[أبو أماني]

المشاركة الأصلية كتبت بواسطة تحفة حوا

يا بنات وين أبو أماني
يعني الليلة عدم شراب القهوة ما عمل لي صداع شديد ولا قادرة أشوف
أبو أماني عسى المانع خير

يا ولد (حقوس) جيب قهوة كااااربة لست الكل وشيشة بحجر من إختيار (رشا)!..أولا سوري غبت اليومين ديل عنكم لشوية مهام كلفتني بيها حرمنا المصون أم أماني أطال الله عمرها وعود مفراكتها آمييين..أسكتي يا تحفة يا أختي أنا ممغوص جنس مغصة..سرورة عملت فيني فاصل سيدنا أيوب ما يصبر عليو .. شفتي الصورة حقت النصيبة الجابتها دي؟ غايتو يا تحفة (سرورة) دي فاتت ليك أمال ظاااطها ..وقات ليها إتي بتعرفي شنو لعكننة أبو أماني!..والعروس الجابتها لي بسم الله ما شاء الله.. نان هي جنس رحرحة وبحبحة .. معقولة يا أخواني في ناس بالرشاقة دي؟..عروس لقطة بشكل! وسمحة المهلة يا وليدي.. وغرتك لصرتك يا يابا محل ما تمد إيدك تحمد سيدك..أنا ما مزعلاني العروس المزعلني الخباثة الجديدة الظهرت عند سارة دي .. تصوري إنها بدبلوماسية أشارت بطرف خفي لأنو الكتب الرسالة في الخاص وطالب العروس هو الفقير لله تعالى .. الغنيان سماحة.. والطالق في الناس النارية والكتاحة .. سيد الوجاهة أبو أماني ..! .. والمزعلني بالأكتر .. ضرتي عادل عسوم .. داك كمان يا إتي ما صدق طووالي شب في الموضوع .. ولبسني الطاقية .. أصلو من زمان كايس ليو فرصة زي دي فوقي .. أما الحبيب تربيع (شبارقة) فطبعا فرحااان طائر السماء .. لأنو مرق منها زي الشعرة من العجين ووقعت فوقي أنا .. أنا أبوك يا أماني .. بركز ليها مكره أخاك لا بطل لكين أصبر يا شبارقة
مردودة في مناسبات (سارة) يا أخوانا البفكني شنو من سارة دي..حتى في الدعوات طالعة لي!

أبو ريم .. هوووي .. الحقني يا با أصلو ماعندي صليح في سودانيات غيرك خسوسا بعد زوغة الرائع نزار .. البحلني شنو من الورطة الوقعتني فيها سرورة دي؟! أنا غايتو قبلت بالقسمو لي ربي .. الدبارة كيفن يا أخوي كان لقصة الكساء والغذاء ما في مشكلة .. عندي عمي عنده محل أقمشة .. والأكل عندنا دفار والسوق المركزي قريب .. الكلام في البيت البيشيلها وغرفة النوم والسرير الدبل .. السرير الدبل لازم يكون XXXL ومصمم من الخراسانة والأسمنت المسلح .. والمرتبة إسفنج مصلح .. المشكلة في موقعي أنا من الإعراب على ذلك السرير!!

يعني بيني وبينك يا أبوريم (عادل) الجمجار ما يسمعمنا..إفرض إنو نحن نائمين والنوم سلطان وقالت كدي إنقلبت على ساااي.. على الناحية المكرفس فيها أنا بي جاي.. باقي ليك آ.. عشاي ناس سودانيات عن بكرة أبيهم تاني يوم ما بتلموا في أحمد شرفي؟!.. والنصيبة كمان أكون محشور في كفن ومسجى على عنقريب بلا حراك وسامع كل شئ حولي .. أسمع ليك الردحي والحي وووب والفاتحة .. وصوت ما قدرت أميزه .. بقول للمعاه .. والله قالوا أذكروا حسنات موتاكم .. لكن زولكم ده .. غايتو الله يرحموا كان فاكيها في روحو فكة .. عامل فيها سمح ودمه خفيف، فتح ليو قهوة نشاط في سودانيات وقعد يبرطع فيها والله يا أبو ريم قدر ما حاولت الغي جنازتي وأقوم أشرط الكفن عشان أعرف البتكلم ده منو .. تب ما قدرت .. عموما في لقاء قادم .. حا .. أقول ليكم تفاصيل التعليقات السمعتها وحافظها أثناء موتي .. فلنا عودة ..
أخوكم المرحوم .. شهيد واقعة (سرورة) ... تشاوووو