اقتباس:
المشاركة الأصلية كتبت بواسطة قيقراوي
يا حافظ انا ما بدعو لدولة دينية ..
و لا اعتقد اني عندي مشكلة مع المادة 18 من الاعلان العالمي لحقوق الانسان ..
المسألة دي بحسمها الدستور ..
و في الدولة المدنية الدستور ديمقراطي بدون أي مرجعيات ..
اي زول يلصّق في مصطلح " الدولة المدنية " لاحقة بمرجعيات اسلامية ( الاخوان المسلمين - مصر، نموذجاً ) فدا واحد من اتنين :
- ما واقع ليو مفهوم الدولة المدنية.
- دجال بخشم الباب داك .. و علج مقطوع من المؤخرة عدييل( او كما قال الصحاف  )
العاوز الاديان - لاحظ الاديان، مش بس الاسلامي - تبقى جزء من مصادر التشريع فليخضعها للمداولة و التصويت الديموقراطي اولاً مش العكس..
او بنقايس الحقوق و الحريات بالدين!؟
* ياخ لو رجع موقع سودانيز في كلام سمح جداً في الموضوع دا ممكن الواحد يستعين بيو ..
لكن الله غالب
نهارك سعيد
-------
انت يا اخوي ما عندك شغل اكل عيش و لّ شنو جيت اتفغت لي  |
كدي نبدأ ليك من الآخر كدا , فيما يختص بعملنا الميمون أحيطك علماً إني في هذه اللحظة قد قدمت إستقالتي عن عملي السابق و بعمل في هاندوفر خفيف كدا لزول جديد ... عشان كدا العشرين يوم الجايات ديل حأكون متفرغ للدعوة و الإرشاد يا صديق...
يا قيقراوي انت في عضمك انا ما قلت ليك عندك مشكلة مع المادة 18 من الإعلان , لكن تساؤلي المادة دي لأي مدي ممكن تجرح الزول المتدين و عشان الجرح أو الشرخ دا الأمر محتاج لقعيد الكلام وقع ليك؟ ... يعني ما بنفع نجي نسمع إعلان حقوق الإنسان دا و نتخارج.
إن لله يا خي ... طوالي قفزت في موضوع تصويت ديمقراطي (أحب القفز بالزانا ذاتو يا خي).... يا قيقا القفزات الزي دي وقعتها صعبة و بعدين صحة الدولة المدنية تهمنا يا خي ... يا صديق صدقني لو مشيت طوالي لموضوع التصويت أن الأديان تكون جزء من التشريع بتكون الخاسر إنت ... يا خي قبل التصويت و المداولات دي محتاج تضع بيز قوي جداً لانو عبارة ما لله لله و قيصر لقيصر دي ما بتأكلك عيش مع الدولة الدينية المرتكزة علي الدين الإسلامي كدين جامع و صالح لكل الأزمنة و الأمكنة, عشان كدا في البداية فكك صواميل الدولة الدينية دي من رسين الناس و بعدين تعال شوف موضوع التصويت دا و الا بكون الموضوع (أتمني أن تكون لي دولة مدنية)....
طيب يا قيقا اتز أوكي قول الناس صوتت فيما يختص بأن الدين يكون مصدر للتشريع .... أها الدين البجينا في التشريع دا بجي بحمولته القدسية و لا بجي ساي؟
قبل نختم المداخلة ... شايفك كاتب الأديان و قلت ما الدين الإسلامي بس.... يا حبيب في تقديري أن بقية الأديان ديك حسمت موضوعها فيما يختص بالدولة بس باقي الإسلام و دا البهمنا نحنا تحديداً في هذه اللحظة, عشان كدا ركز في ورقة الدين الإسلامي يا خي.