[رأفت ميلاد]

المشاركة الأصلية كتبت بواسطة Hassan Farah
----------------------------------------------------------
جدو رأفت صباحاتك بالخير وان شاء الله البرد ما دخل عليكم ...
والله مش عارف ابدأ ليك من وين؟ خلينا نتفق حكايتنا كلها تدور بين شارعين او 3 بالكتير: عندك شارع الكنيسة يبدأ من السوق وينتهى عند الخور الكبير وشارع مدرسةكمبونى للبنات وايضا يبدأ من السوق مرورا ببيت ناس عبدو بتاع رفع الاثقال ثم نادى المريخ القديم وينتهى ببيت ناس اسامة... اولاد اغا اتنين عمنا يوسف ويجاوره عمنا عمر .. ابنه محمود كان صديق الروح لشقيقى عمر سكرتير نادى الزهور...نحن فى الاول كنا مأجرين بيت يوسف الخليفة عبدالرحمن ميدان المريخ الحيطة بالحيطة.. ناس جحا بالجوار ايامها كان تمارين المريخ يشترك فيها ناس عمك طلب وحسن العبد وعمك شرفى.. وعمنا شرفى كان تخين لكنه شوات ويقال مرة شات الكرة فى المرمى الشرقى فقد الشبكة وفى نفس الوكت انقطعت التكة .. فقام جارى وانقطع فى احد البيوت ومن داك صارت عليه
شرفى ابتكات قد الشبكات الوقت داك ناس اسامة ووزة والاستاذ هاشم محمد عثمان لم يصلوا مرحلة النجومية
عمنا يوسف الخليفة الله يرحمه كان من خريجى الازهر راجل له نشاط واسع وكان يعمل فى مدرسة وادى سيدنا مرة تلقاهو لابس اللبسة الازهرية بالقفطان والطربوش ومرة يغيرها ويلبس بدلة افرنجى... الطلبة اولاد حرام اطلقوا عليه لقبين على حسب اللبسة: يوسف افندى والفتيل!!
اخوك والحمد لله حكومات الصادق تقريبا كلها ماحضرتها فى السودان بعد اكتوبر انا كنت فى روسيا وبعد نميرى انا فى الجزائر وبالتالى ناس عباس ديل ما عرفتهم ...لكن فى عباس اخر ..تاجر اقمشةمشهور اشترى بيت اسرة يهودية هاجرت ..ناس صلاح ماندل... بالقرب من مدرسة عثمان صالح للبنات
همس الشوق انا عرفتها بت حلتنا لكن مش عاوزة تقول لى ابوها او اخوهااو حتى جدها منو...
بينى وبينك حكاوى امدرمان دى طاعمةعند سيدها

سلامات يا حسن وصباحك زين
أفط الدور وأنط ليك على الهواء

البرد عندنا دخل العضم .. أكيد ما زيكم لكن عضمنا البقى متحايل ..

تعرف يا حسن أنتوا كنتوا جوة حلتنا .. لكن بيناتنا فرق التوقيت .. الزمن البتحكى فيه أنا كنت فى مدنى .. جينا أيام نجومية أسامة ووزة ناس حسن العبد سمعنا قصصم سمع ..
وبعدين حمزة وعباس ديل توأم .. جن أحمر .. بيتم مواجه دكان برعى موسى يفصلم الخور وكانوا قرايب .. من شلتم عوض يوسف أغا (عوض فرطوق) ..
يوم سجلونى فى بيت المال .. وكنت بلعب فى النجمة .. بعد ما أتمرنت معاهم زغت .. ما كنت زول كورة ملتزم .. راحوا سكونى شديد .. لامن قنعوا عرفت كانوا بايعنى بى 15 جنيه

غالباً أيامنا ديك أنت كنت خارج البلاد .. بالتحديد فترة ناس الصادق قبال نميرى .. آخر عهدى بالمسالمة .. دفنا الزعيم أزهرى فى مقابر البكرى ..

لكن عمك أب قفطان أزهرى عرفتو .. غايتو الله يرحم عمتى نعيمة .. كان وقعت لى راسى صاح ..