منال: معليش.. هذه المادّه لم أعدًها من قبل.. لذا فإنني أسرق بعض الوقت لكتابتها فعفواً.
نواصل:
- كان عندي علاقه فتره طويله مع بني عامراوي ساكن جمبنا في بورسودان.. وأهلي كانوا معارضين العلاقه دي..
كنت بقابلو بالسر.. رقدت معاهو كم مرًه لحدًي ما بطني إتنفخت بعد داك قاللي تسقطيهو وأنا ما قدرت على كده.. تقدر تكتل جناك!!
طيب عرًسني.. برضو قال ما بقدر.. أها لمن لقيت الأبواب كلها مسدوده.. قررنا نسافر أريتريا قال عندو زراعه هناك..
إتسللنا ودخلنا أسمرا.. قعدنا كم شهر.. لامن دخلت المستشفى..
( إنفجرت ثانية بالبكاء)..
ود الحرام ده سرق غويشاتي وجواز سفري وخلاني مرميه في المستشفى..
والحمد لله ولاد الحلال في.. أخواني اللاجئين في أسمرا وقفو معاي لحدى ما طلعت.. وحاولو يقابلوني بالخواجيه بتاعتم , لكن ما قدرت.. نصحوني إنو أنزل معسكر اللاجئين هنا في هايكوتا..
وجيت.. والله ريال واحد ما عندي.
- وصلتي تب.. مافي مشكله..
إرتمت علي وقبًلتني, تمتمت:- معليش غلبتك معاي يا ود العم , مررت أصابعي بين شعرها في محاولة مني لأن أعيد لها بعض السكينة..
بدأت تثرثر حول كيف كان ذلك البني عامراوي يطلع وينزل فيها.. وكيف كانت دهشتها بأسمرا حينما إبتاعت كوندوم ظناً منها أنه همبوكه , أعطتني واحداً فنفخته وطرشقته!
- إنتي عمرك كم؟
- سطاشر.
تبًا لهذا الإنتهازي الذي إغتال طفولتها. وجب علي أن أعيد ترتيب فوضاها لكن كيف؟ ومتى؟ وأين ستسكن؟ مع من؟ لذا كان لابد أن نتفق على صياغة case للخواجيه , هنالك نقطة ثانية أنني إنتبهت لكيفية نطقها لبعض المفردات فوجدتها مشبعه بالتقرنجه على النقيض من إدعائها الشيقنه.
- شوفي يا مشاعر.. أنا في اللجنه بتاعة اللاجئين , وحأعمل العلي في إنو ال case بتاعك يمشي للخواجيه وتهتم بيهو.. لكن في حاجات نحن لازم نتفق فيها قبل أي حاجه.
- ..........
- أول شي لاحظتو لغتك المكسًره دي , إنت ما سودانيه لكن سرًك في بير.. لمن تقابلي الإداره ما تتكلمي كتير.. وبعدين في حاجه.. المدير بني عامراوي غتيت شديد ويمكن يكون وصلو إنك كنت قاعده تشتًمي في أهلو.. ركًزي في كلامك إنك دايره حمايه ليك ولولدك وخلي الباقي علي.. بكره العربية بتاعة المعسكر بتجي هنا وبننزل سوا.
- وبعد داك أسكن وين؟
- بتترتب.. في أسر سودانيه كتيره هناك.. دي ما خايف منها
- خايف من شنو؟
- نواصل-
|