[الجيلى أحمد]

المشاركة الأصلية كتبت بواسطة حافظ حسين

جيلي سلامي يسبق أشواق .... أي اني أعني نظرياً يعني كلام في الكتب ما فيه اي مشكلة (جملة الحرية للجميع , أو الحرية لنا و لمن سوانا) دا الكلام النظري المكتوب لكن يا حبيب وقت نجي للحياة العملية لابد من وجود ضوابط .... ضوابط تحد هذا الفرح و ما شايعه ... دا قصدي في الاختلال بين النظري و العملي

تحياتى الغوالى ياسلفى

ياحافظ مافى ضابط فى مسألة الحريات , أكثر من الالتزام بها..
أكبر خرق لمفهوم الحريات وللديمقراطية ليست الجرائم التى قد تحدث هنا وهناك بشكل فردى ,
بل الخرق الاعظم هو النكوص عنها, ومحاولة تمرير سلوك غير ديمقراطى وضد مفهوم الحريات تحت اسمها ومظلتها ..
فالتجاوزات الفردية لاتؤثر على منظومة حقوق حريات متكاملة , بل مايؤثر عليها هو الغاء أسسها
فتتساقط جميعها تباعآ حالما تتلاشى تلك الاسس , وأسسها هى ايماننا بها وسعينا لتطبيقها بتجرد والعمل على نشرها والدفاع عنها ..
القانون الذى تواضعنا عليه هنا لايدين محمد فرح لأنه كتب فى مكان آخر شئ مشين
وأعتذر عنه هنا بشكل واضح وجلى ..كم أنه لن يتغير من أجله كفرد ..

وضوابط تطبيق وحماية الحريات هى عدم النكوص أو التراجع عن اى مبدأ فيها..

الحرية لنا جميعآ..

طبعاً يا الجيلي بقصد محمد فرح و لا غيره ... بتحموا فيهو لانكم بتصوره إنسان عادي

بحمى فى محمد فرح ؟
وبحمى فيهو كيف بالله ؟
يااخى والله امركم محير,
ماليين الصفحة الأولى كلها بوستات عن محمد فرح ,
وكانو هو قضيتكم الأساسية ..
محمد فرح دا متين ياحافظ كتب ليهو كلام عندو معنى وبقدر يدافع عنو,
دا اكتر انسان سطحى وبخدم فينا وفى قضيتنا , هسه بقيتوهو زول خطير !!!!!!
يااخى الزول دا بيكون هو ذاتو هسه مندهش!!!

والله القضية بتاعت الحريات والنضال من اجل تغيير النظام , فى ناس قاعدا تهزم فيها من جواها بدون وعى , (ناس بتتشفى لى نفسا , وبتكتب فى لحظات غضب بتخصها, بتشتم باقزع الالفاظ , وبتخلى شكل قضية الوطن الكبرى يبدو مجرد مهاترة وشتيمة بين ناس زهجانين وقرفانين , وليسوا بأفضل حالآ على مستوى الخطاب من اصغر بوق وطبل فى النظام ..)

طيب ياحافظ
مربط الفرس
انو بيننا جميعآ اللائحة , نجيبا ونطبقا..
ونشوف
لو محمد فرح أخطأ وفقآ لبنودها , اذآ يتعاقب,
ولو أى زول تانى أخطاء برضو يتعاقب..

الناس لو عايزة تغير وطن ومفاهيم ,
عليها أن تبدأ من هنا والآن ,
مافى حاجة اسمها لم يتغير النظام بعدين نبقا نشوف موضوع الديمقراطية والحريات دا ..

من هنا يبدأ العالم الجميل