كارثة كورونا بالسودان
 

صباح الخير ورمضان كريم...
الكورونا دخلت البلد بعد السماح بفتح المطار 48 ساعة للقادمين من الخارج، من إتخذ القرار؟
الحقل الطبي به كثير من الإصابات والوفيات .. من المسؤول عن توفير أعلى قدر من الأمان لهؤلاء الذين يمثلون خط الدفاع الوحيد للبلد ضد هذا الوباء الصيني؟
لازال الناس يسافرون عبر الولايات المختلفة أسر وفرادى على من تقع مسؤولية عدم السماح لهم بالسفر؟
أعتقد أن الدولة قامت بإجراءات إحترازية مبكرة وجيدة ولكن إنتشر المرض بسبب ماذكرته آعلاه، وهي تتحمل المسؤولية الأولى وليس المواطن فقط كما يحاول وزير الصحة والإعلام أن يصور لنا بالرغم من معرفتنا التامة بسلوك السودانيين.
قرار خاطئ تسبب في كارثة وأعتقد أنه سيكون وصمة على الحكومة الحالية ما بقيت كما كان قرار إعدام 28 ضابط في رمضان وصمةً للحكومة السابقة حتى رحيلها.
وبالمناسبة أسوأ السيناريوهات تقول أن الكورونا ستصيب كل الناس وأصحاب المناعة القوية سيصمدون ودونهم كان الله في عونهم.

عم بابكر رمضان كريم ... والله مشتاقين ليك وللناس بسودانيات...
ظروف ومشاغل بعدتنا فترة.
أتمنى الخير للجميع وربنا يحفظنا ويحفظ بلدنا يارب.
لك وافر التحايا والإحترام

سلام يا حسن ورمضان مبارك علينا وعليكم.

فتح المطارات لمدة 48 إجراء اتبعته دول كثيرة لإجلاء/إستقبال العالقين، مع الأخذ في الإعتبار كل الإحتياطات والإجراءات الإحترازية المفروضة.

القرار لا غبار عليه، ولا أستطيع أن أحدد مسؤولية تبعاته، هل كان هناك تقصير من السلطات الصحية والأمنية؟
هل تصرف بعض القادمين بعدم وعي وعدم مسؤولية؟

السفر بين الولايات يُسأل عنه المواطن نفسه والسلطات الأمنية التي ما زالت تحت قبضة الدولة العميقة.

مقارنتك ما يحصل بإعدام ٢٨ ضابط في رمضان، غير منصفة والله.
ما لم تتضافر جهود المواطنين والحكومة، يظل إحتمال حدوث كارثة ماثلاً.

ربنا يحفظ البلاد والعباد إن شاء الله.

تحياتي ولا تطول الغيبات.

موضوع ذو علاقة، منقول:

في حرب كرونا يا الله نتهزم نحن

طبعا كل الشعوب مع حكوماتها في مواجهة كرونا
إلا نحن الشعب السوداني مع كرونا ضد الحكومة ووزير الصحة .

للناس الإعترضت علي كلام د: أكرم ماهو يا إنتو ذاكرتكم ضعيفة يا بتستهبلو - محسسننا أنكم فقتو أمس علي الواقع دا وكمان محتجين علي طريقة كلام وزير الصحة .

