(بحر المودة)
الشاعر:السر عثمان الطيب
اداء :محمد جبارة
شوفي الزمن يا يمه ساقني بعيد خلاص
دردرني واتغربت واتبهدلت وريني الخلاص
ساقني القدر منك بعيد لأزايا كاس جرعني كاس
يا يمه يا فيض الحنان الما كمل
يا يمه يا بدري البشع دايماً يهل
يا يمه يا نور الصباح وكتين يطل
وآشري يا زينوبة ولدك في بحور الشوق كتل
محروم من الحب والمحنة وراك همل
يا يمة يا بحر المودة وكت يفيض
يا يمة يا شعلة أمل زادت وميض
يا يمة يا عنقود كلام منظوم قريض
يا يمه يا نغماً حنين بالشوق يرن
وأفكاري فيهو بيرتعن … دمعاتي شانو بينزلن
واتذكرك يا يمه يا يمة في الدغش النسايمو يهبهبن
قايمي الصباح متكفلتي شايلي الحليلي علي المراح
والساعة ديك يا دوبو ديكنا بدا الصياح
والطير صغاروا يغردن
جبتي اللبن بي انشراح
وأتذكرك يا يمه في وكت الهجير
صالاك نار الدوكي عستيلنا الفطير
رشيتي قلتي أكلوهو خير
وأتذكرك يا بسمة الطفل الغرير
وكت الخلوق ترقد تنوم وأسهر براي
أرعي النجوم
والشوق يرف جنحينو بي فوق لي يحوم
وأهتف باسمك في الخيال
طيفك كمان بي فوقي جال
وأتمني لو لحظات يدوم لكني فجأة ألقاهو زال
يا يمة يا بحر المودة وقت يفيض
يا يمة يا شعلة امان زادت وميض
يا يمة يا عقود كلام موزون غريض
واتذكرك يا يمه ساعة الناس يجونا من البلد
ناعم ترابه علي جسيماتن رقد
ريحة التمر فوق الهدوم
ولون الخضار خانس لبد
والشوق أوارو بيشتعل
كان ظني فيهو يكون خمد
واتذكرك يا يمة والناس قالوا قايميين البلد
رصوا الهديمات عدلوا ركبوا اللواري وقبلوا
خلونى وحيدى بلا انيس
كيف إنفرادى إتحملوا
شالوا السلام انا منى ليك
وإن شاءالله عندك يوصلو
يايمه ساعت يوصلوا ويقولو ليك
شفناه فى بلد فى بلد الأمان
انبسطى يا نبع الحنان
وانا حالى يشهدبوا الزمان
يايمه رسلى لى عفوك
ينجينى من جور الزمان