[الرشيد اسماعيل محمود]

تلقى المبدع المصري على الرغم من الظروف المنيلة بستين نيلة
لكن هو بكتب بصورة دائمة

وجدي..
يازول انت مشكلتك مع الكتابة الدائمة ولا مع قيمة مايكتبه المبدع..
انت ليه بتنكر دور المبدع السوداني واثره في وجدان الناس..
أمسك ليك محجوب شريف مثلا..
هل بتنكر دوره في تثقيف الوجدان العام وبث الوعي بقيمة الانسان العاري
من كل البهرجات..
هل تنفي دور عاطف خيري في تحويل ذائقة المتلقي من الشعرية البكائية
للشعرية العقلية الواعية بما حولها تمام الوعي..
هل بتنفي دور هاشم صديق في تأسيس عقلية الرفض مهما كانت المعطيات
والمغريات..
هل بتنفي دور محسن خالد المتعظم ومحاولاته الجادّة لفضح همجيّة التصنيفات الواهيّة وتحطيم الطواطم المقدّسة وابتكار عقلية نقدية جديدة..
هل بتنفي دور بركة ساكن المتعاظم في لفت نظر المجتمع لحيوات الطبقات المسحوقة المقهورة وفي نفس الوكت البنّاءة المنتجة..
هل بتقدر تنفي دور فنان زي وردي مثلا..ولا مجموعة زي عقد الجلاد
فتحت نوافذ للأمل وخلت وجدان الناس يتحول من رومانسية حالمة سالبة
لواقعية واعية ايجابيّة..
المبدع انت قايل الا يمرق مع الناس في الجوطة ويهتف عشان نسميهو مبدع ولا ككيف يعني..؟؟
ولا الا يكون قاعد متحكر جوة وطنه عشان نديهو صفة مبدع..؟؟
الابداع ما بيعترف ليك بحدود جغرافية..
والابداع ذاتو يازول ما هو جسد بيدخل عن طريق باسبورت وتذكرة
طيران درجة رجال أعمال..
الابداع صوت بيتسرب الناس وبيتخمّر والناس بتسكر بيهو..
في زول راسو خفيف بيمسك نار طوالي..
وفي زول راسو تقيل ما بسوي فيهو الحبّة..
وفي ناس بيقولو ليك الابداع رجس من عمل الشيطان فإجتنبوه..
ياوجدي ياخي حكاية اصرارك علي خلع صفة السلبية علي مبدعين
قدموا ومازالوا بيقدموا ..انا شايف ده رد فعل ساي..
علي حسب النماذج القلت عليها واستدليت بيها انا برضو حأديك نماذج:
عادي في الخرطوم تلقي شباب يقولو ليك ماشين نحضر ليلة
شعرية لمحجوب شريف..المشكلة وين..؟؟
وعادي تلقي شباب ماشين يحضرو عقد الجلاد..المشكلة وين..؟؟
وعادي بيفتشوا عن آخر اصدارات محسن خالد وبركة ساكن وأبكر أدم اسماعيل و..و..الخ..
طيّب دي عليك الله مش حاجة مبشرة وتفرح..
ديل ملهم ما عجبوك ولا ما شفتهم..؟؟
ولا الا تقوم ثورة شعبية وننتظرها تنجح عشان نقول ياخي الناس ديل مبدعين...
طيب لو ماقامت ثورة الشباب المصري ونجحت..هل بيعني انو ناس دينا
والجخ ديل ما مبدعين..؟؟؟
المسألة مسألة توقيت محدد بيد الشعب وليس بيد المبدع..المبدع بقترح رؤيته للأشياء بلسانه والجمهور هو البيقدر يغير بيده..
ياخي فترت من الكتابة..
كنت داير انبهك لحصرك المخل للإبداع المصري في ثلاثة اشخاص..
وإزالة كل التاريخ الابداعي للمصريين.
ياوجدي انت قايل الأسافير دي ما إبداع منقطع النظير..ولا البيكتبو في النت
ديل بيكتبو والسّلام..
وبعدين ياخي الحركات الشبابية النشطة دي زي قرفنا وشرارة وووو..
ديل جابو الوعي ده من وين..؟؟
نزل ليهم وحي ياربي..؟؟؟
يمكن.