[عادل عسوم]

[align=center]اخواتنا في درب البياض صرفن كتير وضمّة ماخلّن حَتيتي
كان زمان روز أو ديانا وحسّي جات أسماء عديدي
فيها كمّين واحد مسوح وناس تبلّع في حبوب كيفن غليدي
وكل يوم شيتا جديد بعضو مصري والكتيرساوّنّو كيري
الوشي بالليل عاد يراري والصباح تلقاهو زي ضهر الخريتي
في الحفلة تتمارالك (صباح)! زينة وبياض زي الرتيني
لكن كمان شوفة اللّيدين تعرف زويلتك الماتغباك (فلاني)
دة كلّو من (قدّر ظروفك) عاد تحوق بي وين الدهيني
شكيتو (أمبو) كم ظلّط جضوم وياما سوّا سواة الهريتي
وواحدن كمان عاد بس سبوع يدبغ دبغ مفعولو فوري!
تمنو بي شيتا فلاني ومايهم جيبوهو انشاالله من هلسنكي
أخواتنا وبناتنا دة كلو زئبق وكورتزونن سمّو هاري
يسبب أمراضا كتار شيتا خبيس والعجيب فشل الكلاوي
وكمان بقينا في قشير جلود تحلف تقول بيضة جدادي
يمشكو بي شيتا دراش قالوا (بن) عجنوهو بي موية زبادي
والعندها (فلّة) تمرقا في (ابن سينا) الجلسة بالشي الفلاني
الله يحفظكن بناتنا لا تبالغن وختّن الرحمن وقايي
مين قال جمالكن في البياض ماتنسو تسألوا ديك (نعومي)
مالا عاد خدرتنا الدقاقة أو سمارنا الغنّالو وردي
وأسمر جميل فتّان و(ياسمرة) (ياالزول الوسيم ياهادي)
ماالسمار من طينّا وجروفنا والخدار عاد زينة بلادي
ماالسمار من طينا وجروفنا والخدار عاد زينة بلادي [/align]
[align=center]عادل عسوم 2005[/align]