اخوانا ود الخير ...سلام و لعلك بخير
اقتباس:
المشاركة الأصلية كتبت بواسطة ود الخير
السودان سلة تمويل العالم ب (الغُلاط والكِجار) من دون منازع !!
مداخلتك دي يا أخ أمين لو لقت إنسان عنده ذرة سوء ظن ..ممكن يمشي
يبحث ويصفك بالكذب( لا إيدك لا كراعك) ويغالطك إنك قلت إنك سبب تحريك خمول بوست الجن دا !! وإنك الجابك للبوست عمنا قوقل ...وأثناء ما إنت بتحاول تثبت ليهو إنك بريء من تهمة الكذب يكون وصفك بهذه الصفة (الكذب)100 مره ...والجمال مآآشيه !!...
برضو عاين دي:
قلت عمك الاستاذ أحمد سليمان ..الله يرحمو ... إنسان متضايق من كلمتك حقت (بل ..بليتو ..البل..بلني.. الخ..
حايجي يغالطك ويقول ليك إنت ( كذاب) مستحيل بروف إبن بروف وعمه بروف بمكانة الأستاذ أحمد سليمان الله يرحمو ! يكون دا أسلوبه ودي عباراتهو البستعملها ..
ما أسهل الترصد وخاصة في أشياء مثل المواقف التي تمر بالناس في سفرهم وترحالهم الكثير...
هسة أنا كنت عاوز أحكي قصتي بتاعت (درب النمل) وإننا ماشين من لبنان الى أوربا كداري..وفي أثناء الطريق إتزوجو ناس وولدو ..ونفس الناس ديل تتطالقوا وتزوجوا تاني في نفس الرحلة ! والإتنبن تاني رزقوا بأبنا ..ودا كلو قبل الوصول...متأكد بالطريقة دي ما حا تصدقوني ...وأنا ما حا أحكي ..
الغيور والمترصد العادي (الماوصل درجة بروف) الصفات دي فيهو شينة !
لكن ناس دكتور وبروف و و و ..والله شناتها ما بتتقابل ..
بالله الحق (والحقوق محفوظة للأخ ماجد) متردد من أمبارح ما بين مداخلتي دي..ولا آخد لي (حردة) صغيّرة كدي من سودانيات ..! لانو والله ما إتعودنا نتلمّ نحن والظلم في مكان واحد !
تحياتي أخ أمين.. وآمال دي عليك الله أمرقها من هنا ! نحن السودانيين ديل عودنا بيدوّر في اي لحظة...مساكين يا بروف نحن لي هسا بنتشاكل !! لا حولة ولا قوة الا بالله !!
|
اتفق معاك جدا اننا سلة غذاء العالم ب (الغُلاط والكِجار) ...و بشوفها جزء من سبب تخلفنا ...قلة قليلة جدا مننا قدرو يسمو بروحهم حتى لو مظلومين ... بالتأكيد أنا ما منهم !!
بالنسبة لمداخلتي الجبتها دي ... أو حتى أي مداخلة لي ولا لغيري ... ممكن أي زول يعمل منها الداير يعملو ... لكن الناس بتقرأ و تفهم ... هل في موضوعية في الكلام ولا لا .... أنا صححت كلامي في مداخلة تانية و كان ممكن أعدل مداخلتي ... و لسه أنا مقتنع بكلامي القلتو أول تماما مثل ما هو ... فقط صلحت معلومة إنو ديك ما كانت أول مداخلة لي ...لكن الباقي كلو زي ما هو !!
بالنسبة لمعلومة أحمد سليمان أو لانك مشيت كداري من لبنان ل أوروبا ... المشكلة شنو ... هسي أفتح بوست قول انك شاكي اني ما ود أخو ... أو انك مشيت القمر كداري خليه أوروبا ... من حقك تكتب الدايرو طالما مافيهو ما يمنع لائحيا ... و من حقي و حق باقي الناس نصدق ... نكذب ... نسخر ... نحرد ... نعمل أي حاجة ...طالما في حدود المسموح بيه في اللائحة .....دا البوست يا ود الخير ...و دا فهمو ....و ما جئت به مما أظنه كذبات و سرقات و مواقف لا يصدقها عقل من كتابات عسوم ... عبارة عن عرض لاسباب سخريتي من كتاباتو ... و ما جبتها إلا مضطرا !!
كلامك بتاع إنو البروفات ما بعملو كده ...و ما عارف شنو ... أنا بعتبرو نوع من محاولات التحييد الغير مجدية ... أنا جبت كلام محدد ...وضحت الغرض منو شنو ...و وضحت ليه أنا جبت كتابات الف ليلة و ليلة العسومية و السرقة و التدليس .. إنت و من نحى نحوك ما عندكم سكة تقولو لي إنت كذاب عسوم ما قال كده ... ولا إنت بهتو ... عشان كدا مافي سكة غير ياخي الكلام دا ما بشبهك و دا ترصد و دي حرب و كرهتونا المنتدى و كنت داير أحرد و باقي كلامك دا !!
موضوعي هنا بسيط جدا يا ود الخير ... مثلما للكل الحق بالكتابة و التعليق على الكتابات ... أنا عندي نفس الحق ... مافي زول من حقو يقول لي دي حرب و دي كعوبية و يشتمني و يقولني ما لم أقل ... بس... ببساطة كدا !!
و كن بخير ...