الأخ شوقي ..
لك التحيـة ..
أخوانا المصريين زمان قالوا "السفيه شـتم الباشا" ، والدكتور المستشار شتم الشعب السوداني وكأنه هو إستثناء أو أنه من سلالة لويس السادس عشر .. الشعب السوداني الشحات هو من أخرجه من صلبه ولكنه للأسف خرج عليه مع الخوارج بزعامة شيخهم المتآمر .. وأحسنت صنعاً بتبيانك تنكره وغدره بشيخه .. هذا الغير مصطفى هو أحد محن الشعب السوداني وهو لايملك المؤهلات المطلوبة لوزير خارجية في جزر الواق الواق ناهيك عن السودان .. أبسط شيئ مظهره المذري فلم أره يوماً مرتباً لشعر رأسه أما منطقه الأعرج فحدث ولا حرج .. ما زلت أذكر تنابذه بالألقاب مع وزير الخارجية الأريتري (الرجل المهذب) في حوار تلفزيوني قصّر رقبتنا فيه أكتر مما هي قصيرة.
الشعب السوداني الشحات قبل أن تسلبه الإنقاذ حريته وحقوقه كان بيشتري كيلو اللحمة الضاني ب 4 جنيه وكانت زجاجة البيبس ب 3 قروش وعلبة التونة ب 5 قروش وعلبة اللبن الحليب ب 16 قرش والدولار ب 4 جنيه والأهم من كده كانت القروش عند أولاد الناس ومعروفين بالعدد وعلى سبيل المثال وليس الحصر .. أولاد النفيدي .. جابر أبو العز .. ابو العلا .. عبد المنعم محمد .. ابراهيم طلب .. الحاج أحمد أبو زيد .. الشيخ مصطفى الأمين .. الكوارته .. أبراهيم مالك .. (صحيح حتى من ضمن الرأسماليين ديل كانت هناك تجاوزات عديدة ، لكن مع ذلك كان السندوتش ب 3 قروش وتذكرة الباص الخرطوم /أم درمان بقرشين ونص والطراحة بشلن) وما أحلاها شحـتة .. يا سيد مصطفى.
وكان كل قرد ماسك شدرتو .. حسـع القروش عند السماسرة ولصوص الإنقاذ الغربي والشرقي والمتعافي والشعب عيان
معليش أسئلة غير بريئة يا درش .. إنت جار النبي ده منو ؟ وأصلو من وين ..؟ وجاب القروش من وين الإشترى بيها الإمتياز بتاع شيفرون ؟؟ وكيف أداهـو الإنقاذ ؟ وقاعدين تبيعوا البرميل بكـم ؟؟
لك الود يا شوقي
|