خلونا نتابع التسلسل بتاع جائحة كرونا في السودان
١- اوووول ما الوباء دا وصل مصر والسعودية والإمارات ( باعتبارها دول تعج بالسودانيين ) طوالي وزير الصحة رفع توصية انو يتم إغلاق المطارات والمداخل والمخارج واستجابت الحكومة وهنا لا كان في حالات لا إشتباهات *طواااالي الناس قامت وما قعدت ( تلفزيون - راديو - صحف - وتس فيس ...الخ )*
*دا قرار متسرع*
*نحن ما عندنا كرونا ليه بقفلو المطار والدول كلها أخدت الإجراء دا بعد ما ظهر عندها الوباء الا نحن*
*دا قرار ما مدروس واسي السودانيين العالقين ديل نخليهم يموتو ونقيف نعاين ليهم*
*الحكومة دايرة تعمل فيها متطورة وبتحاكي الدول الكبيرة في الفاضي ساي*
*دي خطة من الحكومة عشان تلهي الشعب من الضائقة المعيشية*
*و و و*
وتحت كل الضغط دا الحكومة فتحت للعالقين لمدة 48 ساعة .
٢- قرار فتح المطارات طلع بطبيعة الحال من السلطة الاعلي من وزارة الصحة ورغم كدا ما وقفت وزارة الصحة مكتوفة الأيدي بالعكس حاولت تجهز مراكز عزل بالشمالية *ناس الشمالية طلعو ترسو الشارع واحتجو* اقترحو مركز عزل في فتاشة *امتلاء الإعلام والسوشال ميديا بالتهكم والتريقة عليه وعلي موقعه وانو ما مؤهل و و و* تم اقتراح مستشفي الأمل الجديدة ( تحت كبري كوبر ) وبالفعل قبل ما يجهز بصورة تامة تم تنفيذ قرار فتح المطارات والمعابر وكانت النتيجة وصول أعداد مهولة ضاقت بها ساحة مستشفي الأمل الجديدة للحد الذي جعل عضو مجلس السيادة تناشد المسئولين والمنظمات والمواطنين لمد يد العون لصعوبة الاقامة فيه وكمان لسهولة الهروب منه ( وكانو الحجر دا ضد مصلحتهم ومصلحة اهاليهم ) - برررررررضو وزارة الصحة ما وقفت بتتفرج بل جاءت باستمارات عشان يملوها القادمين ( رغم انو الإجراء دا المفروض تقوم بيه وزارة الداخلية عبر الشرطة بحكم الاختصاص ) لكن الصحة أخدت زمام الأمور - الحصل شنو ؟ *القادمين كتبو بيانات وأرقام تلفونات غلط*
٣- بدأت الإصابات تظهر الواحدة تلو الأخرى وهنا أوصت وزارة الصحة بالتباعد ووقف التجمعات والمشاعر الدينية الجماعية ( الدينية عموما وليس الإسلامية فقط ) *نحن خلينا كلللللل شي وركزنا فقط في منع صلاح الجماعة ( رغم أنها ممنوعة في بيت الله الحرام ومسجد نبيه الكريم ) لكن لازم ننظر وبدأت المناوشات - حتي الحديث عن الضائقة الاقتصادية الاستوجبت التجمهر ( خبز - غاذ - وقود ) كان يمكن أن نتعامل في صفوفها كبعض الشعوب التي يوجد بها صفوف لتلقي الخدمات بمعني كان يمكن الالتزام بمسافة المتر التي دعت لها وزارة الصحة لكن نحن شعب معاكس وأناني وكل زول داير ياخد قبل أخوه عشان كدا كلنا بتلقانا مندفسين أمام نافذة الخدمة وتكثر الصراعات والنقاشات وحتي الضرب ( في حين انو لو بس اي زول إحترم وجود القدامه ووقف في إستحقاقه ما بحصل أي احتكاك ) المهم ولاااااا علي بالنا وهاك يا استهتار ويا إحتكاك* .
٤- بدأت الحالات بالإزدياد فيما يعرف بالإنتشار عبر المخالطة ( يعني تخالط زول مصاب ) وحتي لا نصل مرحلة الانتشار المجتمعي ( يعني تجيك كرونا وتكون ما عارف جاتك من وين زاتو - زي مثلا تركب مواصلات ماشي العربي ويكون الزول الركب قبلك في مقعدك دا وجاي من العربي عندو كرونا وهو ماعارف ونقلها ليك وانت برضو ماعارف ) عندها أوصت وزارة الصحة بالحظر الجزئي ، *طوالي قمنا ننقض قرار الوزارة وانو الحظر غلط وفي ناس رزق اليوم باليوم و و و ( يعني بدل نفكر مع الحكومة كيف ناس رزق اليوم باليوم نقدر نعالج مشكلتها لا لا نعاكسها ونصر انو بس ما يكون في حظر - دا كان حلنا الأمثل ) وحتي لما بدأ الحظر الجزئي عشان الناس ما تتقيد بتوجيهات الصحة وتقعد في البيت كانت بتتجمع في مواقع شح الخدمات ولو حسبت عدد الحضور مقابل عدد المنتفعين من الخدمة بتلاقي الفرق خرافي ( يعني مثلا في الطرمبات تلاقي عربية ملاكي راكبين فيها خمسة أصحاب عشان يعبو العربية الواحدة ) دا غير انو كلنا وقتها بنبرر سلوكنا دا بي انو عشان يكون في التزام بالحظر لازم الحكومة توفر كل شي ( وكانو عدم التزامنا بالحظر بضر بالحكومة ما بينا نحن واهالينا نحن وأبنائنا نحن و...