بدري مساك ....
واللهي ماعارفة اقول ليك شنو....قطعا ما ح يكون سعيد
وكل المرار ده في حلوقنا....
بكانا خافت يابدري....ونائحاتنا تايهات في غربة الروح
صوتنا مابيطلع مننا وهمسنا بيرتد لينا كسيف وحسير
أجسادنا بيستولو عليها ويكفنوها حسب طقسهم المهووس
والخرقة البيضا البتتبعنا لي تلك الحفرة البي مقاس
نسيجا كهنوت الظلمة الباعو صوتنا واشترو بيهو
كم كرسي اقتسموهن....وكم هبابة لهش حقنا من قدام
دقونهم وعريهم الماقادرين نشير ليهو كويس
صوتنا خافت...
والظلم بيستل شرعية وجودو من خفوت صوت المظلومين
هؤلاء سرقو كل الموتى والمقابر والأحياء
وصادرو النجوم والنوارس والبحار السبعة العظام
ولا روتهم المحيطات ولا حاشت عنهم دمنا
أدب الكرم بيقول..
الكريم لايتحدث عن كرمه....
الوالي قال في التلفزيون اتكفل بي مأتمو...
وطيارة مخصوص لنقل رفاتو
وسيل معزين ملتحين طويييييييييييل
ومواكب رسمية تترى...
وكلو معلن كدعاية لي انه دولة الهوس
بترعى في فنان.....
المدهش الفنانين مدونين بالقلم الأحمركزنادقة
في كراس الدين......
والفنان السرقوهو ميت ده صورتو مازالت موجودة
وهو ماسك بصلابة وصمود وجسارة في عمود والجلاّد
بينزل بسياطو على عُري صمتنا....
في الدين بتاعهم...المحدودين ما بيستاهلو تشتغل ليهم ماكينات
اعلام ولابيستحقو أمراء المؤمنين يقيفو معاهم متساويين
أنصاف الآلهة قالو حلال....
يبقى عادي المزمار ....وطلعو فتوى
وهتفو مع المغنيين.....
الظالم مابيرتدع....لكن عيب المظلوم يساعد في لف الحيال على رقبتو...
يللا كسبو جنازة تانية......
بس الجنازة دي كانت بتغني للحياة والحرية وللغبش
الحنجرة كانت منفستو مصادمة للعسف الجور والكبت
وح تظل حنجرة وطن ح تطلع شمسو
مهما حاولو يحجبوها بي اجسادهم العريانة.
|