[ناصر يوسف]

المشاركة الأصلية كتبت بواسطة زول خرافي

بسراع ياخال الشمس غابت ..
اتواعدنا فى المقرن .. فى مسيد طابت ..
اتلمينا فى حوشك .. والنفوس طابت ..
بسراع دى الشمس غابت ..

زى نخلة دليل الحِلي ناديتنا
قابلنا وش مطروح ..ادخلو فالكم زين ..
و باب الوداد مفتوح ..
كما إنّ القلِب حوشين ..
واتوهطنا فى خيرك ..
ولاد اختك .. بنات العم ..
عمو لذيذ وود الزين ..مرافى الشوق .. وعم جعفر
قوت القلب و الزينة .. ..
ريم الفلا ..الوزينة .. والبدر البفوح ياسمين ..
والممكونة بى ريدك .. أم نفرين ..
والعمدة .. ذو النورين
سنـّـاد العَـترة
درّاج القاسية
مِـيس الشاردة
جَـبِـيرة المكسور .. ..
شيخ سيسيليا ..
بحر العلوم والدين
و صعاليك الحروف واردين
زولن عرِيكتو اللـِّـين .. ويوم الدُوَاس تور شين ..

واندسينا فى الرئتين ..واتوهطنا ممهولين ..
وناديناك .."ضو البيت " فما أجمل
مدينا رجولنا أسايد بيت .. وكان اللِحاف اطول . .
و اتناقرنا فيما يخُص ..
إتلاوينا زى أصحاب ..
و ..اتزاعلنا لكن ضُمة ..
ما قدينا صريف العُشرة ..لا تاوقنا توب جيران ..
وكم لمّتنا معاكَ ملَمّة ..
و اتعاصرنا كأجمل أمة ..
ولمّا .. بقينا حِداك ..ولمّا ..
استأذنت بى طيبة .. و ثـُم ..
مَـرَقـْتَ هناك على الميعاد
ونِـعم الدار ..
يوم لاقيت بنات الحور !!
و فِرحن هــِـن .. و نِعم الصُحبة لاقيتـِـن .."وجِـيدَن جيت"
هل أظرف من هَدُول بـَنـُّـوت ..!
هل بتلامَضَن حِنِيـّة .. و بتشالَقـَن إحساس ..
بَلا بَنـّوتنا شِن بتدور ؟..
و هل صادفت فى الحوش الجديد بهناك ..
وَلِـي من جملة الصالحين ..
أو فى حوصلة عصفور
شهيد بِسأل ..هل البلد للحِـين ؟

ياخال كما الأمطار .. تدخل عتامير البلد سقيا ..
تفتح للفقير نفاج ..و كم محتاج عينو منكسرة ..
تغمس ايدو فى لقمة ..
وتجبر خاطرو بالسترة ..
وتمحا العوز ..وتفوت
كأنك مسيح اسفير ..
تمر كما النسّام .. بى كل دار معمور ..
و كم عِمرت معاك بيوت ..
تردد سيرتك العطرة
وما ظنّت بتحلم يوم ..
يعشش فى ضراها الموت ..
و ياكا الخال .. جمل شيلنا ..و عدل الميل
يرخى جضومو للكفيت ..ويشكي همومنا لـِ الله ..
يا تقابة البلد ..يلا ..
قبُـل ما تلوح الايدين ..
أدى الحبيب طلة ..وكيل من الوعي مدين ..
نحن عقولنا منطبلة ..
كيف تسرج فوق الرحيل صهوة ..
تلت الأرض راحت .. ونص البلد غفوة ..
.. وفى الفنجان باقى القهوة

اوعك .. تترجل من جار الخاطر ..أوعا
نحن شرينا جوارك بى حق الشفعة
اتعودنا عليك ياخال وخربت الطبعة ..

فيا خال .. تعال
سكت الجهال ... وراك جاطت ..
يا رب العباد تنعدل بهناك .. هنا انساطت ..
وانا بين اتنين ..يا اهواك .أو فى ولهي أزيدك ..
يا تعليني فواكه عشقك .. او بتنزل غصن الريد بايدك..
تسقيني عصير الحب من ريدك ..
--
يا خال تعال .. فاتن مواعيدك
سكت الجهال .. عيونم مراويدك
النوم النوم بكريك بالدوم ..
بلح القرير و لِـبـَـا الخرطوم ..
النوم تعال سكت الجهال ..
النوم النوم ..__________________


عن اذنك يا باش

يا الله يا الله يا الله ..

زول خرافي ...

لكم أحببتُ فيك صِدق الصدِق يا رجل ...
وأما عن هذا المُعَتَق بجمال الله هذا الباش أقول ...

يا الله يا الله يا الله