* السنيور صرفة،
والبئر المعطلة عندما تنتج موية
تروي جوانا العطاشا
مو دعاشة،
جائي ليك يا نورة غيمة..
* شعب السودان، بدي للجيعان لقيمة
وبدي للعطشان جغيمة،
وما فكرة التكايا ببعيدة عن الاذهان، انها تجربة مذهلة حفظت كرامة الكرام والكريمات زمنا صعب، اه زمنن صعب..
* الابيض عطشانة، ضرب الجنجويد محولات الكهرباء،
ومولداتها، ضربوا محطات المياه
* لم ينتظر صرفة لان العطش ما بنتظر، ولا يُقاوم
ابتدر التبرعات، تبرع ب20 الف دولار،
* تحرك مصطفى محمود والرفاق، الابيض ما بعيدة، والمسافة ما سنة..
* في ظرف اسبوع عالجوا مشكلة 21 بئر، مدوها بالطاقة، فانسابت الموية نضيفة في المواسير، غطت 70% من حوجة اهل الابيض المدينة الصامدة..
* ولسه الابار ماشة في زيادة،،
* وهذا المشروع الكبير تم بتعاون كامل من حكومة وشعب الابيض، مدير الموية عارف الابار موقعها طاقتها، ومداها،، وكل الشعب وقف حتى انسابت المياه، وهسه برضو حا يشوفوا المرافق الصحية في المدينة الأبية..
* مصطفى محمود والكردفاني والرفاق ماشين بارا، وحا يجيبوا اخبارا، عشرون بئر هناك، وماشين كوستي، برضو في مشكلة عطش في حي هناك..
* صرفة قيادة وكاريزما ويمتلك عنصر المبادأة
والمبادرة.. ووراهو شعب،
* ويارب تعم الموية النضيفة والرغيفة كل بلاد السودان، ويعم السلام، ويصبح الجنجاويد مجرد ذكرى مريرة مرت من هنا،، وانتهت للابد،
|