كتبتك كلمة في العنوان
نثرتك نص
حروف بتحاكي قمرية
وصفتك رسمة من شمسك
صباح ضلك
و لي صفيق درب شافعة
تلاعب في وليد حلة
معاها في ليلة قمرية
كتبتك واضحة ذي ريدي
وضوح وش السماء الفوقنا
وضوح الصورة فوق النيل
وكت تعكس وجيها غنا
وضوح الصورة في الخاطر
وكت تنداح ضفافي منى
خاطر صورة منعكسة
ظاهرة الغيمة والزرزور
رقاد مركب
ونخلة لافحة التوب مطرز
وشايلة كم تمرات رطب
وصورتي هيمان يا اميرة
مرة سارح في الحقيقة
وفي الخيال مرات كتيرة
تاخد الموجة الملامح
مرة راكزة و مرة هايجة
الا ريدك ذي بيوت حلتنا ثابت
ساعة يجيها الضيف و يقيل
فرحة تملا سقوفها مطرة
تابا تنزل بالدراوي
تسيل تنقط بالسقوفة
بالسقوفة .