[بابكر مخير]

مواصلة لي قصتي مع الملايين
بعد ما وصلنا المستشفي وبديت أجمع وأصحى من غفوتي، لقيت قدامي البنيات، ما هم ناس الإسعاف الشالني فتح الموبايل بتاعي ولقو إسم البنيات.
المهم الدكتور قال ليا لو عندك أوراق مهمة أديها لبناتك.
آها أهم ورقة طبعن كانت معاي هي بتاعت اللوتري، يا أخي ورقة ما تسوى مليم حمرة تساوي ملايين.
البنات ما بقدر أقول ليهم كسبت اللوتري لأنو حسب مفهومن أنها حرام (ربوية)، أديتهم الأوراق التانية الكانت معايا (ورق السجاير، ما أنا بستعمل السجاير اللف،،، براءة والله خالي من أي محظورات وناس هولندا بيعرفوه كويس لأنو أغلب الهولنديين بيدخنوه) تاني ورق بتاع فواتير الكهرباء والغاز والموية، الورق دا كان بالنسبة ليا هام وبيعمل ليا زغللة، لكن حسي ما خلاص.
الموية ما بنشربها، شي بيبسي وشئ عصاير وبرضو ممكن المعلوم، الكهرباء ما ليها لزوم ما الجنريترات على قفا من يشيل والغاز الواحد بيستغنى غنو،، مافي لزوم الواحد يطبخ لأنو المطاعم الفاخرة جاها زبون دايم.
المهم سريت للطبيب أنو في جيبي تذكرة بتاعت لوتري وكسبانا ملايين، قال ليا ممكن أحفظها ليك في خزنة المستشفي.
ما أخفي عليكم سر، قلت الدكتور دا يقوم يدني حقنة، يجيب خبري يريحني من الدنيا الجديدة المنتظراني دي قروش ووهم وتعب.