[فيصل سعد]

[align=center]ذكريات في سيرة الغربة و الترحال
خططناها سنة سنتين ، الآن دقت فوق العشرين،
و اصبحت هجرة، و ربما "ون وي ترافيك" و الشكية لله[/align]

والدنا الراحل كان يعمل بالكويت 1980 - 1986 هاجر و الاسرة ما عدا اخوكم، الطالب المجتهد في ذلك الوقت، و كنت ساكن مع جدي و حبوبتي في بيت المال، و بزور الاهل و بزوروني في الاجازات، حسب التساهيل،، المهم تخرجت 1983 من الخرطوم القديمة و كسحت الكويت، و قلت للوالد انا القراية دا حدي معاها هنا، و ساعدنا بوظيفة و كدا، قال نجوم السماء قراب، المهم بعد نقة، رجعت امدرمان، و من هناك جدي كسح بي القاهرة، و شربكني في معهد كومبيوتر سنين و معتمد و بروفشنال، تابع لاكبر هاردوير مانوفاكشرور في ذلك الوقت (IBM) و ربما حتى الآن في هذا القلوباليزم،،

قضيت سنتين تلاتة زي السم في قاهرة المعز، خلصت و ظرفت شهاداتي بعد الاعتمادات و التوثيقات، و يا الكويت جاك بلاء، فتحنا الموضوع تاني مع الجلك، و العزيز الراحل لاوز بالدبلوما و قال ما كفاية، "اللهم طولك يا روح" ، و استرسل و اشار انه مافي خبرة عملية و السودان اولى بالجهد و العطاء، و البلد و ناس البلد، و طين البلد و تمر البلد، و طير البلد و كل ما في البلد بيحتاجوا علمكم و شبابكم، و يجب ان تناضلوا القهر و البطش المايوي، و تساهموا في الحرية و انارة دروب العتمة و التيه والضلال، و ما في سبب لاغتراب و هجرة الشباب، و خش لينا في مليون تفصيلة و سالفة، شيئ واقع لينا و مفهوم و مستدرك، و اشياء كثيرة فوتناها بالصمت و التبلم و هزة الراس و الموافقة بالايجاب.. قضيت ايام اجازتي معاو و مع امي و اخواني ، و رجعت امدرمان خشمي ملح ملح، و فاقد تركيز و توازن و ملخوم و حالتي تحنن الطير..

بواسطة عم عزيز و غالي ، تم قبولي و تعينت بارت تايم و متدربا بكمبيوتر الهيئة القوميةالكهرباء و المياه بماهية 280 جنيه في الشهر، متكيف و مبسوط و متجدع و متشرشح بمزاج، كورة و سينما و مسرح و قاعة صداقة و جرين فيلدج و معارض و رحلات و بحر و صيد سمك و قعدات للطيش و ما خلينا لا حنة لا صبحية لا قيدومة ما كتلناها، كذلك دخلنا اتحاد الشباب و ساهمنا في طباعة و توزيع بيانات و منشورات المعارضة الجادة و الرصينة الله يطراها بالخير، و تلمسنا دروب و مسالك المعارضة الوطنية السرية الجادة و المنظبطة و العميقة.. رغم كل ذلك الزخم ظل هاجس الاغتراب و الدولار ابصلعة باقيا في الضلوع و الراس، و مأجلا مؤقتا الى حين..

جدي الله يرحمه برضوا، كنت مريحوا تمام الراحة، مراسيل و صفوف بنزين، و صفوف عيش، و جير و بوهية، و سوق خضار و متكيف مني شديد، و عارفني داير افرتق من البلد و واقف معاي داعما و مساندا للطيش، كلم ولده الكبير (خالي) في امارة ابوظبي و قال ليو ود اختك دا شوف ليو طريقة سوقوا معاك يكون نفسة، و رسل ليو زيارة و تذكرة في اقرب فرصة، و الخال وعد خيرا، و نفذ وعده فيما بعد تماما و زيادة ، قلت لجدي الوالد حيرفض الاغتراب و انت عارفو، قال لي ما تقلق و ابوك انا بقنعه ليك تماما، و قدامك بالتلفون دا حتسمع باضانك دي و بديك موافقة فورية،، المهم في مساء صافي و بعد جو مغيم و ممطر اتصلنا انا و جدي بالوالد في الكويت و بعد السلام و التحايا دار شيئ كهذا الحديث بين والدي و جدي :

- الصحة و الاحوال و كيفكم كلكم.
- بخير و في امان الله كيف انت و العقاب.

- الحمد لله مافي عوجة تب بس الرطوبة شديدة الايام دي.

- ان شاء الله المصاريف بتصلكم في انتظام و مكفية و مغطية معاكم.

