19-07-2009, 04:27 PM
|
#[1106]
|
|
:: كــاتب نشــط::
|
اقتباس:
المشاركة الأصلية كتبت بواسطة مرافي
|
والله حرام عليكن إنتي وسرورة واحد مات شبع موت تعملو فيو كده!.. العروسة الفاتت ما ودتني الآخرة .. يعني ما سمعتو ولا شنو .. أذكركم بجزء من مقال سابق :-
وسمعت كل كلام المعزين من أهلي قبال يطلعوا الجنازة .. وسمعت حتى تعليقات كل الراحوا الدافنة مرافقين الجنازة ليستوثقوا أن هذا الفقيد قد لزم مثواه الآخير ..
لنا عودة مع تفاصيل ما سمعته وانا ميت من معظم المعزين .. والله يصبرني لحدي ما أفت ليكم كلام الحبيب أمير الشعراني الذي قاله عني في المقابر .. أمير .. أمير! .. أنا كان رجعت تاني غايتو ... ب.. ب.. بو.. الباقي تموه خيااااال !.. لقاءنا القادم .. أبقوا معنا
* * *
أولا وقبل خروج الجنازة من البيت .. وأنا في آخر زيارة للعنقريب (الزيارة التالتة) سمعت ليكم أصوات تشنجات وهمهمات وبكى مكتوم استطعمت فيه الصدق صادر من أولادي وبناتي اللي إتلموا مع أمهم حول الجنازة ومعهم بعض الأقارب خالس ناس أخوات وبنات خالات وكده .. وطبعا أنا بمييز الصوت حق منو لاكين ما بشوف حاجة ولا بتحرك ولا بيطلع مني صوت طبعا بحاول لكين بي وين يا فردة .. إنت نسيت إنك ميت ولحقت أمات طه في قانون الجماعة ديل؟.. وأنا في أثناء الرقدة العجيبة دي تضوقوها بعد خرف إنشاء الله .. أسمع ليكم صوت ميزته تمام لاني صابر أسمعه كم وتلاتين سنة .. صوت أم أماني وكان مطعم بشوية ديكور حزن شي خنخنة وشئ نخنخة وشي (تينيهف) كان تمثيل الحزن واضح لكين كطعتو في السوداء..وغشيت روحي قلت تكون عاملة فيها تقيلة قدام الحريم .. وهي جمبي وأنا سامع كل شئ دقست وقعد تطنطن بصوت شبه مسموع .. تعرس فوقي أنا ؟! وكمان جايب لي ضرة كاطعها من رأسك براك .. تسمع لي كلام ناس سودانيات ناس تحفة ومرافي ..؟ طيييب أكان حديت عليك يوم واحد أبقى زيييك .. وبصوت هامس موجه لولدها (فادي) يظهر عليو واقف جمبها .. أسمع يا ولد .. فتح عينك زي الريال أب عشرة..شنطة الصامصونايت حقت أبوك اتحفض عليها ختها في دولابك.. جنسو زول ما يهبشها .. وكمان قفل مكتبة أبوك والأدراج وخت المفتاح في جيبك أوووعك تفتح الخزنة حقتوا في غيابي..فاهم؟.. وكتلفيزيون السودان إنقطع الإرسال فجاءة..وتشويش راداري فجاءة سمعت صوت عمي إقتحم الغرفة وبصوت آمر .. إنتن يا نسوان الجنازة دي خاتنها ومتلمين فوقها كدي مصبرنها لمتين؟..قاعدين تتغزلوا فوقها.. ولا عاوزينها تبيت معاكم الليلة؟ بقدرما عجبتني سخريته اللاذعة .. آلمني إستعجالة بإرسالي لمصير مجهول للجميع .. وصاح ثانية أرفعو العنقريب ده يا أولاد ..
شعرت فجاءة بعنقريب الجن ده بقى زي قارب صغير في خضم من الأمواج ا لمتلاطمة.. ويعجبوك أخوان فاطنة في لحظة زي دي .. يمين شايلني متل التكنو شايلين ليهم شيلة عريس مودنها لعروس..وفضل الظهر شغال تش..كرعين العنقريب الأربعة ما في زول في الحلة ما شالن بالله العظيم مشوار المقابر من بيتنا لما كت حي بقطعوا بخراج الروح بكرعي في يجي نص ساعة..النفس يطلع وينزل والعرق يقول يا غرتي اليوم داك التقول مركبني سياحي دقائق مافي أسمع ليكم صوت كرعين العنقريب تج في الواطة..في المقابر .. تقول لي عرفت كيف؟ أقول ليكم! طبعا أنا زول ميت وما عندي علاقة مع الحيين غير أسمع وبس .. دخلتهم المقابر أشوف ليكم المدفونين كلهم في إستقبالي .. والمتوفيين كلهم ظريفين وودودين شابكني ليك الف حمد لله على السلامة الجيت من دار الهم والبلاوي ديك ! بيني وبينكم تجة العنقريب في الواطا بإهمال زعلتني بلحيل وفي كفني بجوه قعدت أكورك..ياعالم ياهووو.. خلو عندكم دم شايلين قش إنتو؟.. الراقد ده ما بني آدم .. وضاع صوتي في اللامنتهى .. ولم يسمعه غيري .. غير أن صوتا آخرا بداخلي إنطلق يكايدني بسخرية مريرة .. قلت شنو؟ الراقد هنا بني آدم ؟..بي وين يا فردة.. ده كان قبل شوية..دلوقت إنت في نظرهم.. جنازة.. يعني فطيسـة! شويتين كده يا معلم حتواجه حفرة كئيبة مظلمة ويجو (2) يزوزوا بيك.. وأسيئلة في إجازة أكاديمية ما مرت عليك.. بعدها تتحلل ودود ينخر وحاجات تانية حامياني .. يا أبوي سيب الفصاحة وموت موتك بأدبك .. وبيني بينكم كده رغم موتي البائن شعرت بدقات قلبي .. زي مدفع .. وحسيت بعبرة سادة حلقي بلعتها بصعوبة .. نواصل في الحلقة القادمة لحظات .. فبيل الدفن .. وما تلاها .. تشاوووو
|
|
|
|