[ناصر يوسف]

المشاركة الأصلية كتبت بواسطة azzam_farah

ناصِر يوسُف
كيف حالك؟ علك طَيِب

مهما قلت ما تِتْوقع مني أي دعَوة.. دايِر خروف بضبوحو ليك.. تطلُب تركين بفتح فيك بلاغ جنائي "الأذى الجسيم" تكتِر بحولو "الشروع في القتل".. قال جوعتونا قال

هههههههههه

والله ضحكتني يا عزام يا أخوي

لكن لقيتك !!!
أسكت كِب علي قول ألهنا الشوايقه
قلت لي أذي جسيم وشروع في القتل ؟؟ ده كلووووو عشان ما أقول ليك أديني معاك حِتاية تركين ؟؟
إنَّا لله ياخ
عموماً بطرفنا الآن في البيت خمشة تركين جاني هدية من أخ عزيز بعزِني شدييييييييد فشنو قام وتصدق علي بيها
وبما إني من غير الناطقين بها ( لا حلفاوي ولا محسي ولا دنقلاوي).. فشنوووو
حأستعين بوصفتك ديك لفطوم ...
وإنتَ غلطت بالحييييييييييل لما شرحتَ لأختنا فطوم كيفية عمل التركين ...
فشنو الليلة أنا متغدي بيه متغدي بيه
وتشمو قدحه .. لووووول
مي ياها وصفتك ..


التركين في الأول هو زاتو الميلوحة.. طَيِب.. بعملو كيف؟ بجيبو يا سيتي السمك الصُغار والأفضل سمك إسمو الصيري.. وحكمة ها الإخْتِيار إنو ما بحتاج تنضيف عفشه (بطن) تجيبي ها السمك وتغسيليهو أو ما تغسيليهو زي بعضو.. وتجيبي صفيحة -ده زمان- أو باغا زيت أبات 36 رطل ديك.. وتوفري المِلِح بِكِمِيات عائِلِية.. وشطة حمره نصيحة، يعني ما مدقوقة وبُهارات الدُقة (شمار ناشِف/كمون ناشِف/كسبرة ناشفة) تقومي تلخبِتي الشطة والبُهارات مع السمك وتصوطيهُم كَدي كَدي.. كَدي كَدي وتعرِكي زيييين.. بعد داك تخُتي طبقة مِلِح في الصفيحة أو الباغا وتخُتي فوقا السمك الصيري المَبَهَرْ.. وفوق السمك المَبَهَرْ تخُتي تاني طبقة مِلِح لامِن السمك يخْتفي.. وتكرِري ها العملِية لغاية ما تصلي قريب خشُم الصفيحة أو الباغا.. في الآخر تقومي تغتي الصفيحة أو الباغا.. اليوم التاني تجيبي ليكي قناية أو مُفراكا أو شيتًا تصوطي بيهو مَوجود الصفيحة أو الباغا.. التركين (الميلوحة) بتنجض في صيف السودان أب سُحائي داك في 4-7 أيام في الشِتا بِطَول شوِية.. المُهِم بتعرِفي نُجاض التركين أو مِن عدمو، بِاللون والطعم.. ببقى لونو بني أو رصاصي -حسب نوع السمك- والطعم بِكون خالي مِن الزفارا.. أهااا بعد ما التركين ينجض.. بتشيلي ليكي خمشة مِنو وتحِلي في موية ماسورة وتقومي تصفي ها المحلول.. الموية المصفية هي البتنْطبِخ.. تحمري بصل كتير في زيت.. تكشحي موية التركين في الزيت.. لامِن يغلي تتقِلي موية التركين بالدقيق.. بسوتييييب