الخ نحن ) وعااااادي وقتها ظهرو المنتفعين من الأزمات نوع البخزن السلعة ويدسها عشان يعاكس الحكومة او يظهر فشلها او يزيد سعرها ويزيد معاناة المواطن البسيط او او او - بل وصل الأمر بالكيزان ومن شايعهم للتظاهر في هذه الظروف والمتاجرة بالدين كعادتهم وتصوير قرارات الحكومة علي انها ضد الدين وخرجو متظاهرين ضد الحكومة وضد قرار الحظر ومنع التجمعات وضد وزارة الصحة بالهتاف ( ما تغشونا مافي كرونا )*.
٥- أصبحت الحالات في ازدياد وهنا وزارة الصحة أوصت بي زيادة الحظر لحظر كلي وتمت الاستجابة من الحكومة *لكن نحن كشعب لازم نعاكس أول يومين من بداية الحظر وقفل الكباري الناس كانت بتمشي توتي عشان تعدي لي بحري وامدرمان بالمراكب- قبضوهم بعدها بيومين الناس بقت تتهرب داخل عربات الشحن المغلقة ( دفارات الموز - التلاجات ) عشان تعبر الكباري دا غير العربات الملاكي البتهرب الناس داخل وخارج العاصمة حتي ظهرت حالات خارج ولاية الخرطوم الأدهي والأمر من كدا انو الناس الظهرت عليهم الأعراض كانو بنكرو انهم سافرو او خالطو زول مسافر ولو اتاكدت الحالة حتي يعترفو او غيرهم النوع البشرد عشان يمشي يفحص في مستشفي تاني للتأكد من الاصابة الحاجة دي ادت لي إصابة عدد كبير جدا من الحقل الطبي بالفايروس وإدخال عدد خرااااااافي منهم للحجر الصحي ( انا بتكلم عن عدد يفوق ال٥٠٠ من الكوادر الطبية )*.
٦- وللأسف وصلنا المرحلة التي كانت تخاف وتحذر منها وزارة الصحة وهي مرحلة الإنتشار المجتمعي وبدأت حالات الإصابات تصل أرقام كبيرة في اليوم الواحد والمرحلة دي بالزات محتاجة الكل يخت اييييي خلاف بالجمبة ونخت كلنا ايدينا مع بعض ودا بالضبط الاتعاملت بيه وزارة الصحة متمثلة في د: أكرم وبكل شفافية وعشان الناس توعي للمرحلة النحن فيها الآن ( مش الماشين عليها ) تحدث وزير الصحة وما دس اييييي شي واتكلم بصورة كل التابعوها ( من غير السودانيين ) اجمعو انو دا أوضح وأفضل واشجع تصريح لي مسئول حكومي في العالم منذ بدء الوباء ( يعني لا حب يطمئن بالكذب ولا يزوق الكلام ولا يسيس الأزمه ) ختاها لينا بالوااااضح عشان نعرف البينا والعلينا مادام كتمت كتمت *لكن نحن كشعب بنخلي عادتنا؟ اكيد لا خلينا مضمون الكلام وبدينا نتكلم عن شكلو ( حديث انهزامي - حديث فيهو تعالي - اتكلم بي نبرة حارة وكأنو بنهر في الشعب - ياخي غلبتك قدم استقالتك بدل تتكلم كدا لقلقلقلقلق ...الخ ) لا مش كدا وبس كمان جاتنا حالة النسيان ولا الإنكار ولا العباطة ولا الاستعباط ما تعرف ورجعنا الكلام للمربع الاووووووول ( انت في الأساس ماعارف إمكانيات وزارتك شنو ؟ ليه سمعت كلامنا وفتحت المطار ٤٨ ساعة ؟ كلو منك ومن حكومتك اسي لو ما فتحتو المطار دا كلو ماكان حصل )* .
مع العلم اني ما ذكرت حادثة الكوز ذو النون واتهامه لدكتور أكرم بإدخال زوجته مع المساعدات الاماراتية ( والح يفضل كوز لانو تعريف الكوزنة هي فكر اناني هدام يحب أن يسلط عليه الضوء بالباطل - شفت الوصف دا لو لقيتو عند بوزي في الصين تأكد انو البوزي دا كوز ) وما ذكرت المساجد الشغالة عادي ومفتكرة انها كدا بتتعبد صح وما ذكرت انو بعد فتح المطارات ل٤٨ ساعة ما كل العالقين خشو وفي بعضهم مازالوا عالقين ومازالت هنالك اصوات تنادي الآن بإدخالهم وما وما .

