[خالد الحاج]

المشاركة الأصلية كتبت بواسطة أم سهى

تعرف يا خالد الحاجة اللي اسة ما قادرة انساها شنو؟؟
ساندوتشات سلطة الاسود والطعمية الكانو ببيعوها خالاتنا في ضل بيوت اشلاق البوليس جنب جامعة القاهرة الفرع - جنب دار الاتحاد
ياخ ديك عندها طعم تاني - بتذكرني ايام الجامعة وخصوصا لمن نكون ماشين جامعة الخرطوم نحضر ندوة او ركن نقاش في الامسيات اها كنا بنتذود من خالاتنا ديل ونشيل الساندوتشات وكداري من الفرع لجامعة الخرطوم - طبعا مقيل في الفرع ومنها لهناك
ياااااه زمن
اسة في مشيتي الاخيرة دي مشيت الفرع ولقيت نفس المنظر - البنات قاعدات مع زملائهم ياكلو ويتونسو - لكن اهتماماتهم اخرى - مختلفة تماما - اخر قيافة وهندمة والكلام كيف كيف
نحن زمان تلقى الواحدة فينا عجاجتها قايمة والنقاش كلو سياسة ولو كترو الكيزان بنطلع (سليقتنا)
زمن يا حليلو

سلام يا أم سهي
أظنني كنت التلميذ الوحيد العندو دفتر دين عند حاجة بتول والكلام ده في الإبتدائية ..
لم ينحصر الموضوع في سلطة الأسود والطعمية فقد كنت من عشاق (التبش بالشطة والدكوة)
وفي نهاية العام الذي جلسنا فيه لإمتحان الدخول للمتوسطة دفعت والدتي رحمة الله عليها 40 قرشا للحاجة بتول لقفل الحساب بعد مفاوضات أشبه بمفاوضات البنك الدولي .. أي والله
أما الحديث عن تغير مظهر الناس فدي بترك ليك الحكم فيها فقد طال غيابي يا أم سهي 13 عاما..
يبدو أن زيارتي للسودان هذا العام تحتاج لأكثر من ال 30 يوما أجازة التي منحوني لها في العمل بعد جهد جهيد ..
والشكية لله .