[ناصر يوسف]

المشاركة الأصلية كتبت بواسطة عبد الجليل سليمان

ناصر يوسف .. صباح الخير:
انا يا ناصر يوسف عضو في منبر سودانيات، ماسيد بيت، والحمد لله على ذلك.
لكن في سياق فهمك أنت وتعاملك مع عبارة سودانيات بيتنا ( انا سيد بيت). بس يا خوي عبارتك دي فهمها كثيرون على نحو مختلف ، وحاربوا بيها الناس وطردوهم ونفروهم و طالبوا بشنقهم – وديل من أسميتهم بالسلفيين الجدد.

يا صاحبي جاليليو
صباحك زي الورد
طيب ممكن أقول ليك كلامي وبراااااااااحه كده ؟؟؟
وبما إنك سيد البيت الكبير سودانيات ... الكلللللنا اسياده حتي القُراء الغير أعضاء ... ويا ريييييتهم يبقوا برضهم أعضاء ...
نتفق بإنو في بعض الناس الإنتَ عارفهم تناولوا جملة ( سودانيات بيتنا) وبقوا يصادروا حروفك أو حروفنا هنا بفهم ... ده ممنوع وده آي ... وأكتب كده وما تكتب كده ( بالرغم من إختلافي معاك في النقطة دي بإنها ما صحيحه)..
الحل شنو في رأيك ؟؟
نقعد نَعَيِر فيهم ونكيل ليهم الصراخ .. ولأ ممكن ببساااااطه كده نقول ليهم لأ كلامكم ده عوج ؟؟
إتخيل لي يا جاليليو المسألة ما محتاجه لكل هذا العك اللفظي الحاصل هنا ...
شئ سلفيين جدد وشئ شنو شنو كده ما عارف ...
حتي لغتك يا عبد الجليل في كتير جداً من المرات عبر البوست ده فيها تعالي علي الآخرين ...
يعني ... زي وكأنك بتقول لينا ... أنا عبد الجليل سليمان الوااااااااااحد ده ... الوحيد البعرف أكتب هنا كلام مفيد وإنتو بره الشبَكَه ...
بلغتك الهنا دي إنتَ ذاتك مرقت بره الشبكه يعلم الله ... وبقدرة قادر فتلت عضمة رقبة البوست بتاعك ـــ بتاعنا ـــ ده ... ما هو البوست ليس ملكاً لكاتبه فقط ... طالما تداخل معاك الناس فيه فيبقي شنوووووووو ... يبقي ملك لكل الأقلام ... ولا شنو ...
فيا حبيب ...
تااااااااااااااني بقولها ليك ...
فررررررررررررررمِل شوية وشيل أصابعينك من أبنص كي بوردك ده شوية ورجعنا للنقد الغير الهدَام عليك الله ..
حقيقي محتاجين إننا نعري نفسنا شوية ... وعن نفسي أنا عريت نفسي وقلت بعض مرات أنا بَتَّحَشَر في مواضيع خلافية هي بين إتنين وأنا ما عندي بيها شغلة وقلت التوووووووووبه يا حبوبه ...
يلا تعال وعري نفسك ... عري الآخرين ... وخلي الآخرين ديل يقبلوا بنقدك الببني لآ قِدَام ...
ولا لأ ... لسسسسسسسه حجوة أُم ضِبيبينه دي ما أنتهت ؟؟؟
ويبقي سودانيات منبر للجميع وبيت يشيل الكُل من غير مصادرات ..
وهوالكلمة حتبقي شنو لما نشيل شرفها بعيد ؟؟؟
لا شئ ..
وبرضو ..
لسانك حصانك إن صنته صانك وإن هنته هانك
ولسانك لا تذكر به عورة إمرئٍ فكلك عورات وللناس ألسنُ
يا أخوي
ببساااااطه كده ... أرجع بينا لموضوع البوست بلغة ممكن نقدر نشيلها معاك ونقبلها ... لكن بهذا القدر من التعالي وسواقة الناس عشان ينفعلوا ويختلط حابل الكلمة بنابلها ...
ما ظنيتنا حنمشي لقدام
أللهم أغفر لي إن أخطأت أو نسيت أللهم إني كنت من الظالمين
أها ..
العفو لي الله والرسول