[align=center]نـــون[/align]
نون بنية
حلوة طاعمة وسكرية
في الملامح بت بتشبه
جبنة ساعة المغربية
ولونا كان لي لونا أقرب
أو أظن أجمل شوية
وفي تفاصيل ثانوية
قالوا نون ...
إنسانة جداً
ذوق وطيبة وحسن نية
أما في عمق القضية
نون بتدخل دون روية
وتمشي تندسا في ملامحك
ضل وغيمة ...
ونجمة في عيونك عشية
ونون رهيبة
زولة شدة ما رحيبة
فجأة تقلب حسن ظنك
في تفاصيل الحبيبة
وتنتشر في كل خلية
وتكتشف على حين غرة
إنو نون جواك مقيمة
ومطمئنة ومستقرة
والمشاعر مستمرة
وتبقى دنياك في حدودا
يمرق النور في سلاما
ومغرب الشمس في صدودا
ونون ودودة
لا بتصدك بي كلاما
لا بتردك بي ملامة
لا بتتجاوز ... حدودا
وبي بساطة تكون ردودا
إما حاضر ... ولاّ جداً
وكلمة طيبة ... وحسن نية
وزي قبيل ما قلتا عنّا
حلوة طاعمة وكوم محنّة
وزولة لماحة وذكية
وأي زول بتمنى إنّا
تبقى ليهو ... نار وجنّة
بيت وشفع ... وكم هدية
وحتة جوة الروح بهية
زيي زي كل اللقاها
واشتهاها
كنتا بحلم بي معاها
بيت وشفع وكم هدية
بيتنا يبقى سما القصايد
والحيط لي حد مداها
وشفع الطل الصباح
وأي نقطة من نداها
والهدية
إنو نون زاتا الهدية
وكل يوم زايد علاها
نكهة من بت سندسية
يوم بترسمني ببساطة
ويوم بتكتبني في قضية
ومرة تكتب عن منانا
ومرة تبكي من الأذية
وتبتسم من بين دموعا
بكرة أحلى ... وبكرة أغلى
وبكرة ... لي نون ... هسا ديا
أصلو نون ...
كانت بنية ...
حلوة طاعمة وسكرية ...
وزولة لماحة وذكية
ونون محنة
وما أظن القلتو عنا
يوصف الزولة البهية
أصلو نون ... أجمل وأغلى
من أحاسيس شاعرية
نون ... هي زاتا
زولة منتهى في حلاتا
وكل حاجاتنا الندية
نون محنة ... وحسن نية
أحمد عمر2007
|