[imported_خالد الحاج]

المشاركة الأصلية كتبت بواسطة Osman Hamad

سلام خالد
ياخالد انا ليس لى مانع من حيث المبداء فى حذف العضوية التى منذ 3 سنوات وحصيلة مشاركاتهم (0)، ولكن إختلاف رأئ معاك فقط فى الكيفية التى تم بها حذفهم واحقيتك فى القيام بهذا. اما حكاية ال6 شهور دى انساها خالص.

سؤال: هل تم إخطار المحذوفين بذلك؟
سؤال تانى: هل يمكن برمجة السستم بان تخبرهم برسالة اذا ما حاولوا تسجيل دخول بانهم حذفوا للسبب الفلانى كدا كدا؟

اعتقد ان من واجبك كمدير فنى إضافة العضوية للسستم وليس قبولهم، حكاية القبول دي حقو الناس تقعود تشاور فيها، هل هي واجب الامين العام ام نائبه ام المدير الفني ام مشورى بين ال3.
شايف الناس قدوك بالنظريات واولهم انا، لكن تستاهل عشان شلاقتك البتسوي فيها دى;):D
الود ياهو ذاتو

إزيك يا عثمان
كدي في الأول نحكي ليك قصة دمقراطية سيد التكسي:

بعد الإنتفاضة صاحبنا بتاع التكسي الإشارة قدامو حمراء ما إشتغل بيها الشغلة وعبر الشارع
ولما البوليس وقفو سأله ده شنو يا زول إنت ما شايف الإشارة حمراء؟
قال : ما قلتوا دمقراطية.

يا عثمان يا أخوي منذ إنشاء سودانيات قبل أربعة سنوات مر عليها أربعة أمناء..
أحمد أمين
الطيب بشير
خالد تنقو
وأخيرا عكود

ما حصل ولا مرة أن قام الأمين العام بعمل عضوية لي شخص أو قام برفد شخص.
عندما يحدث توقيف لعضو يحدث لفترة محددة كعقوبة.كان هنالك بعض الإستثناءات وهي حالات لا تتعدي أصابع اليد كان الإيقاف فيها نهائي.وعندما يريد الأمين العام عمل عضوية لشخص
يرسل بياناته للإدارة الفنية. وكم حاولت إقناع تنقو بعمل عضوية لمن يشاء ورفض.


الخلاصة يا عثمان ما حدث من حذف للأسماء هو صميم إختصاصي كمسئول فني
وكانت مهمة تعيين الأعضاء في السابق تقوم بها الأخت حنينة.

أسه كل ما أخشاه يجي زول يقدم بإسم (خالد) يقوم ناس (الدمقراطية) يقولوا لي تتنازل عن إسمك
للأمين العام. شفت كيف؟


تأتي للإجابة علي أسئلتك.

(1) ظللنا نرسل الرسائل دوريا وفي كل مناسبة.. ندعو الناس لكل جديد أخر مرة كانت مناسبة صدور العدد الثاني لمجلة سودانيات.

(2) لو حاول أحد المحذوفين الدخول سيخبره السستم أن هذا الإسم غير موجود . وبكل بساطة يمكنه أن يرسل رسالة يطلب فيها عضوية جديدة والعضوية مفتوحة يا عثمان يا أخوي.


أخيرا ..
أي عضو لا مشاركة له سأقوم بمحوه من السستم بعد مرور فترة زمنية معقولة . ومبدءا نقول ستة أشهر.

هذا حق مشروع فهذا منتدي وليس مقبرة للجندي المجهول تجد فيها آلف الأسماء مكتوبة علي جدار من الأسمنت.

هذا يا عثمان موقع للمشاركة والتفاعل ووجود أسماء غير نشطة لا معني له.

سلام يا إبن أختي.