غايتو حقيقي ربنا ينصر الحكومة ووزارة الصحة علينا نحن وفايروس كرونا .

ياااااااا الله نتهزم .
*مهند كروبي*

يا مرحبا بالابن حسن النضيف رمضان كريم وكل عام وانتم بخير
فيما يخص انتشار الكورونا فيرس اعتقد ان العمدة عكود قد اوفى وكفى وبين كل الحقائق حول هذه الكارثة
اليك هذا الفديو لترى بنفسك فوضوية البعض الذين تحرضهم وتدفع بهم الى الشوارع تنظيمات الدولة العميقة الكيزانية

https://www.youtube.com/watch?v=ib5V...JzU5QYgv2S4_O4

سلام دكتور،

يقال إنو البيهتف ده "ما تغشونا ومافي كرونا" ولد إسحق أحمد فضل الله، بتاع الغزالة الجات اتكت وقالت ليهم اضبحوني يا المجاهدين، انتو ظاهر عليكم جيعانين بالحيل، وا شري عليكم!:D

ولد إسحق أحمد فضل الله، بتاع الغزالة الجات اتكت وقالت ليهم اضبحوني
------------------------------------------------------
يا عمدة تقبل الله صيامكم وقيامكم
لا استبعد ابدا ان يكون ابن المهرج اسحاقا
الواد طالع لابو

عم بابكر وعكود والعم حسن وناصر .. طلتكم هنا عندي زي هلت العيد وكل سنة وإنتو طيبين وربنا يلمنا في الخير.
أعتقد أن مداخلاتكم وطرحكم ورؤيتكم للموضوع هي الصحيحة.
أشكركم وربنا يحفظ البلد والناس.

السح الدح امبو

:D:D:D

أبو علي الحبيب.. معليش تطفلنا وتسيدنا بوستيك الجميل، لكن ما حرقة الفشفاش بتخلي الطبع شيتن دراش
أمس إتشرفتا في المندولا بي مجموعة محدودة ومحدودة حسب تعليمات السلطات هنا الما شاء الله عارفين بيعملوا شنهو عشان يحموا بلدهم وقاطنيها من شر البلية..
بإنضباط قلتا ليهم يا أخوانا في الصالة التانية المكان فسيح وهو بيكفي أننا نلتزم بي العدد المسموح بأنه يكون داخل المحل..
لكن إحنا ما اليانا ما بنخاف شيتن تب ولو ساحات الورى
إلا بس ياهو البهزمنا سحبت الجزلان من الجيب الورأ
المهم يا زول..
عاينو لي بعضهم لكن واحد غلبتهوا تب.. يا دكتور عادي كلنا سبعة...
أقول ليك أقلاهم بيكلوريوس وأب لي طفلة..
تقول لي شنهو وتقول لي منهو..
أقول ليك وأديك
إحنا الدشنين دّيك
للفجرية سايدنها ذي الديك
وعشان تعرفنا بذيدك وأديك
لو شنهو دآك ما بخليك
أشيلك وأمطوح، أجيبك وأوديك
هاك يانا إحنا من ابو لكيلك
[youtube]https://www.youtube.com/watch?v=ligZY4REhQ8[/youtube]