[النور يوسف محمد]

المشاركة الأصلية كتبت بواسطة أسعد

حبيبنا يا عمدة
ياخي بوستك ده قدر ما نفضتو ما لقيت فيهو وصفة لمرض حامد.
عموما مرض الحامد من الدرجة الاولى مقدور عليه وعادي الانسان العزابي ممكن مع شوية حمية غذائية وعاطفية يتصالح مع المرض ده، لاجل ذلك عملنا جمعية (أصدقاء مرض حامد) في مبادرة سلمية غير مسبوقة جعلت المريض والمرض في سروال واحد.

لكن ياريت لو تشوف لينا وصفة شافية وكافية للمتحور بتاع المرض ده او ما يتعارف عليه علميا بـ (مرض حامد بلس)، وايضاً متعارف باسم (متلازمة صفيحة الطحنية) بناء على الاسم الذي اطلقه مكتشف المرض العالم السويدي انديرسون بتارسون حينما اكتشف تطابق رهيب بين مرض حامد بلس ومعضلة صفيحة الطحنية عند سيد الدكان. حيث لاحظ البروفيسور بتارسون ان سيد الدكان تتملكه شحتفة وكرشة نفس لمن يشم ريحة الطحنية ساااي فما بالك لو فتحها، وبعدما كانت الطحنية حلم حياة سيد الدكان في طفولته ويكره ملاح الروب، ولكن بعد ان امتلك صفيحة الطحنية اصبح حلم حياته ان يأكل ملاح روب او حتى كسرة بي موية ساااي.
هنا ادرك بتارسون ان حالة سيد الدكان مع صفيحة الطحنية تتطابق الحافر على الحافر بالحالة المرضية الميئوس منها (مرض حامد بلس).

فياريت تشوف لينا وصفة نلحق بيها حالة منتهية كلو كلو بنواحي الدمازين.

وانا هنا ما ح اقدر اقول اني اقصد الرشيد علشان ما تعرفوهو من اول حرف (سمايلي فيس شرير)