[ناصر يوسف]

المشاركة الأصلية كتبت بواسطة عبد الجليل سليمان

ناصر يوسف – لك التحية ..

لذلك وكيما يتطور المنبر ويمضي قدما في مهامه الأساسية – مهام التنوير وتكريس الحريات وتوسيع أوانيها، لذا لا بد من العمل سوياً إلى استعادة سودانيات من خاطفيها، واعادتها من قعور بيوت هؤلاء إلى كونها (لجميع) ، ومنبراً حراً، ليس بيت يُحدد لنا أهله ماذا نفعل فيه ومتى يحق لنا (أن نآخد دش) و نصلي النوافل ركعتين من (النازعات إلى الزلزلة) .

جاليليو يا صديقي
سلام ...
معاك في المُعَلَم بالأحمر ده كلو ... ما عدا كلمة خاطفيها دي...
وصدقني سودانيات لا في زول خطفها ولا في زول حيقدر يخطفها
جميل أن ننتقد بعضنا البعض في سياق ما نكتب أو نتداول
والأجمل أن يكون النقد موضوعي خالياً من المطاعنات والإستفزاز .. يعني ...
زي ختام مداخلتك دي المُعَلَم بالبني يا جاليليو

ليس بيت يُحدد لنا أهله ماذا نفعل فيه ومتى يحق لنا (أن نآخد دش) و نصلي النوافل ركعتين من (النازعات إلى الزلزلة)

دي ما لغة زول عاوز يصلح إطلااااااااااااااقاً ...
أكتب وإنتقد الكُل ... بس بقصد الإصلاح .. ومن غير تريقه (وحَمَّرَ له عيونه شديييييييييييييد)

لأني وبصراحة كده حاسي بيك شايت ضفاري وتوووووووشك عاوز تجيب قون في كل الناس ..
عشان أنا أقرأ إنتقادك ده برويه وتعقل وآخد بيه وأعمل معاك في تصحيح مساري ... فالمفروض شنوووووووو ... المفروض إني أشعر ده من خلال نقدك ... بإنك عاوز تَصلِحنِي ... مش عاوز تَعَريني وتغلف كلامك ببعض ما يستفزني ... وأجي وأرد عليك بلفظ قد يكون قاسي ــ مثلاً ــ رداً علي ما شعرته من خلال بعض كلماتك ..
يا عبد الجليل يا صاحبي ... أنا ما قلت ليك بإنك ضد من يكتبون هنا للونسه ... كلامك هو البيقول كده ... وبيقولها برضو من زاوية تانية بإنو يجب أن تخف الكلمات بتاعة المواجبات الإجتماعية تجاه المواضيع الهاااااااامه التي يجب أن يكتبها الناس.. وبرضو في شوية إستخفاف بالناس البتكتب مواضيع المواجبات الإجتماعية دي يعلم الله من كلماتك ... بإنهم ما عندهم المقدرة علي الإنتاج الجاد وعشان كده مالين المنتدي بهذا الإسفاف ...
يا سيدي عندك أنا مثلاً ... أنا ما عندي لا الوعي ولا الثقافه ولا حتي اللغة المتميزة عشان أكتب زي عبد الجليل مثلاً ... أو شوقي بدري ... أو ميما ... أو الرشيد سماعين .. أو وهاد ... أو الشقليني ... أو معتصم الطاهر ... أو مهند الخطيب ... أو محمد عبد الرحمن ...أو نصــــار الحاج .... أو خالد الحاج رحمه الله ... أو إشراق ضرار ربنا يديم عليها الصحه والعافيه ... أو ... أو ... أو ... ياخي والله كتار جداً البيكتبوا هنا كتابات تلتهمها إلتهام يا عبد الجليل عبر سودانيات .. كتار بالجد ...
قد أكون أنا فقط الذي يكتب ( سفاسف الأمور) زول بتاع خستكات ساي ...
فلما الكُل بيكتبوا ما يفيد الناس هنا ... طيب المشكلة وين ؟؟؟ خلوني أنا ده أكون ليكم زول زي التحلية آآآآآآ ؟؟ ... كاسترد أو باسطه مع إني ممنوع من الباسطه
أنا لا بعرف أكتب في الفلسفه ولا بعرف أكتب البحوث العميييييقه ديك ...
ياني الزول البسيييييييييييط داك ... لكني بعرف أقرأ كل ما يُكتب من أقلامكم البحترمها جيداً ... بقرأ بعمق يا جاليليو وربنا يوفيكم أجركم من الوعي الإضافي البتضيفوه لي أنا ناصر يوسف ده ..
فشنوووووووووو
ياخي ... إنتقد ... بس بموضوعية الإنتقاد ولأجل الإنتقاد ... مش لأي شئ تاني
قلمك قلم متميز للغاية وأنا بقرأ ليه ... مش هنا وبس ... حتي في صحيفتكم ديك أنا بقرأ ليك وللبت الشعنونه آمنه عمر الشايفه طلقت المنبر بالتلاته وما عارفها ليه ما بتكتب هنا ...
شئ أخير ...
مسألة الشُلَّة والعلاقات الإجتماعية الضييييييييقه البتربط بين الناس هنا دي ... يمكن برضو أكون أنا مساهم فيها بقدر كبير ... وصدقني بغير قصد ... وسبق أن تناقشت مع بعض الأعضاء المتوقفين من سودانيات ( بيدخلوا يقروا كزوار فقط) ... وكانت ملاحظتهم نفس ملاحظتك دي بالضبط ... بإنهم زي الحاسين بالوضع في سودانيات بقي زي المستعمره كده ، وما قادرين يخترقوا جدار العلاقات البين الناس دي ويتداخلوا معاهم ...
وبعد قراءته قراءة متأنية وبعمق وتعقل شايفو صحيح 100% ... وعشان كده أنا سُقت مبادرة التوقف ولو قليلاً لتعرية أنفسنا أما أنفسنا ( بورداب الداخل أنموزجاً) مع جزء من الأعضاء هنا الفي الداخل..
فيا سيدي يلاك سوي لإعادة الحوار الجاد ليسود هنا عبر منتدي الحوار ... ودعوه مني للجميع وأنا أولهم ... بإنو أي بوست عندو علاقة بالإجتماعيات مكانه المنتدي الخاص بالأعضاء ...
وبعد مراااااااااات كده أنا ذاتي ممكن يجي يوم وأطش شبكه وأنزل ليكم هنا شئ خاص مكانه المفروض يكون في خاص بالأعضاء ..
فشنوووووووووو ...
أدوني علي راسي ... وعلي المشرفين أو الإداره تحويله لخاص بالأعضاء ..
ولا شنو بالله
جاليلو فرمل شوية بالله عليك والأمر ما محتاج لده كلو
تحية واحترام عبرك للجميع وياخي
أحبكم جت عليكم

ـــــــــــــــ ملاحظة سغنتوووووته ..
النسي قديمو تاه ــــــــ دي لي أنا ده ...كنت عاوز أقول لبابكر عباس وعبد المنعم حسن الطيب ... عليكم الله فضوها سيره بالله عليكم ووقفوا لينا التناحر اللفظي ده شوية ....
لكني نسيت بإني قررت ... يا ولد مالك ومال الناس خليها تتناحر وتتناقش إنتَ ما وصي عليهم ... وبرضو النسي قديمو تاه ... أصلو ياهو حالي ... زول حُشَري بيحشر نفسو بين الناس حشر ...
أحيييييييييييييييييييييييييييييا تورتو علي النفَس وخمة الروح وشحتافتها ياخ