شيخنا زمان قالينا اذا صليت العصر و نمت وقمت ملتبسا فلا تلومن الانفسك وانا من الزمن دالك عامل حسابي من النوم بعد صلاة العصر الا ان انتهي هذا الخوف بالدوام البنتهي الساعة تمانية مساء و لله الحمد من قبل و من بعد لكن ظلت المشكلة ايام الجمع و السبت والعطلات الرسمية و الزوغات في المهمات الرسمية . المقدمة ضرورية عشان يوم داك و هو ليس بجمعة ولا سبت دقست بعد العصر و شفت ليك نفسي شغال عتالي في سفينة سيدنا نوح و بكري المايغباني رئيس وردية و رابط ليهو منديل اصفر ليهو كنار احمر فوق صلعتو زي بتاعين البوليس زمان قبل مايو المهم كان شغلنا نعمل سيتينغ للركاب من كل الاشكال من المخلوقات مع مراعات التجانس . و انا كنت زي المضيفة اقابل الحيوان من ديل علي طرف السقالة و اقول ليهو يور سيت نمبر بليز و امشي قداموا للمحل المخصص ليهو . وبكري يكورك سويلك همة .... خلصونا قبل المطر و واحد من الطلبة يقول يا ريس الكديسة رقدت في رف الفار و عاملة نايمة و واحد تاني يلعلع ود ابرق دخل بوست اقصد محل القمرية و اخر جاي جاري قال الكلب لحس خرتوم الفيل و الفيل نطه قطع حبل الصاري الريس قال ليهو اسحب باسويرد الفيل الطلبه قال كيف يعني الريس شخط فيهو اديهو بنج خدرو . وقفت علي السقالة جاءت العقرب شايلة جنياتها علي ضهرها و حسب الاجراءات ناديت ناس الامن والسلامة انتزعو منها الشوكة و طوالي وديتها الي محلها تحت بنبر خديجة ست الشاي . و خديجة ست الشاي قالت لي جيب لي شوكة العقرب من السلامة بخليها عندي مرات احتاج ارسلها تقضي غرض في بعض البوستات بسوليك معلقة سكر زيادة في شاي المغربية .
واقف علي السقالة جات دامة وشها ديناري و الباقي شيريا و عاملة كحل بمبي في شلاليفا و نبهتها لو سمحتي الدخول هنا ان كبل يعني زوجي فنظرت الي شذرا و صرت عين وفتحت عين ورفعت حاجب العين المفتوحة وخرجت الكلمات بصوتها المبحوح من كتر التدخين انا جامعة الدول العربية اجيب راجل من وين يعني .... يا سم .... نهرني الريس نادي ناس الصحة يعملو ليها فحص الايدز و يكرتنوها و ما تديها باس قيت الا بعد الفحص و اذا ناس الصحه قالوا اوكي دخلها في شوال وعلقها علي جنب المركب .
ودقة صفارة الراحة جريت علي خديجة ست الشاي لقيت ليك تحمص في بن و بدل الجنزبيل خاتي شفع العقرب تحمص فيهم و نشرب جبنة خديجة البهاراتها عقارب دي و نواصل .
|