافية حوض النيل;) |
طارق
أنا ماشي السودان وبلاقي الزول ده وبقول ليهو بتجي كده .. بتجي كده يا هو طاب يا جنيت أنا قلت ليك تلاقيطك دي يوم بتجنن ليها زول :) |
السلام عليكم ورحمة الله وبركاته
اقتباس:
شاكر لك مرورك على هذا الموقع ( المشتبك ) وحقيقة هى شربكة غريبة وعجيبة وفى السودان موجودة بكثرة والناس يحبومها جدا ويتبارون فى فهم العلائق والراوبط حتى يصنف كل شخص حسب الرابطة التى تربطه بالاخر وانا والله المسائل دى لا افهم فيها من قريب اوبعيد الشى المهم بالنسبة لى انه دى قريبى وبس عندى ولد اختى من ابوى ، ابوه بشكل ما هو جدى لانه هو يعتبر بمثابة خال امى وعندى جدى خال امى شقيق امها بيقول لولد اختى ياخوى ؟ ؟ ؟ ؟ اها دى تجى كيف بس ؟ ورونى بس ؟؟ دى تجى كيف ؟؟ ورونى بس ؟؟:eek: :eek: :D :D :D |
اقتباس:
تلاقيطى بتجنن حبة لكن والله تلاقى زولنا دا ياكا الجنييت بدربك :D :D :D :D |
اقتباس:
الله يجازى محنك عثمان وبالعكس |
اقتباس:
[align=center]يا ود الحسن أخيراً عرفت الجنن عبدالقادر .. لكن قربت ألحقو في الصينية .. من أمبارح والشغلة ما دايرة تلفق .. قلت : أقول الله يعين عبدالقادر .[/align] |
| الساعة الآن 10:29 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.