[لنا جعفر]

المشاركة الأصلية كتبت بواسطة بابكر عباس

يا لنا، فتح العليم، نبيل وأمال، ما عندكم مبادئ ديمقراطية ثابتة وموقفكم كما موقف الأمريكان والاوربيين والقوى الليبرالية (بالقديم) المصرية منطلق من كراهيتكم للأخوان فقط
الذي حدث في مصر هو إنقلاب على الديمقراطية وسوف لن تعود أبدا مرة أخرى وفرحكم لكنس الجيش للريس المنتخب وأجهزة الإعلام؛ بباينكم والأيام بيننا.

يا بروف، لو الناس ديل ما جاوبوا ليك على سؤالك الجوهري بتاع منو هو الشعب الطلع؟ ما تستمر معاهم في حوارهم الهتافي دا.

ــــــــــــــــــــــــــــــــــــــ
يا أخوانا لو في زول سمع برأي السيد الصادق المهدي وحسن موسى بما حدث، يجيبوا لينا

صباحك عافية يابابكر
أنا ما بنفي خالص اني بكره ذوي اللحى الأشرت ليهم لكن الكراهية شي
والموضوعية شي تاني يابابكر
رأيي الموضوعي بيتلخص في الآتي ....
ماحدث ليس انقلاباً عسكرياً فالإنقلاب العسكري سماته ماواضحة لي هنا
لم تتمّ إعلان حالة طوارئ ولاإعلان قوانين عُرفية ولم يتم تعيين حاكم من العسكر
ولا مجلس عسكري يا بابكر...
بل تمّ تكليف رئيس المحكمة الدستورية ليشغل منصب الرئيس
القوات المسلحة في بيانات وتصريحات متتالية أعربت عن زهدها في الحكم وقالت انها لن تحكم ولن تتدخل في السياسة
الجيش مجرد حارس لرغبة اغلبية مقدرة للشعب
لمن تطلع أعداد متجاوزة لإعداد المقترعين والمسجلين للإقتراع ده بيعني كتير يابابكر
ولمن تتعنت جماعة الأخوان في الإستجابة لمطالب قانونية ودستورية عند دعوتهم لإجراء انتخابات رئاسية ده بيعني كتير
الأخوان ذهبو بإجراء دستوري يادكتور وهو البند الأول في بيان السيسي ...اللي هو إجراء انتخابات رئاسية مبكرة...منصوص ع الإنتخابات مبكرة ودي قال بيها الجيش
ماذهبو بي دبابة ولا بي انقلاب...ذهبو بالقانون الرفضوهو ياباكر
قبلما تبني حكم علينا بعدم المبدئية ناقش ثم رص الاحكام ياباشا
في حتة مهمة جداً
لايمكن احزاب ديمقراطية ووطنية وممثلين روحيين زي البابا وشيخ الأزهر وثوّار زي محمود والاتنين المعاهو بتوع تمرد لايمكن يقبلوا يكونو شركاء في رسمة بتاعت عسكر....عارف يعني شنو تمرد وشباب طلع في يناير من سنتين مناهض مبارك العسكري ومات منو الف نسمة وزيادة ؟؟
برر لي رضاء البرادعي وناس تمرد وكهنة الرب بي انقلاب....برر سريع,,
ولو قلت لي هم رافضين الأخوان ومستعينين عليهم بالعسكر بزعل منك ومابعفى ليك خااااالص انت والبروف
حكاية الشعب الطلع دي يابابكر أرجع في تقديرا ليوم 30 يونيو وبتلاقيها متجاااااوزة ال 25 مليون نسمة الصوتت في الانتخابات وكانت 13 لي سي مورسي و12 وحبة للجنرال شفيق ...
دي تقديرات جهات محايدة يا بابكر...
يبقى لو الكيزان طلعو بي اكتر من العدد الصوتو بيهو لي مرسي بس كنا حنقول انه الشارع منقسم
الشارع هنا ما منقسم...الشارع هنا فيهو اغلبية واقلية
اغلبية شعبية أذاقها الكيزان وساموها سوء العذاب وحاربوها في عيشا وفي دينا زاتو
وكفروها وبيعلنو عليها الجهاد أناء الليل وأطراف النهار وعايز يتمكنو غصباً عن عين ابو اهلهم
الكيزان مصريين لكنهم مصريين مخذولين بسبب سياساتهم وبسبب تمييزهم الديني والطائفي الكيزان كانو في مواجهة الجيش والشرطة والقضاء والأحزاب الوطنية مجتمعة عدا الجماعة الإسلامية واللي هي اقلية لكن مواطنين برضو
يا باكر الشرعية هنا شرعية الميدان والأكثرية
والديمقراطية يا دكتور هي رأي الأغلبية اضافة لي انه في جو ثورة وفي شرعية ثورية برضو ....بتتكلم عن ياتو ديمقراطية؟؟؟
سيييب ديل
حزب النور السلفي يابابكر كان موافق على انتخابات رئاسية مبكرة حقنا للدماء ولانه زي ماقال عضو فيهو انه مصلحة البلد أهم والأخوان ما اقامو دولة الشريعة
يعني زي الكفار واحد عند الحويني وجماعتو
الجماعة الاسلامية دي زاااتا كانت منقسمة ولازالت وفي مجموعة منهم بتقول بالانتخابات المبكرة وقمعوهم وحنشوف خير في الايام الجاية من تشظي وتكفير بعضهم لبعض وح تقر عيونا جداً كمان
ليك ولي أمين بقول ليكم انا بعارض وبكره الكيزان لانهم منقلبين وقاعدين بي انقلاب في السودان وما ثابت لغاية هسا انه ده انقلاب في مصر
تمر الفترة الانتقالية ياباكر ونحتكم لموقف القوات المسلحة المصرية لكن ما تبني لي على افتراض ابداً قدامنا وقائع هي البتحكمنا
ومن خلال الوقائع والمعطيات أثبت لي انه انقلاب ومتوفرة فيهو اشراط الإنقلابات
بدل تقطعو بي انه انقلاب
بعد القوات المسلحة المصرية دي ذات نفسها سلمت السلطة لي حكومة ديمقراطية منتخبة في 30 يونيو الفات لي مرسي
يبقى في سابقة ياباشوات اضافة لي حسن النية القدموها وعينو زول قاضي ومدني لي إدارة شيئون البلاد وعمل انتخابات رئاسية مبكرة
صح الكلام يا امين وبابكر ؟؟؟؟