[أبو أماني]

المشاركة الأصلية كتبت بواسطة ابو المجتبي

امانة ما وقع راجل يا ابو اماني
امانة ما وقع زول
يا سيدي الرئس اجمد حبة وما تخلي البنسيات القلبن لسانن ليك ديل يطيرو قلبك ونافوخك
يا اخي لو حالتك بالوصف ده قطع شك سقوك الابري الاحمر والابري الاحمر ده عادة بستعملو في الكتابة والمحاية غايتو شكلها كدي ام اماني واخواتها شافو ليهم فكي كااااااااارب وسقوك البتاع داك في الابري كدي اتذكر معانا اخر مرة شربت ابري متين؟؟
والله من يوم البنات ديل ما اختفو من القهمة ام اماني وامال وتحفة وسارة وروب س بيني وبين نفسي كدي قلت النسوتن ديل اتوزعن علي الفقراء بي قصد اها اتاريهن جاريات فوق دربك لمن رموك علي خشمك يا زول استهدي بالله وخلينا نشوف لينا فكي اقوي ونجيك راجعين
لا حول ولا قوة الا بالله
لا حول ولا قوة
امانة ما كتلنا في زول
تحفة سويتو شنو؟؟

* * *
صدقت والله يا أبو المجتبي .. النسون ديل سون لي شيتا ماني خابرو.. (أظن قصة البعر دي بقت على جد جد .. ما تقول أم أماني متلفسفة ومرة مرة بتخش الويب صايد.. والله أنا قلبي أكلني عديل كدي .. تكون عملت لينك مع ناس شنكبة عنكبة ديل.. عليك الله يا صاحبي شوف لي حل)! بعدين كلامك عن الآبري اللحمر وغوشني بلحيل..لانو مش ممكن تكون مصادفة.. كل يوم والتاني جك حلومر نديان وكباية جمبو تخلى اللعاب يسيل وأخوك يشيل ويكتح.. هسع دي في زمتك نحن وين ورمضان وين .. كان مانصايب حريم ساكت! وكمان القصة إتزامنت مع أيام سرورة علقت بوستيها بالظبط .. وصدقني اليومين ديل بقيت حالتي تحنن الكافر وتكوفر الحنين .. يا أخي أم أماني كان نادتني ساكت تلقاني زي غفير العمدة في لحزة قدامها واقف إنتباه ..وأقرب أندمج في الدور وأضرب تعظيم سلام وأقول ليها .. أفندم يا حضرة العمدي.. وبقت ترسلني عاااااادي أي مشوار .. اليوم داك عندها صاحبتها جات تتحنن معاها قعدن لك في الهول الماخمج .. ولما عاوزين يلخو الحناء لقوها شوية .. أها زولتك ما اتلفتت جاي ولا جاي .. طووووالي كوركت لي .. وزولك زي البرق وفي لمح البصر بقيت قدامها (ماعارف ليه اللحظة ديك مر بخاطري مسلسل توم آند جيري).. قالت لي هاك أمشي العطار جيب لينا كيسين حناء ماركة أبو كف الهندية أوعى تجيب لي حنة التاج ..وجيب معاك سرتية .. فااااهم؟ سرتية يعني ما محلبية .. المحلبية الجبتها المرة الفاتت ليوم الليلة قاعدة .. يقعد فوقك شنو يا يابا .. إستغفر الله .. ومشيت أفتش لي شبشب في غرفة النوم عشان أمرق بيو بسرعة .. أسمع ليك صاحبتها متعاطفة معاي .. وبصوت كلو حنية .. حرام عليك يا أم أماني .. الراجل ده تهرشيه قدر ده..! (وهوغان) الله يطراها بالخير .. قالت ليها .. أسكتي يا إحسان .. ده هارد كبدتي ومصاريني .. ما تشوفي مسكنتو دي والله دغيل جنس دغالة .. وكان قام على جنو .. حتستغربي.. بعدين الرجال ديل ما بنفع معاهم عيلا العين الحارة..ولما حست بي لسع بتلكع في غرفة النوم .. يا راجل بتتمحرك مالك؟..الكع جيب لينا الزفت ده ..
عليك الله ما تتأخر زي المرة الفاتت .. تلاقي واحد من صحبانك وتقعدوا تتونسوا في الفارغة ومقدودة .. عضيت جلابيتي وفللي على العطار .. وأنقروا في دكان العطار لقيت منو؟ لقيت ليكم صديقي العزيز عادل عسوم .. بيتكلم مع العطار بصوت حاول يكون هامس لكين كت في اللحزة ديك .. وراهو بالضبط وسمعتوا قال للعطار .. عليك الله يا أخي القي عندكم بعر تيس؟ ولما اتلفت شافني ارتبك وبدل يسلم على ويقول لي أهلا أبو أماني .. قال لي أهلا أبو سارة .. الحقيقة جيت هنا كايس الحبة السوداء موصيني ليها واحد في المهجر .. ومن اللخمة خلى سيارته واقفة وقعد يكابس في باب سيارتي ... المرض ... اللللللل !...
أبو المجتبى عليك الله وأبوس رأسك (بعد الحمام طبعا)! شوف لي حل حالتي بقت كرونيك .. أها ودعتكم الله.. شايف أم أماني ماشة على.. اللهم لا نسألك رد القضاء إنما نسألك اللطف فيه ياااااارب ... يا ربي تجيب العواقب سليمة ..