ثورة الحيران - محمد الحسن محمد سعيد (حسون)
[align=justify]مقدّمة عن الشاعر بقلم الصديق العزيز مامان:
طبعا لمن لا يعرف الشاعر حسون هو محمد الحسن محمد سعيد ود رحمة. وهو شاعر له قصائد تمتع القارئ أيما امتاع وتؤانسه أيما مؤانسة.. ومن قصائده الطويلة قصيدة (ثورة الحيران).. وتحكي قصة حدثت لحسون ورفاقه عندما كان حوارا في خلوة شيخنا العوض ، قبل دخول المدرسة، وحدث أن توفيت والدة مفتش المشروع الزراعي (أحمد بكري) .. وطبعا الحيران لقوها فرصة وخططوا لحضور يوم التالتي للاستمتاع بأكل الفتة في صراية المفتش... ولكن الشيخ فاجأهم بأن جلال المناسبة يستدعي اختيار عدد محدود من الطلبة كبار السن فقط ... هذا القرار كان مفاجأة لصغار الحيران نزل عليهم كالصاعقة ، الأمر الذي جعلهم يعقدون اجتماعا تمخض عن تحدي قرار الشيخ والذهاب لصراية المفتش يوم التالتي.. وحتى لا أفسد عليكم متعة قراءة القصيدة... أطلب من عكود إنزالها في هذا البوست وأتمنى أن تكون فرصة لإنزال بعض قصائد حسون للعلم الأستاذ حسون هو أحد الكفاءات الاقتصادية السودانية وهو خريج اقتصاد الخرطوم عام 1969م وكان من المتميزيين أكاديميا. عمل ببنك السودان، وابتعثه البنك لأمريكا وحصل على ماجستير إدارة الأعمال في منتصف السبعينات.. وكانت آخر وظيفة شغلها بالسودان هي (المدير المالي للهيئة العربية للاستثمار والانماء الزراعي).. وأهم ما يميزه هو التواضع الجم ودماثة الخلق ... [/align] [align=justify] مقدّمة القصيدة بقلم الشاعر: ما أعذب أن نمتطي قطار الذكريات فيطير بنا القهقري . . عبر الأيام والسنين إلى عهد الصفاء والنقاء . . عهد الطفولة وأيّام الصبا . . ها أنذا قد ركبت القطار . . ثم حططت الرحال في قرية "القرير" بشمال السودان . . وبالتحديد في خلوة شيخنا العوض ود مدني عليه رضوان الله ورحمته وغفرانه. هناك وجدته . . شيخ طويل فارع . . لحية كثيفة بيضاء و وجه صارم وقور تكسوه هالة من نور القرآن وسماحته . . ةهنالك وجدت نفسي . . وجدت أترابي . . ورفاق طفولتي . . "حميدي" إبراهيم دليق الشملي" و "توم حامد" . . أجسام متسخة كساها الغبار، وثياب ممزّقة مجلّلة بالعَمار . . ولكن نفوس طاهرة بريئة . . وقلوب صافية نقية كأنها قلوب الملائكة . . وهناك عشت مع أترابي قصة طريفة كنا نحن أبطالها. ثم عدت من رحلة الذكريات وأمسكت اليراع محاولاً أن أنقل فصول تلكم القصة لمن يقرؤها . . بشعر دارج . . وبلهجة الشايقية بالقدر المستطاع. ترى إلى أي مدى حالفني التوفيق؟[/align] [align=center] ثورة الحيران في يوم من صباحاً بدري . . جانا حميدي يجري ويجري . . يا إبراهيم . . حلالنا . . حلالنا . . أحمد بكري . . ماتت أمو والناس في المحطة اتلموا وقالوا التالتي يوم الجمعة طبعاً فتّة ! ! مو بي دمعة *** إبراهيم دليق الشملي . . إتحزّم هناك و نطّ . . وا حلالنا . . العمدة خالنا . . يوم الجمعة ناكل فتّة أحمد بكري . . بالرز والرغيف . . مو كسري ! توم حامد سكر بالفرحة . . جيّر لوحو قبّال يمحا *** أحمد بكري . . لو دايرين تعرفوا حكايتو . . بالخير ربّكم يطراهو . . واحد أفندي . . منقول للقرير من شندي كان زولاً كريم واجواد أكلو رغيف ولبسو ظريف . . وكل يوماً قميص بشرايتو ما بيركب حمار حاشاهو . . عندو جواد . . والسايس دوام يبراهو بيتو اسمنتي مبلوط كلّو والحوش داك . . أسكت خلّو القمّيز داير ما يدور بيضلّو *** يوم جاهو الخبر بي أمّو . . والناس في المحطة اتلموا . . يكشحوا في التراب ويخموا . . "زايلي الدنيا دي وخرباني" "زايلي الدنيا زايلي وفاني" زايلي الدنيا حي حي ووب" "يا أم أحمد الحبوب" جانا حميدي مبسوط يجري يجري ويجري . . سبحان الله . . سبحان الله . . "كل زولاً دوام في همّو" *** الساعات مشت براحة . . ! ما جات راحة . . ! والشمش اصلو مابي الغيبة !! عاد واعيبا . . وا عيبا الشديد . . وا لوما إيه يعني الفسالي لزوما؟ أصلها هي تقول حاسدانا . . ما دايرانا نمشي برانا للفتة وشمارا وتوما . . ! *** فات يومنا الطويل واتعدّى وفاض بحر الخميس واتمدى بس لا بدّ رغم الموج نعدي نعومو "يا ود حاج . . " "يا لحّاق . . " وكل واحد قلع لهدومو *** وا جيد لينا . . اتعدّينا . . بي غادي و وصلنا الحجرة وطلّ علينا يوم الجمعة . . واتلمينا . . أولاد دفعة . . وساعة جينا . . جوّه الخلوة . . شيخنا نهرنا كورك فينا . . قال "بالله شوفوا البلوة" "شن كايسين كمان الليلي؟" "ما عارفنو يوم الجمعة ديمي بطالة؟" وعليك يا الله . . شدّيت حيلي . . وجَمَّع كل طرف في حماسي . . بس يا شيخنا اظنّك ناسي . . إنو الليلي يوم التالتي "يا جنا اوع تفلق راسي" "الطلبة الكبار بس يمشوا" "الدرديري . . طلحة . . و ودفزع . ." شوفوا البدع . . يا شيخنا أماني الليلي سويتلك وجع . .!! *** وعمّت فوقنا يا زول كَرْسة . . كرسة شديدة . . مدّت إيدا سلّت من قلوبنا الثورة . . وكانت ديكا أول ثورة للحيران . . "بس ليه نان؟! . . ليه ما نمشي؟!" "نحن كمان" "لازم نمشي . . !!" "والموت في الجماعات عرْسة . . !!!" قالا حميدي . . كورك فينا . . "الخواف ما بنريدو" "نشيل السيف نقطع إيدو" الخواف شَدّو شَدّو" "أحسن بي حناسة تعدو" *** واتعدينا فوق الدًّقْشِي ماب نقدر نخالفو حميدي ويللا بقينا . . نسكت نمشي نمشي ونمشي وقفتنا الأخيرة الأولى . . في " المنقولة" واتعدينا فوق الكبري واتخيّلنا إنو القمري . . طار فرحان . . وصفّق لينا . . بارك ثورة الحيران . .! *** ما همانا . . يا شًمّاتة . . لو سلخت رجولنا الباتا في الصنّاني ديك ماشين وبعضنا كانوا حفيانين بس لاكين . . نحن تملّي أصلو ضكارة . . ما بي نهاب جهنّم ذاتا . . !! *** واصلت المسيرة مسارا وساعة جينا في البيارة . . كنا خلاص تعبنا . . ودشنا . . لاكين هًشنا . . وكتين جاتنا ريحة الكًشنة . .!! وقلنا كدي ودفرنا الضلفة وشيخنا زعل وجاتو الرجفة وطارت من عيونو شرارة وطارت من كتابو "الغَرْفة" ما نضم اصلو . . ما قال حاجة . . !! بس لو شفتو منظر ايدو بي كرباجا . . كنتوا تعرفوا إيه بكرة الصباح راجينا . . لاكين في سبيل الفتّة . . راضين نحن بالموت حتى . . !! *** وقال كدي جانا أحمد بكري . . -الله يزيدو رتبة وهيبة- وينزل أمو منزلة طيبة رحّب بينا ونحن كمان سِخِينا . . قرينا بي إخلاص . . بعضنا سورة "الإخلاص" والباقين "سبّح" و "قد سمع" و "الناس" ليك يا والدة أحمد بكري *** خلاص تمينا شيلو الفاتحي . . ربنا يرحم المرحومة . . وجاتنا الفتة في صحناً كبير مردومة . . فايح توما . . ! وكل واحد ختفلو قصير . . ! وطار خوفنا القبيل . . واتحتا ما همينا . . تب بالبتّة . . إيه بكرة الصباح راجينا لو كانت جهنّم حتى . . إيه يعني الجلد بالسوط . . ! وإيه يعني الضرب "بالصرمة" . . ! اتحقّق هذف ثورتنا . . ما دامت طفينا القرمة *** وكانت ديكا أول ثورة للحيران . . يشوفا "قريرنا" مين كان غيرنا يعلن في الزمن داك ثورة . . ؟؟ مين كان غيرنا . . !!![/align] |
