سلامات يا النور
شكرا جزيلا على افتراع هذا البوست الهام، وارجو ان تتقبلني ضيفا طويل الاقامة كثير الاسئلة ملحاحا، لان المواضيع دي قاعد تشحتف روحي فعلا، تسمع بي قصص كتيرة لكن كأنها سراب ماتقدر تمسكها بي يدك وماتعرف لو كانت حقيقة ام خيال
ومن المؤسف فعلا رغم انو في آلاف الناس البيؤمنوا بمسألة الحجبات دي وبيقولو انهم شافو نتائجها وبيتعاملو معاها على انها حاجة حقيقية لاشك فيها، الا انو وبكل اسف مافي اي توثيق واضح ولايقبل الشك للحاجة دي!!
حادثة ضوينا دي من اوضح الامثلة لمسألة الحجبات وفي ليها عشرات شهود العيان ويمكن تقصيها لحد كبير ولكن عندي ملاحظة صغيرة
يعني الحادثة دي شهدوها كميات كبيرة من الناس فيهم ضباط شرطة وجيش وامن عام وقاضي وكمية كبيرة من الجنود، ومع ذلك تم التعامل معاها بكل البساطة الموجودة في الدنيا دي!! يعني كيف يعني زول يضربوهو رصاص بالكميات دي وماتجيهو حاجة؟ وكيف اساسا الناس تتعامل مع الموضوع ده كأنو شي عادي؟! وكيف اساسا يتم اعدام الزول ده بدون مايتعرف الحكاية دي حصلت كيف؟ بالجد يا النور الاغرب من كونو الرصاص مايعمل شي لي ضوينا، كمية اللامبالاة الاتعاملو بيها الناس معاها!!
المهم كدى اسي كبداية كده اتمنى انك تحكي لينا انت شخصيا شفت شنو؟ يعني عايزين نسمع روايتك انت للاحداث دي
تحياتي
|