كتابت مبعثرة جدا
(14)
داير اسألك
يازول مساسق ديمة في جواك للحلم الموزع
بين دروب الليل وفرقان الغياب
داير اسألك
عن كيف أدس باقي اليقين الفيني
في بطن الوجع تيراب
وأنا الزول المخسم بالدرادر
و المستًف بالغباين والمشاوير السراب
يازول مكندك بي غبار وجع الدروب المابتلم
في سكة البلد التشوفو رهاب رهاب
داير اسألك
من وين الملم ذكرياتي عشان اجيك ضحكة وحجا
داير اسألك
عن كيف اشيلك زاد بعد تعبت خيول احلامنا من شيل الغنا المليان بكا
داير اسألك
عن حسرة الولد الابت ترتاح ملامحو علي صباحات الحضور غنية فرح
داير اسألك
عن ليلة العيد النست ترسم علي قلب الدفاتر ضحكة الفقرا وعيونك قوس قزح
داير اسألك
عن قصة الفرح النزح
يازول محاصر بالغنا الممنوع كتابتو
علي دفاتر الهجرة للحلم المحال
علمني كيف اختا الدروب المابتحن
قبال تموت جواي بروق اللهفة لي قولة تعال
يايوم مجرتق عيد وفال
شابيت عليك وندهت ياباقي الفضل جواي من الطين سؤال
علمني كيف
اختار خطاوي الرجعة للنيل المكتف بالهزائم والخوازيق الضلال
علمني كيف أمرق من الاحزان علي الشوق البناتل ديمة
للوطن الجمال