سلامات يا عكـــود
أسه حميدي ده يصنف علي أساس أنه رجل ثوري ولا بطيني؟ إنها حقا ثورة ونتيجة باهرة : اقتباس:
أما ما حدث صبيحة اليوم التالي فأظن "الفلقة" ورمت كرعين الثوار الأحرار خاصة بعد هضم الفتة أم توم .. وبعد عض "القصير" يبقي عض الندم :D ده إبداع جميل وهو أشبه بأشعار شاعرنا محمد حبيب كدكي الذي يحكي كلمات من لغة الشارع اليومية.. وهذا حسب قول سفيرنا الشاعر محمد المكي إبراهيم الشعر الحي النابع من الناس العادية... |
عزيزي عكود
تحياتي اقتباس:
|
[QUOTE=خالد الحاج;76199]سلامات يا عكـــود
أسه حميدي ده يصنف علي أساس أنه رجل ثوري ولا بطيني؟ : والله يا خالد ضحكت ضحك لامن دموعي مشن .... الله يجازيك ياخي |
اقتباس:
الجماعة ساعة الهوشة والكُشنة كانوا مستهونين الحكاية رغم بوادرها اقتباس:
حميدي ذااااااتو قال راضين نحن بالموت حتّى . . قال اقتباس:
شعر نابع من الناس العاديّة والكلام العادي حسّون رجل مبدع بمعنى الكلمة |
اقتباس:
كنت عارف متل النضمي ده بيستهويك . . وأكيد في مقاطع أخرى بيكون عندك فيها إضافات فأنت خير من يولي التفاصيل الدقيقة حقّها متل دي: اقتباس:
وما زلت عشمان |
[QUOTE=abu qusai;76381]
اقتباس:
أضحك الله سنّك يا قريبي . . ماك براك والله خالد إنتهى من حميدي |
[align=center]يُرفع لعناية العزيز أحمد طه
مع التحيّة لحسّون محمد سعيد.[/align] |
قبل أعوام خلت ، تلقيت دعوة كريمة من أبناء القرير للمشاركة في ليلة شعرية بنادي أبناء القرير بالديم ، كنت متوجساً ،، من باب ( ما تروحش تبيع المًيّه في حارة السقايين)! .. و بعد أن أدليت بدلوي مع دلاء أبناء القرير ، تعرفّت على حسون بواسطة الأخ إبراهيم الكامل الذي كنت أعرفه من قبل ، قال لي إبراهيم : ده عمّك حسون ! من كبار شعراء القرير ، و زميل دراسة لي عمك محمد طه عبد القادر في جامعة الخرطوم ، و زامله أيضاً في بنك السودان ، و تونّسنا ما شاء الله لنا أن نتونس ، انبهرت والله يا عكود بالعلم و التواضع و البشاشة و التلقائيّة ، بالمناسبة انا بعتبر نفسي زول سعيد كونو الصدف عرّفتني برجال أمثال إبراهيم الكامل و حسون، ، قال لي حسون ( إنت يا ولدي باقيلي تربية حبّوبات ) تعقيباً على قولي قبيل فيها الكُبار ما شافو بهديل زمن عيشُن مدقّق واْلمِي في النيل ولا فاتورة لا شيك دارلو تأجيل ولا عرفو الحرام واكلوهو زي (ديل) ! عكود انت فتحتلك جرحاً منوسر ، وانا الليلي بي ليلي ده دار اقوم اشوف ابرهيم الكامل بلودو وين ، لأنو الونسه معاهو بالدنيا كلها ،، إمتاع مافي بعدو !! بجيك صاد قطع شك .. الكلام ده قعرو بعيد خلاس! |
اقتباس:
أها دي صنقيرة إن بقي الموضوع عن دكتور إبراهيم الكامل عكود .. وكمان بجيك بي صينيتي ملايانة صحانة .. أي والله .. عندي قصائد لإبراهيم عكود ما نشرت قبل كده .. أبدها ليك بي قصيدة له ينعي فيها صديقه (يحي) رحمة الله عليه .. ورغم أن النعي جلاب أحزان إلا أن الحنية تطفر بين كلماته .. وإبراهيم زول شهم وحبوب .. لا أنسي قطعه لأكثر من ستة كيلومترات علي رجليه في شمس هجير الخرطوم فقط ليسلم علي وأنا في مكتبة نور الهدي في زيارتي الأخيرة للسودان وفي معيتي الحبيب معتصم الطاهر وقوت قلبه . ثم مقيله معي في البيت نهارية جميلة . (إنا لله ) يا خدير النيل فليلك وافليلي ويا هدير السيل كفاك الفات كفيلي أنا الفقدت أمين أغيب .. يمسك بديلي وفقدت ضمين أعيب يستر مثيلي فقدت الكان تغيت وراني ميلي ونجابق في الحلال والهيلو