[كباشي]

المشاركة الأصلية كتبت بواسطة Babiker Mukhayer

سلام يالبقعة مبروكة الاله والدين
حباب الحرورك لا انتماء لادين
حباب السودنوك خلوك سمارة وزين
حباب الازهري النكس ذرا العلمين
حباب الراية هفهافة وتكيل العين
قولوا معاي تبارك اقول دقر ياعين


الحبيب كباشي
ما أحلى هذه الكلمات
وما أحلى الإحساس وجود شخص أصيل يشاركك حب السودان
الغيرة عليه والغيرة نحوه والغيرة له
إختيارك الحبيب للون علم السودان (ما بقول القديم، لأنو هو الأصل) يعكس إلتزامك وإنتمائك
بس عندي ملاحظة
أهلنا الإتحاديين من زمن الوالد عليه رحمة الله الزعيم أزهري
صادقيين، مصادقيين
هادئيين ومهدئئين
النفس الحار دا جبتو من وييييييييييييييين؟

الحبيب! لك الشكر في ما قلت، فهو حق في إبداء رأي
لكن بقول ليك
باكر إن الله آدى عمر، حأصوت إتحادي وببقىَّ ليا الحق في الملامة إن قصر في الحكم
وبعمل أنو الإتحادي يفوز بالأغلبية في البرلمان عشان ينفذ برنامجو
لكن؟ جد!! إن ما بقى عندو الأغلبية. ما بلومو وبالأخص لو بقى في موقف تحالفات ما منسجمة
ليك الف مودة

أرفع ساعديك ربك العظيم بتشوفها
حي أبا القديم وجديد بقت معروفها
قل الشهداء نارنا متلعبة ومكلوفها
لا ماتت ولا غمدوا البقيدو ظروفها

[align=justify]مرحب بالحبيب العزيز أخي بابكر
وشرفتنا بالمداخلة المتزنة والرزينة والتي تنم عن قلب كبير
ولك وللسيد الصادق وكل أهلنا الأنصار العتبى والمعذرة من كل رزاز صحب النقد أو تجريح تجاوز الحد .
وصدقت ناس أزهري ديل كانوا جيل الأماجد وفي زمان السماحة والصراحة والنفوس مرتاحة كانوا كبار صغرت أمامهم كل العظائم لكن نحن صغار وفي وقت الضيق وزمن العنصرية والتعصب وكل فرد لا يطيق الأخر وكل قبيلة أرفع وأشرف وكل حزب وطني وحده وأبو الطنية وكل جهة أطهر وأفضل وكل بقعة مهمشة ومستعمرة !! أحشاء تتقاتل وتتحارب وانت أظنك د. صيدلي على ما اعتقد وبلا شك تعرف أن ما يعجز الطب أمامه أمراض المناعة Autoimmune Diseases فيبدء لي إذا لم ننتبه فنحن في مرحلة تدمير الذات فلم يعد وقت للصمت ولا للفرجة من بعيد ..الجماعة ديك سلبونا الجلابية قلنا نقعد بالعراقي سلبوا العراقي قلنا نقعد بالسروال أها بعد دا والله ما بننهبش تب لا من كبير ولا صغير يعني ناس حربة وكوكاب ساكت ونفس حار !! والله يستر .

باكر إن الله آدى عمر، حأصوت إتحادي وببقىَّ ليا الحق في الملامة إن قصر في الحكم وبعمل أنو الإتحادي يفوز بالأغلبية في البرلمان عشان ينفذ برنامجو
أما دي يا ود مخير أنت مخير فيها لأني أنا لا أرى حزب إتحادي ولا أتوقع رجوعه حتى يرجع الأزهري وصحبه !!
أكرر إعتذاري على حرة النفس وشكيتم على الله أهلك الجعليين ما ورثونا غيرها والجعلي قالوا كل ما يكبر فهمه بقل ونفسه بحر .
شكراً على المداخلة القيمة .
[/align]