[عادل عسوم]

حبيبنا
ذكرتني ايام الثانوي...
الجماعة يجيبوا لي الجوابات وعاوزين الردود!
-بالله ياعادل زولتي دي كتّابة وأنا مابقدر علي رد كلاما الكبار كبار دة بالله ظبط لي رد مدنكل كدة عشان أوديهو ليها
وأمسك ليك الجواب وأقراهو...
وطبعا هناك كم سؤال لازم أسألوا لي كل واحد:
1-أنتا زولتك دي بيضا والاّ خدرا؟
2-سمينة والاّ دار تموت بالضعفة؟
3-أهلا مروقين والاّ كُحّيتي؟
وطبعا السؤال الأخير دة بتترتب عليهو الكثير من الألفاظ والمعاني
وبعد كدة أقعد وما أخلي ليك جناس ولا طباق ولا محسنات بديعية ولامعاني قريبة وبعيدة ولا كلمات على شاكلة المزازيني بيها أبو ريم ديك وكدة
أها...مرة واحد صاحبي شبك مع واحدة كتّابة كتابة جد (ودي بالجد كانت أكتر واحدة ردودا بتتور نفسي)
المهم بعد فترة كدة صاحبي دا يوم جاني ليك وشو ينعل قفاهو
-يازول مالك من الصباح؟!
-ياخي أسكت بس
-شنو يا(...) ياخي ورينا الحاصل شنو؟!
-ياخي ماكللللو منك أنتا دا ...تقعد تجيب لينا كلماتك العجيبة دي لامن ودرتنا زاتو
-كدي قول بسم الله ووريني الحاصل؟!
-أمبارح زولتي بعد ما أتونسنا مسافة كدة قامت فجأة قبقبتني ليك وقالت لي أنا متأكدة مليون في المية أنك ماقاعد تكتب الردود البتصلني دي!
فقعدتا أتحلّف ليها واتمحرق ...قامت سألتني ليك وقالت:
-تقدر توريني معنى كلمة (اندياح) يعني شنو؟
-أها قلت ليها شنو؟
-أنا عارف؟ المهم طربقت ليها كدة وفي النهاية وريتا انك القاعد تكتب الردود...
قامت راسا وألف سيف الاّ أعرّفا بيك