هييوب..
ما قلت لك سوالو طرقة من السكات برد كراعنا من المشي ماشين نسوي الجيلقة والفينا تب ماسوا شي سوالو وحدي ومنتشي حميدة غاملو من الخميس الليلة جابو مع العشي عشانا جد والسر وصل سوالو طرقة من السكات دودرنا كلنا جم بعض وأخدلو كرسة تكنو فات القمرة غمزت لي حمد جاط فيها : أمشي مع البنات السر نطق يا اخوانا هوي ساعتكن المبروكة جات. السر زولا مجهجه بالعشق قلبا مودر أمنيات روحو المحكرة في الوجود صبحت مكركرة بالشتات: دقو النوبة دقو النوبة دقو النوبة دقو النوبة سالمين في الجتت لكن دايرين للضمير التوبة الناس لو ملاني يقين في يوم ما بتغير توبا شاقين المقابر يومي ناسين كنو ما مروبا والدنيا الرقيق ذيلا غاشانا التقول يادوبا فت قام عكاشة علي العلي مدالو إيدو وقالو هات حكر رويحتو وسط جموع الدهشة والخوف والسكات شفنالنا خيتين من دموع طنطنا : ماهو جنا بخات: دقو النوبة دق يارمة دق النوبة دق يارمة لازولا ضليع في الحضرة لا زولا تقي اللهم قافلين في الدنية عليك ياجسما يسهرج حمة يوم نذكر بلاوي عمرنا والشين العلينا إتخم الناس البقت في الدنيا يوت تشري وتبيع في الذمة والعندو الرياسة علينا يتراقص يغش في الأمة.. حميدة فك الباقة قال قولو وعيونو محمرات ييديك قماري الموت عديل ماشات علينا مدودرات: دق النوبة دق النوبة دق النوبة وأوعي الوقفة العمر إن كمل يا اخوانا من وين البنوك والسلفة الشاغل الضمير والله روحنا الحنين والإلفة طوطحنا الضمير واتربي بيناتنا الكضب والكلفة واتمرجح مزاج الطيبة واديك يامكارم جف واشتان المروة حليلا لابتنفع بقت لابتلفي.. في الساعة ديك حمد علي شفنا بيباصر في الثبات عارفنو قاعد من قبيل موجود هنا ولكنو خات بالو وأضانو مع النجوم والقمرة ديمة ملجمات: دق النوبة دق النوبة دق النوبة دق بالله يا أخوانا اليشوف في ربو كل يوم في سماهو الباهي ونجمات التريي تقولو يوماتي إنتبه ياساهي والقمر البروح يتواري من بعد إكتمالو الزاهي إعلان للخلوق الغافلة وإنذار للعقول والله... خلينا الدريب ورجعنا يتلاون بنات أفكارنا لا النور دار يجيب خيتينو لا نحن اتكينا هجعنا يايوسف عليك سلامو غالبني الحصل تفسيرو 20 سنبلاية و5 قايمات عندو داخل ديرو شايفاهن عيوني كأنو قايمات في تقانت غيرو أحكيلن يحدر فيني يتوطا التراب حديرو أشكيلن يفر جلبابو يبدالن صلاتن سادسي أقرالن عديل تفكيرو يتتلح منيبر الحلة مافايت علي جرجيرو يتوعد مزبد خشمو زاجرلي الغراب في طيرو :الزار والقمار يا أخوانا ملعون اليقرب منو والخوف بادي في حذيرو 20 سنبلاية و5 ناشفااتن عجاف تالانا لكن الخدار كاسيها بي وجهة نظر مولانا ملياني ومعبا معبا بس نحن الجحود أعمانا.. بس نحن الجحود اعمانا بس نحن الجحود اعمانا.. |
سلام مجتبى،
ألف شكر على هذا التداعي العميق المليان. لي عودة إن شاء الله تحياتي |
مرحبا يا أستاذ عكود ..
شكرا علي المرور ومن هنا والتعليق .. وفي انتظار عودتك .. |
مساك الله بالخير يا مجتبى،
إستوقفتني كتير طريقة السهل الممتنع في القصيدة، وتشبه طريقة شعر الأستاذ محمد الحسن محمد سعيد (حسون). تجد جل قصائده هنا. أنصحك بالإطلاع عليها، خاصة قصيدتيه (نحن مانا سكارى) و (ثورة الحيران)، وأعدك بأنك سوف لن تندم. أما هذا المقطع الحكمة: اقتباس:
الأرضة جرَبت الحجر وكت إيدا كانت باليقين ملياني والمشهاد في البيتين، ملء القلب باليقين. تسلم ياخي على الإمتاع. |
يا سلاااام ياخ ...
حسبتني س(أختف رجلي ) الي هناك لكني (اتختفت ) تماما .. شعر حسون محمد سعيد .. شي كدا ملان بساطة ومعبأ تراثيات و صور من حياة البلد كأنها مبثوثة بثا مباشرا .. وطبعا أفخر أن يكون لكلماتي مجالا للمقارنة مع روائعه.. الشكر مثني وثلاث ورباع يا أ عكود.. |
يا سلااااااام ياخ يا سلام يا سلام
اول هام حبابو قلمك مزين سودانيات يا مجتبي الصدق وتاني هام ... ياخي ده غناء سمح بالحيييييل أي والله غنايا سمح عدييييييل كدي يترترك يغلغلك يشيلك هنووووووك ويرجعك يتجك هني ياخي عندي طلب ويا ريتك لو تحققو لي ياخ وما داير اقول ليك يا مجتبي حلفتك بي الله لكن لو في ايتها مباصرة .. سجل لي النص ده بصوتك وجيبو فكو هني ياخ ينوبك ثواب قريت النص انا هسي دي بصوتي وكان معاي شباب ... وكتين انتهيت منو كلللللهم وبصوت واحد قالوا أح ح ح مارقة من جواهم والله حسيتها ياخي شكرا ليك ياخ |
يا مراحب يا ناصر ..
شكرا علي الترحيب وعلي هذا التداعي الجميل.. وعلي الإشادة بالنص.. جدا .. طلبك ينفذ ونص و5.. لكن (الأح) دي يبقي تبع صوتك ماها تبع كلامي الفوق دا .. :) |
اقتباس:
لكنها مارقة من جِنِس كلامك الفوق ده يا مجتبي ،،، |
| الساعة الآن 11:18 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.