[طيبان]

حبابك يا عمدة ، مالك رافع ايدك انت ؟ أبقى داخل ولا تحرمنا ..

المشاركة الأصلية كتبت بواسطة عكــود

بس يا ريت كمان لو حلّلت قولة:

يسد لبق الأسى الشايل

أربعة كلمات مليانة بالحيل!

كدي نرجع بالأبيات قليلا للوراء لننظر للمعنى باتّساعه ..
يصف حمّيد الوطن بقوله :


كهاربو ضي النجم ..
بوّاغ يسد لبق الأسى الشايل ..
بلد فاتح لو غلبو بلاغ .

بوّاغ هو من يقوم بالبوغة ، البوغة هي السقية الأولى للزراعة ،،وهي الأصعب لإعتبار الحذر المطلوب فيها خشية إغراق البذور ،ولإعتبار أن الحواجز الترابية (اللبَق ومفردها لبَقة ) بين الجدول والحوض تكون جديدة ولم تتماسك بعد ،يصعب التحكّم فيها (فتح اللبقة وسدّها ) ..
لبق الأسى الشايل ..قرأتها مجازا زي غيم الأسى الشايل ويمكن شطحت شويّة ..

الصورة التي حاولت ألا أقحمها في النص ،هو فهمي (المحلّي جدّا) للمقطع بكامله :

كهاربو ضي النجم ..
بوّاغ يسد لبق الأسى الشايل ..
بلد فاتح لو غُلبو بلاغ .

نوري كلّها تشرب من حفاير مشروع نوري ،،وأغلب مشاكل المزارعين عندنا مرتبطة ب(سرقة الموية ) حين يقوم أحد المزارعين بفتح الجدول ويسقي زراعته خارج الجدولة ،،يتم فتح بلاغ فيه بواسطة خفراء المشروع ، في الرئاسة بالباجور ،فيتم تغريمه وقديما كان يُجلد المزارع بسبب ارتكابه هذه الجريمة ..

كتب حميد مسرحيّة شعرية في بداية الثمانينيات حضرتها وأنا صغير بنادي الجريف اسمها (الغضب) مسرحيّة شعريّة مدّتها ثلاث ساعات تقريبا كانت تناقش مسألة جلد المزارعين بسبب قانون المشروع ..لا زلت أذكر منظر الممثّلين وهم يجلدون بالمسرح ..
حمّيد أشار لهذا الموضوع أيضاً في ذات القصيدة أعلاه (مصابيح السما التامني ، وطشيش ) حين قال :

فما معنى الأرض بالضبط أو بالربط
حين تكدح ..تكد حولك
تباصر الموية بالسرقة ..
غرامة ودردرة وعلقة ..
ويصادر الوالي محصولك ..

لذا ..
كهاربو ضي النجم بوّاغ ..
يسد لبق الأسى الشايل ..بلد فاتح لو غلبو بلاغ ..

تمس عندي ذات المعنى ، حين ينقل حمّيد التفاصيل اليومية بالبلد لأفق الوطن على اتّساعه ..

المشاركة الأصلية كتبت بواسطة عكــود

أبو الحِصِين، عندنا هو النمل الأحمر يكثر وجوده عادة تحت النيم.

العندكم دا ياهو (الهرشل ) عندنا في نوري ،،أبوالحصين دا عندنا نفس حجم الهرشل دا بس أسود ، ياخي الفي الجرف داك ، طبعا ما قاصد الرتيلا ..
__

زي النضمت كتير كدي ..