- لا تمام جزاكم الله خيرا، و نحمد فضله و نشكرة، مانا محتاجين حاجة تب، و ما تتعبوا و ترهقوا نفسكم و ما تنشغلوا بينا كتير.

- مافي تعب و لا حاجة و دا اقل من الواجب يا حاج.

- كيف الاولاد و امهم و مدارسهم و باقي الاهل المعاكم.

- لا تمام كلهم بخير، ابن الكلب داك ان شاء الله كويس و ما مغلبكم و كدا ؟


- لا كويس ، لكن من ناحية مغلبنا مغلبنا و انا ضارب ليك بسببو

- استر يا رب،، مالو المرة دي ان شاء الله خير.

- الايام دي قاعد مباري اهلنا السدنة ديك، و طالع و نازل معاهم، و انا لاقيت ود خالي الوزير و ود عمك الوزير التاني داك في اكتر من مناسبة، و لمحوا لي انه عندهم تعينات و ترشيحات جديدة في مناصب في الخارجية و الجهاز و الاتحاد الاشتراكي و ولدنا دا مختوت في راس القائمة و اسمه في اول الكشف و الريس صدق عليه، و المسألة مسألة وكت .

- النظام في آخر ايامه و بقى يتخبط و كمان داير يورط الشباب ديل، و دي مسرحية و محاولة تجميل صورتهم القبيحة و قذارتهم و وحشيتهم و فسادهم، ما كفاية طفشونا نحن، كمان دايرين يضايقونا في اولادنا، اها و هو رايو شنو ؟؟

- يظهر و الله اعلم هو ما عنده علم بالموضوع دا، لكن الناس ديل انت عارف مغرياتهم خطيرة، قروش و عربات، بذخ و صرف مفتوح، رشاوي و بلاوي زرقاء، و قمة الفساد و الرشوة، و المقاومة صعبة لشباب في سنهم .

- الغريبة انا عمه بديني عنه معلومات ممتازه في شغله، و نشاطوا و انه زول مسؤول و منظبط و محترم و قلبو حار و زول خير.

- عمه ما قال ليك الا الحقيقة ، و هو كذلك، لكن انا ضارب ليك اشاورك في المعلومات السمعتها من ناسنا ديك و نتشاور .

- و الله دي عوجة لو حصلت، انت رأيك شنو ؟

- و الله انا عملت احتياطات قبل ما اضرب ليك، و كلمت خالو في ابوظبي و رسلت ليه شهاداته و اوراقه و جوازه، و شرحت ليو بدون اي تفاصيل، يساعد الزول دا باي طريقة، و وعد خير ..

- احسن حاجة عملتها يا حاج، لكن انا بفتكر نطفشوا من البلد دي و انا بجيبه يقعد معاي هنا مؤقتا ، بدل ما يتورط مع الناس ديل و ما يقدر يتخارج .. كدي لو هو موجود اديني اكلمه ..

- جدا ، دقيقة واحدة ، و ما تشيل هم ربك بسهلها و بعين، و ناس مايو الرمم ديل ولدنا دا يشمو قدحة ..

- السلام عليكم يا بوي كيفكم ان شاء الله طيبين .

- اهلا و سهلا كيفك و كيف احوالك، و احوال اهلك و كيف شغلك.

-كلهم بخير و يسلموا عليكم، كيف امي و اخواني

- تمام، منتظرينك تجيهم زيارة، انا حأرسل ليك التذكرة و التأشيرة على الخطوط الكويتية
بعد بكرة، استلمهم و احجز و اركب تعال الاسبوع الجاي اخد ليك شهر شهرين معانا .

-جدا مافي عوجة، بمشي ليهم بعد باكر، و بحجز بعد اسبوعين و بجيكم ان شاء الله

- اسبوعين لشنو، ما تجي الاسبوع الجاي .

- بس داير احضر جواب اجازة و كمان احضر هلال مريخ على كاس الدوري الممتاز و ارتب اموري و بسافر بعد اسبوعين ان شاء الله.

-و هو كذلك، سلم على جدك و حبوبتك و خيلانك و خالاتك و اعمامك و عماتك، سلام

- و عليكم السلام، في امان الله ..

شكرت جدي لدعمه و عونه و حكمته، وغادرت انا للكويت، ثم الى ابوظبي بعد وفاة الوالد موظفا محترما بمزاج ،، بعد زوال النظام المايوي، جلسنا انا و ابي و جدي و تطرقنا لهذا الموضوع كذكريات و ونسة عابرة، و تفاجئت انا بان الموضوع لم يكن دعما و مزحا او كذبة بيضاء من جدي العزيز، بل كان حقيقة و واقع معاش في تلك الفترة، مما زاد احترامي و عرفاني و وفائي و اكباري لهذين الرجلين العظيمين رحمهما الله و احسن اليهما ..