[خالد الصائغ]

المشاركة الأصلية كتبت بواسطة رأفت ميلاد

خالد الصايغ العيد مبارك عليك
ياخى قريت البوست كلو وعندى نية التعليق على حتت كتيرة مهمة .. لكن بديتو بمداخلتك أنت رغم أنها الأخيرة .. أصلى بقيت مصاب بعقدة مبارات خالد الصايغ
وطبعاً كالعادة لم تخذلنى وخذلتنى كمية التهذيب فى الكلام بتدس كلام كتير بتهابشو فوق فوق وهو كبد القصة .. قلل الدوز ياخ وغرّق زيادة عشان نقدر نخش معاك .. أنت دايماُ داخل الزون .. عموماٌ برجع ليك كان ما رجعت براك .. عشان نختها أسود وأبيض (فكرة وتحليلها)

دمت طيباً

عاطر التحايا رأفت
و كل عام و أنت بكل خير و هناء

قلتا لي نختها أسود و أبيض يا رأفت
و نخلي القيفة و نمد خطوات لا جوة
دِيل يا حبيب


غالب كتابات أم التيمان و من بينها السياق الزاحف بي هناك زي دبيب ود دهيس لا يمكن الإمساك بها أو توخي مرماها
و ده الخلاني أقول قبيل إنو أم التيمان بتمارس حركة من التداعي الحر و الصادم في كثير من الأحيان حين تكتب

و من هنا كان تحفظي علي عنوان الأخ تاج و إقحامو لي كتابات أم التيمان في هكذا عنوان
لأنو مدلول كلمة (منظور) بيستدعي بالضرورة توفر رؤية ما
و لو في حدها الأدني
و الرؤية في جوهرا نسيج لا يمكن فصلو عن التوخي و القصدية المسبقة
و هو ما لا يتوفر في تقديري في كتابات أم التيمان
و إن كان البعض يري خلاف ذلك

و طبعا كلامي ده ما بيرمز أو يكرس لي أي شكل من أشكال الإقصاء لما تكتب أم التيمان فمن حقها أن تفعل
بقدر ما هو تصور موضوعي للأمر و ارتباطو بعنوان البوست

و لست هنا بصدد تحليل كتابات أم التيمان و و زنها بميزان الجدوي أو مقايستها علي مسطرة القيمة المضافة

فهذا خيط آخر قد يجرف البوست بعيدا في اتجاه آخر.