[منال]

المشاركة الأصلية كتبت بواسطة سجمان

ا
الآن أصبح المطر في مأزق حرج وحرّجنا معاهو .. قال ماب جيك.. وطلة وشيك أحسن من تترجاهو .. وكان عفالك أنا ما عافيك..
ياخ اشتهينا وما خلينا مع الأيام لو حبة نزوة .. ولا يهمك..
بتكفينا السبعة القالم يوسف.. ومؤسف جداً إنك قاعد وما هاميك الوعد القلتو لذات المطرة والنتيجة (حضرنا ولم نجد من نشعل ذاكرته بهذا المناخ)..
وأنا يا صديقي رغم التتويج من خط الإستوا لم يسعفني الحظ.. فالمطر هنا ممزوج يحمل عدة أعباء.. لغة لم أسطع فك طلاسمها والقلم أصابو الإعياء..
أما المرات القادمات ما ح تلقى البضاير نمل العيشة ويمرق أم سيسي والذي كان يشهر البهجة في وش النباب ففففففففي دمازينو بقى ممحوق وما جايب مريسة تامزينو .. ولا بحوق في الزريعة "وكركورة المنقة" التحت الزير.. فـ تخلي قحف خيالك يسرح من غير العلّم الضريسة الإنجاب في دقداق الحلة العادمة التكتح.. وكان ملّينا مروة المطرة المرة الجاية بترجاك بي زهور ارتفيشال وحبة بذور أنتي بايوتك لجفاف الحال ومطرة مجففة من ضرع الأغنيات الصبحت باهتة ولا مقروءة..
فتك بي عافية وبجيك صاد لي مطرتي براي، خليها مطرتك الشريتا وزدتها بلة

الان ... الان المطر اعلن المأزق الما بتخفى بطين الوحل و ريحة الدعاش
جفت مطمورة قضارف الخير و كوركت الجوع كافر
و التماسيح دخلت راسها ذات ليل فى مواسير المياه مؤكدة العطش
وسوط المطر اعمل خطوطه فى استواء فاضح للفقر ...القعد مرتاح
الله فى ... الله فى



تعرف مطرتى براى خلتنى اقلب السرج هنا
تعال جية العصافير قربت يا سجمان