[محمد الامين مصطفي]

المشاركة الأصلية كتبت بواسطة Wad Elbeck

[align=center]بين اليوم والأمس ..[/align]

[align=center][/align]
[align=center]رحلة علمية مع قسم الإنتاج الحيوانى .. منفالوط- العام 1986[/align]

[align=center][/align]
[align=center]ثم بعد ربع قرن من الزمان .. الدوحة -العام 2010 [/align]

ود البك يا عملاق 00 والله رجعتنا للزمن السمح 000 ولسع بتكرف في مساماتو الندية 000 الله يريح عليك 00 يا اخي عبد الماجد هو هو لم يتغير بس ما شايف كترابة بتاعة دخان يا سلام عليك يا عبد الماجد كنت فريدا ومتفردا وواثق الخطوة تمشي ملكا 00 فيا اخي قول لينا عووك لانو عووك تكسبنا العافية والصحة وتملا مساماتنا بالفرح النبيل 00وبهذه المناسبة اهديكم هذه القصة وكذلك الاهداء لدكتور الجيلي ودكتور الزوول ودكتور منتصر ودكتور عليش ودكتور كمال وكل الدكاترة الاسايطة وخاصة الدكتور طارق ود بحري الرجل المبروك وبالمناسبة العب طالب جامعي اشاهده شكرا لدكتور الجيلي الذي اضاء به البوست 000

الاهداء 00 انه للفاتح جبرا 000

جارى فؤاد ما أن نلتقى حتى يشكو لى الست (زوجته) فهى كما أخبرنى قد أحالت حياته إلى جحيم وحولته إلى (فأر تجارب) .. والقصة عزيزى القارئ أن زوجة أخينا (فؤاد) مولعة بل مدمنة على مشاهدة (البرامج الطبية) التى تبثها معظم القنوات الفضائية هذه الأيام والتى يستضاف فيها الأخصائيون فى كافة فروع الطب (الأصيل) والطب (البديل) وطب (الأعشاب) والطب الما عارف شنو داك .
ما أن يعلن فى أية حلقة تبثها هذه الفضائيات عن دواء أو (إكتشاف جديد) يعتقد أن فيه شفاء لأية علة كانت حتى تهرع زوجة (فؤاد) لتطبيقه عليه :
- شنو الخيار (الرادماهو) ليا فى الصينية ده ؟
- أسكت ساااكت .. والله الدكتور البجيبوهو فى قناة (الطبية) قال الخيار ده أحسن حاجة للضغط ! وكمان بيقوى الذاكرة وبينعش خلايا المخ !
يقوم (فؤاد) بضرب عدد مقدر من (الخياريات) بناء على نصيحة زوجته ثم بعد أن يصاب بتخمة خيارية (ياخد ليهو نومة) فيصحو وهو يحس ببعض علامات الجوع فيتجه نحو (التلاجة) ويخرج بقية (صينية الخيار) :
- (تمسكها منو) : شنو الشايلو فى أيدك ده !
- ده ما باقى الخيار الفى الصينية . !
- (تسحب منه الصينية) : لا أوعك .. هسة دى الدكتور بتاع قناة (سين بين إن) قال الحبوب الموجوده فى الخيار دى بتعمل حصاوى فى المثانة !!
يقول لى جارى فؤاد ، لم يمر يومان حتى إستيقظت من نومى صباحاً لأجد أمامى ثلاث زجاجات (حجم عائلى) ممتلئات بالماء وأمامهن كوب :
- إنتى الليلة عازمة ليكى ناس ؟ شنو قزاز (السفن آب) ده ؟
- ده ما (سفن آب) دى مويه عادية ساااكت .. إنتا ما شفتا (الدكتور) بتاع قناة ( الطب البديل) قال شنو؟
- قال شنو؟
- قال ليك مفروض الزول أول ما يصحى من نومو يشرب ليهو تلاته لتر موية عشان (الكلى) بتاعتو (تتسلك) والكبد يقدر يقوم بى مهمتو .. ده غير إنو الموية بتخلى (الصفائح الدموية) تحافظ على سيولتها !
هنا إلتفت إلى صديقى (فؤاد) وسألته :
- أها وشربتا التلاته لتر موية ؟
- (وهو يضحك) : إنتا جنيت والله لو شربتها كان مشيت أحمد شرفى !
- وطيب عملتا شنو ّ
- غايتو شربتا ليا كباية كبايتين .. لكن دى مش المشكلة !
- المشكلة وين ؟
يواصل فؤاد : فى اليوم التالى صحوت من النوم وأنا أحس بالعطش نسبة لسخونة الجو فهرعت نحو التلاجة وأمسكت بإحدى زجاجات المياه (الحجم العائلى) وما أن شاهدتنى حتى صرخت فى قائلة :
- أقيف .. أقيف أوعك تكمل القزازة دى .. عشان الدكتور البجيبوهو فى قناة (خليك معانا) قال شراب الموية الكتير بيؤدي الى انخفاض معدل (المغنيسيوم) في الدم وبالتالي إنخفاض فى دقات القلب وإحتمال الزول تجيهو دوخة ويروح فيها !!
قلت لجارى فؤاد مواسياً :
- ياخى الولية خايفة عليك وحريصة على صحتك وكمان بتثق فى كلام الدكاترة البجيبوهم فى التلفزيونات ديل !
- يا أستاذ ديل مش دكاترة .. فى مبدأ فى الطب بيقول ليك .. (لا طب إلا والمريض حاضر) .. ده كلام قنوات ساااكت !
- لكن يا فؤاد ده هسه كلام عام وإرشادات ساااكت.
- إرشادات شنو ؟ أنا ما تميت ليك القصة ..
وبدأ فؤاد يكمل القصة ..
أمبارح جيت من الشغل وبعد ما إتغديت ورقدتا .. لقيتا قاعدة تشاهد فى قناة (الطب للجميع) عندهم فقرة إسمها (كيف تتعلم الجراحة فى تلاتة أيام) ، المهم خليتا تتفرج وأنا أخدتنى نومة وبعد مسافة صحيت ليك بى كركبة لقيتا ليك ماسكة سكين المطبخ وواقفة قدامى :
- شنو شلتى ليا الزائدة؟
- زائدة شنو؟ أنا عملتا ليك (كبدة فراخ) ما حصلت عشان الدكتور قال بتشيل (السكرى) وتمنع التجلطات.
كسرة :
قال لى فؤاد أنه لم يكن يعانى من السكر قبل رؤيته للسكين والهجمة الحصلت ليهو !!