هيلي يوم بزمل في الجمال ودر دليلي والفرح ما تم بعدك ... يا حليلي ************** يحي كان حبل الدلو المالي بو إيدي وفي محاري الآخره ديدابي وحدودي وكان قمرتن هاللي واتمارت بعيدي وغيمة ما بتفرز وليدن من وليدي وكان غتا "التومات" و"آيه" وضو سعيدي ولليتيم عيد - للمريض إبرة وريد يحي كان فرح السجين مطر الهويدي بس الدوام لله ضاع هودي وقنودي ************** يحي كان ركوة تلوب ... والمي مسوحو ويحي كان قلم العمار للجف لوحو حقو فوق الزول مبغز وما بيبوحو إلا في حق زول "عكودا" سايم روحو وفشان حطام الدنيا ما كان من طموحو طينو كان الخادمو قدوس سبوحو وبعدو شال الزبده خللي الروب ضريحو متل مراير الفي الشتا ويليل جروحو ... راجعلك ... |
يحي كان حبل الدلو الماليبو ايدي و في محاري الآخرة ديدابي و حدودي و كان قمِرْةً هالِّي و اتمارت بعيدي!! و غيمه مابتفرز وليدن من وليدي خالد مالك علينا ياخي ؟؟ .. (بس الدوام لله ضاع هودي و قنودي) وجعة عميقة والله بعدين شوف (حقّو فوق الزول مبغّز مابيبوحو).. منتهى السماحة و العفة و الكرم ، وابراهيم الكامل نفسو من هذا النوع ... انا شخصيا حقو مبغز فوقي يعلم الله و مطنّشو !! غايتو الخلاصة... ابراهيم الكامل دا زول مابيشبه الزمن دا، ولا الزمن دا بيشبهو ، لا ازكيه على الله ، لكن انا والله ما رأيت مثله قط علما و تواضعا و زهدا و تدينا ، تديّن بالصح مش زي حق الجماعة ديل،، عندما سجّلت الإذاعة السودانية في رمضان الماضي عدّة حلقات مع الأستاذ عوض فضيل ، قلت له : غايتو الإذاعة لو سجلت زي حلقاتك دي مع ابراهيم الكامل تكون ابدعت ،، لكن زي ابرهيم دا يحاورو منو ؟؟؟ أشك إنو في زول مؤهل لذلك !!! |
[align=justify]سلام يا أحمد طه،
وإنت ماك الزول البيبع الميّه، إنت ركوتك نازّة ونقّاعا يشرب منّو الطير. قبيل فيها الكُبار ما شافو بهديل زمن عيشُن مدقّق واْلمِي في النيل ولا فاتورة لا شيك دارلو تأجيل ولا عرفو الحرام واكلوهو زي (ديل) ! زولاً يقول متل الحديس ده، يختّوهو وين بلا قدّام دكّان حسن الدابي! شهادتي في حسون وفي أبراهيم الكامل مجروحة، فالأوّل عم والثاني أخ وأسعدني حديثك عنهما وتواصلك مع إبراهيم، أقريهو عنّي السلام بالله و . . لا تنقطع.[/align] |
اقتباس:
مرثية يحيى من أقرب أشعار إبراهيم إلى قلبه، فكم سمعته يردّدها في كل مناسبة. صداقته مع يحيى (رحمه الله) كان كما وصفها تماماً: غيمة ما بتفرز وليدن من وليدي ما عندي القصيدة مكتملة، وأظن هناك أبيات ناقصة فيما أوردته، أذكر منّها بيت بيقول: يحيى الفي القِدِر فدع المغراف كم يعجبني هذا البيت! تسلم وليك المودّة.[/align] |
متعة ومتابعة لصيقة..
*مامان منو بالضبط؟؟هيثم من مسّاوي؟؟ |
[align=justify]سلام يا مي،
مامان عضو في سودانيّات وهو يُعتبر سحّارة أشعار القرير وما جاورها، رجل فنّان بمعنى الكلمة نشأته وموقع بيتهم القريب من حسن الدابي، محمد سعيد دفع الله وحسّون وصداقته ومزاملته للسر عثمان زائداً إهتمامه بالتراث، جعله مرجع للأشعار والحكاوي المطرّزة بأدب الشايقيّة، علاوة على أنّه أفضل من يعزف طنبور في المنطقة. مامان خرّيج كليّة الإقتصاد جامعة الخرطوم منتصف السبعينيّات ويعمل الآن بالسعوديّة و ليته ينفض غبار باسويرده ويفزعنا هنا. هيثم ده الجاب طاريهو منو هسّع؟ :eek: هيثم في نواحينا لا أسّع ما كِبِر. :D[/align] |
| الساعة الآن 12:28 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.